ཁམས་སྐྱེ་རྒུ་མདོར་གྲྭ་བསོད་ནམས་སྟོབས་རྒྱལ་ལགས་ཀྱིས་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་སྲེག་གནང་བར་བོད་མི་མང་སྤྱི་འཐུས་ལྷན་ཚོགས་ཀྱི་གསར་འགོད་བསྒྲགས་གཏམ།

141ཕྱི་ལོ་ ༢༠༡༥ ཟླ་ ༧ ཚེས་ ༩ ཉིན་གྱི་ཕྱི་དྲོ་བོད་ནང་གི་ཆུ་ཚོད་ ༦ ཙམ་ལ་སྐྱེ་རྒུ་མདོའི་གེ་སར་ཐང་ཆེན་གྱི་གཡས་ཕྱོགས་སུ་ཡོད་པའི་ཁྲོམས་ར་ཆེན་མོའི་མདུན་ཐང་དུ། རྒྱལ་གཅེས་དཔའ་བོ་གྲྭ་བསོད་ནམས་སྟོབས་རྒྱལ་ལགས་ཀྱིས་རྒྱ་གཞུང་གིས་བོད་ཐོག་འཛིན་པའི་མཁྲེགས་འཛིན་ཅན་གྱི་སྲིད་བྱུས་ལ་ངོ་རྒོལ་གྱིས་རང་ལུས་མེར་སྲེག་གནང་ཡོད་པ་དང་། ད་ལྟའི་ཆར་འདས་གསོན་གྱི་གནས་ཚུལ་དེ་ཙམ་གསལ་པོ་མེད་རུང་། གནས་ཚུལ་མཁོ་སྤྲོད་པ་རེ་འགས་སྐུ་གྲོང་ཡོད་སྐོར་ཡང་བརྗོད་འདུག གྲྭ་བསོད་ནམས་སྟོབས་རྒྱལ་ལགས་དགུང་ལོ་ ༢༦ ལ་སོན་ཞིང་ཕ་ནང་ཆེན་བཀྲིས་དང་མ་བོད་བདེ་གཉིས་ཀྱི་བུ་ཡིན་པ་དང་ཁོང་སྐྱེ་ས་ཁམས་ནང་ཆེན་ཤར་མདའ་ནས་ཡིན་འདུག ད་དུང་ཁོང་གི་ཕ་བཀྲིས་ཡུལ་དེའི་ཚོང་པ་ཆེ་གྲས་ཡིན་པ་དང་རྒྱུན་དུ་ནས་མི་མང་སྐྱོ་པོའི་རིགས་ལ་རོགས་རམས་བྱེད་ཀྱི་ཡོད་ཅིང་། སྐབས་ཤིག་ནང་མི་ཚོར་རྒྱ་གཞུང་གིས་ཉེས་མེད་ཉེས་འཛུགས་ཀྱིས་བཙོན་འཇུག་བཀག་ཉར་བྱས་པའི་གནས་ཚུལ་ཡང་འདུག ཁོང་གི་རང་ལུས་མེར་སྲེག་གནང་པའི་སྐབས་གཡས་གཡོན་དུ་མི་མང་འདུ་འཛོམས་བྱས་ཡོད་པ་འདྲ་པར་ཁག་ནང་མཐོང་རྒྱུ་ཡོད་པ་དང་། ད་ལྟ་ས་གནས་དེར་རྒྱ་གཞུང་གིས་དམ་དྲག་ཧ་ཅང་ཆེན་པོ་དང་ཁ་པར་དང་དྲ་ལམ་སོགས་ཀྱི་བརྒྱུད་ལམ་ཡོངས་རྫོགས་བཀག་ཡོད་འདུག
ད་ཐེངས་རྒྱལ་གཅེས་དཔའ་བོ་གྲྭ་བསོད་ནམས་སྟོབས་རྒྱལ་ལགས་ཀྱིས་རང་ལུས་མེར་སྲེག་གནང་བ་འདི་ནི། ཕྱི་ལོ་ ༢༠༠༩ ཟླ་ ༢ ཚེས་ ༢༧ ནས་བཟུང་བོད་ཆོལ་ཁ་གསུམ་གྱི་ཁྱོན་ནས་རྒྱ་གཞུང་ལ་ཞི་རྒོལ་ཆེད་རང་ལུས་མེར་སྲེག་གནང་མཁན་ད་བར་ཤེས་རྟོགས་ར་སྤྲོད་གསལ་པོ་བྱུང་བའི་བོད་མི་ ༡༤༡ པ་དང། ཕྱི་ལོ་ ༢༠༡༥ ལོར་རྒྱ་གཞུང་ལ་ཞི་རྒོལ་གྱིས་རང་ལུས་མེར་སྲེག་གནང་མཁན་ ༦ པ་དེ་ཆགས་ཀྱི་ཡོད་པ་རེད། 141.1རྒྱ་གཞུང་གིས་དྲིལ་བསྒྲགས་དང་གསར་འགྱུར་བརྒྱུད་ལམ་སོགས་སུ་མི་རིགས་འཆམ་མཐུན་སོགས་བརྗོད་བཞིན་ཡོད་ཀྱང་། དོན་དངོས་ཐོག་བོད་མི་ཚོ་འཛིན་བཟུང་བཀག་ཉར་དང་སྡུག་སྦྱོང་མནར་གཅོད་བཏང་དྲགས་ནས། རང་གི་དྲིན་ཆེན་ཕ་མ་དང་གཅེས་པའི་སྲོག་ཚུན་ཆད་བློས་བཏང་སྟེ་རྒྱ་ནག་གཞུང་གིས་བོད་ཐོག་འཛིན་པའི་མཁྲེགས་འཛིན་གྱི་སྲིད་བྱུས་ངོ་རྒོལ་བྱེད་དགོས་བྱུང་ཡོད། ད་དུང་ཡང་རྒྱ་གཞུང་གིས་གཡས་ཁག་གཡོན་དཀྲིས་དང་སྡིག་པ་མིག་བཙུམ་གྱིས་དེ་མུར་གནས་ན། ཉིན་གཅིག་རི་ལུག་པར་ཐག་པས་མི་འདོམ་ཟེར་བ་ལྟར་ཆགས་སྲིད་པས་འགན་ཡོངས་རྫོགས་རྒྱ་གཞུང་གིས་འཁུར་དགོས་པ་དང་། ད་བར་བོད་ནང་སྲིད་དབང་དྲག་སྤྱོད་ལག་བསྟར་བྱས་པའི་མཇུག་འབྲས་བོད་ནང་གི་ཡ་ང་བའི་གནས་སྟང་མཐའ་དག་གི་འགན་ཡང་རྒྱ་ནག་གཞུང་གིས་འཁུར་དགོས།

རྒྱ་ནག་གཞུང་གིས་ཁ་ཡོད་ལག་ཡོད་ཀྱི་བོད་དོན་དཀའ་རྙོག་སེལ་འདོད་ཡོད་པ་དང། བོད་ཁུལ་ཞི་བདེ་དང་བརྟན་ལྷིང། བོད་རྒྱ་ཆེའི་མང་ཚོགས་རྣམས་བློ་བདེ་བག་ཕེབས་ཀྱི་ངང་འཚོ་བ་སྐྱེལ་དུ་འཇུག་འདོད་ཡོད་ཚེ། རང་ལུས་མེར་སྲེག་གཏོང་གནང་མཁན་རྣམས་ཀྱིས་གཙོས་བོད་མི་ཞི་རྒོལ་བ་ཡོངས་དང། བོད་རྒྱ་ཆེའི་མང་ཚོགས་བཅས་ཀྱི་མངོན་འདོད་ལ་བདག་སྤྲོད་བྱས་ཏེ་བོད་ཐོག་འཛིན་པའི་དྲག་གནོན་གྱི་སྲིད་བྱུས་ལ་འགྱུར་བ་གཏོང་དགོས་པ་དང། བློ་གཟུ་བོར་གནས་པའི་རྒྱལ་སྤྱིའི་ཚོགས་སྡེ་ཁག་དང་གསར་འགོད་པ་སོགས་བོད་དུ་རྟོག་ཞིབ་ཆེད་ཡོང་དུ་འཇུག་དགོས་པ་ནན་སྐུལ་བྱེད་རྒྱུ་ཡིན། ཞེས་བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༥ ཟླ ༧ ཚེས་ ༡༣ ལ།

Menu