གཞུང་འབྲེལ་གདུང་སེམས་མཉམ་བསྐྱེད་ཀྱི་ལས་འགུལ་ཉིན་གསུམ་པ།

སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་གནས་ཚུལ་བཏང་འབྱོར་ལྟར་ན། ཕྱི་ལོ་ ༢༠༡༡ ཟླ་ ༡༠ ཚེས་ ༢༠ སྔ་དྲོ་ཆུ་ཚོད་ ༡༠ གཞུང་འབྲེལ་གདུང་སེམས་མཉམ་བསྐྱེད་ཀྱི་ལས་འགུལ་ཉིན་གསུམ་པ་རམ་ལི་ལཱ་ཐང་ཆེན་(Ramlila Ground)ནས་འགོ་འཛུགས་ཀྱིས་ཇན་ཏར་མན་ཏར་བར། བུད་མེད་རྣམས་ཀྱིས་རུ་སྣེ་དྲངས་ཏེ་ཞི་བའི་གོམ་བགྲོད་ཅིག་གནང་ཡོད་པ་དང་། གོམ་བགྲོད་འགོ་འཛུགས་སྐབས་མི་མང་གིས། བྱང་ཆུབ་སེམས་མཆོག་རིན་པོ་ཆེ།། མ་སྐྱེས་པ་རྣམས་སྐྱེས་གྱུར་ཅིག། སྐྱེས་པ་ཉམས་པ་མེད་པར་ཡང་།། གོང་ནས་གོང་དུ་འཕེལ་བར་ཤོག། ཅེས་དབྱངས་རྟར་དྲངས་ཏེ་གསུངས་ཡོད་པ་དང་། རིམ་བཞིན་མི་མང་གི་རང་རང་སོ་སོའི་འདོད་མོས་བཞིན་བོད་དབྱིན་ཧིན་གསུམ་གྱི་སྐད་ཐོག་ནས་སྐད་འབོད་ཤུགས་ཆེ་བྱས་ནས་རྒྱ་གར་གྱི་གྲོས་ཚོགས་ལམ་ཆེན་ཇན་ཏར་མན་ཏར་དུ་སྔ་དྲོ་ཆུ་ཚོད་ ༡༡ དང་ཕྱེད་ཙམ་གྱི་དུས་སུ་འབྱོར་ཡོད། ཉིན་འདིར་རྒྱ་གར་གྱི་གནད་ཡོད་མི་སྣ་སྐུ་མགྲོན་གང་མང་ཞིག་ཕེབས་ནས་བོད་དོན་རྒྱབ་སྐྱོར་གྱི་གསུང་བཤད་གནང་རྒྱུ་འགོ་འཛུགས་གནང་ཡོད་པ་རེད།།

Menu