༄༅། ། ༧སྐྱབས་རྗེ་ཡོངས་འཛིན་ཁྲ་འགུ་རིན་པོ་ཆེ་མཆོག་དགོངས་པ་གཞན་དོན་དུ་གཤེགས་པའི་ཡིད་སྐྱོའི་གནས་ཚུལ་ཐོན་པར། བོད་མི་མང་སྤྱི་འཐུས་ལྷན་ཚོགས་ནས་ཕྱི་ལོ་ ༢༠༢༣ ཟླ་ ༦ པའི་ཚེས་ ༡༣ ཉིན་དཔལ་ཁྲ་འགུ་བཀྲ་ཤིས་ཆོས་གླིང་གི་མཁན་སྤྲུལ་རིན་པོ་ཆེ་རྣམ་པས་དབུས་འདུས་སྤྱི་ཡོངས་དང་འབྲེལ་ཡོད་ལྷན་རྒྱས་ལ་ཐུགས་གསོའི་འཕྲིན་ཡིག་ཕུལ་བའི་ནང་འཁོད་དོན། ༧སྐྱབས་རྗེ་ཡོངས་འཛིན་ཁྲ་འགུ་རིན་པོ་ཆེ་མཆོག་དགོངས་པ་ཆོས་དབྱིངས་སུ་མཉམ་པར་བཞག་པའི་ཚུལ་བསྟན་པ་འདི་ནི་བོད་བསྟན་སྲིད་སྤྱི་དང་། ཡང་སྒོས་དཔལ་བཀའ་བརྒྱུད་པའི་བསྟན་པར་གོད་ཆག་ཤིན་ཏུ་ཆེ་བའི་ཡིད་སྐྱོའི་གནས་ཚུལ་ཐོན་པར་བོད་མི་མང་སྤྱི་འཐུས་ལྷན་ཚོགས་ལ་ཡིད་གདུང་དྲག་པོ་བྱུང་།
དེ་ཡང་༧སྐྱབས་རྗེ་ཁྲ་འགུ་སྐུ་ཕྲེང་དགུ་པ་ཀརྨ་བློ་གྲོས་ལུང་རིགས་སྨྲ་བའི་སེང་གེ་མཆོག་ནི་ཕྱི་ལོ ༡༩༣༣ ལོར་ཡབ་ཀུན་དགའ་དོན་གྲུབ་དང་། ཡུམ་སྐལ་བཟང་དབང་མོ་རྣམ་གཉིས་ཀྱི་སྲས་སུ་བོད་མདོ་ཁམས་སྒ་སྐྱེ་རྒུ་མདོར་སྐུ་འཁྲུངས་ཤིང་། ༧རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པ་རང་བྱུང་རིག་པའི་རྡོ་རྗེ་མཆོག་དང་། ཏཱའི་སི་ཏུ་པདྨ་དབང་མཆོག་རྒྱལ་པོ་སོགས་ཀྱིས་ཁྲ་འགུ་སྐུ་ཕྲེང་བརྒྱད་པའི་ཡང་སྲིད་དུ་ངོས་འཛིན་མཛད་དེ་ཆོས་ཀྱི་སྒོར་ཞུགས། དགུང་ལོ་བདུན་ཙམ་ནས་ཁྲ་ལེགས་རིན་པོ་ཆེས་དབུ་མེད་ཀ་ཁའི་ངོ་སྤྲོད་གནང་བ་དང་འབྲེལ་ཐོས་བསམ་མཛད། བཀའ་བརྒྱུད་རང་ལུགས་ཀྱི་ལྟ་བའི་བཞེད་པ་དྲི་མ་མེད་པ་མཁྱེན་ཕྱིར་༧རྒྱལ་དབང་ཀརྨ་པ་སྐུ་ཕྲེང་གསུམ་པ་ཀུན་མཁྱེན་རང་བྱུང་རྡོ་རྗེ་དང་སི་ཏུ་ཆོས་ཀྱི་འབྱུང་གནས་སོགས་ཀྱི་གསུང་རབ་ལ་ཐོས་བསམ་ཚུལ་བཞིན་མཛད་དེ། ཕྱི་ལོ་ ༡༩༦༧ ལོར་༧དཔལ་རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པའི་བཀའ་དགོངས་བཞིན་སྦག་ས་ཆོས་གྲྭར་མདོ་སྔགས་ཀྱི་གཞུང་མང་པོའི་དམ་བཅའ་བཞག་པས། ༧གོང་ས་མཆོག་གི་སྐུ་ཚབ་ལྷན་རྒྱས་དང་དེར་ཡོད་ཀྱི་མཁན་པོ་དགེ་བཤེས་ཀུན་གྱིས་བསྔགས་བརྗོད་ཀྱི་མེ་ཏོག་གཏོར། དེ་ནས་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་བརྒྱུད་ཀྱི་མཁན་པོའི་མཚན་གནས་སྩལ་རྗེས་༧རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པ་ཆེན་པོ་མཆོག་ནས་རུམ་བཏེག་གི་གདན་སར་བཤད་གྲྭ་གསར་འཛུགས་གནང་ནས་མཁན་ཆེན་གྱི་ཁྲི་ལ་མངའ་གསོལ་གནང་། ལྷག་པར་དུ་ཕྱི་ལོ་ ༡༩༦༠ ནས་ ༡༩༧༧ བར་༧རྒྱལ་དབང་ཀརྨ་པ་རང་བྱུང་རིག་པའི་རྡོ་རྗེ་མཆོག་གི་དྲུང་ནས་དབང་ལུང་སོགས་དམ་པའི་ཆོས་ཀྱི་བགོ་སྐལ་མང་པོ་གསན་ནས་མཐར་མདོ་སྔགས་རིག་གནས་དང་བཅས་པ་ལ་མངའ་བརྙེས་པའི་སྐྱེས་ཆེན་ཞིག་ཏུ་གྱུར།
ལྷག་པར་དུ་༧དཔལ་རྒྱལ་དབང་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་ཡོངས་འཛིན་མཛད་པ་སོགས་བསྟན་འཛིན་གྱི་སྐྱེས་ཆེན་མང་པོ་ཞིག་གསོ་སྐྱོང་མཛད་གནང་བ་མ་ཟད། ༧སྐྱབས་མཆོག་ཡོངས་འཛིན་མཆོག་གིས་ད་བར་འཛམ་གླིང་ཤར་ནུབ་ཀྱི་ས་ཕྱོགས་མང་པོར་ཞབས་ཀྱིས་བཅགས་ཏེ་ཆོས་ཀྱི་ལྟེ་གནས་དུ་མ་གསར་འཛུགས་དང་། མི་རིགས་འདྲ་མིན་གྱི་སློབ་མ་མང་པོར་ཆོས་ཀྱི་བདུད་རྩིས་ཚིམ་པར་མཛད་ཅིང་གཞུང་འགྲེལ་གྱི་ཕྱག་དཔེ་ལྗགས་རྩོམ་ཡང་མང་པོ་མཛད་པ་སོགས་ཀྱིས་བསྟན་འགྲོར་ཕན་པའི་རླབས་ཆེན་ཕྱག་རྗེས་འཇོག་གནང་མཛད་ཡོད།
༧སྐྱབས་མཆོག་ཡོངས་འཛིན་ཁྲ་འགུ་རིན་པོ་ཆེ་གང་གི་གདན་ས་གནས་མཆོག་སྟག་མོ་ལུས་སྦྱིན་ཁྲ་འགུ་བཀྲ་ཤིས་ཡང་རྩེ་དགོན་དུ་གང་ཉིད་དགུང་གྲངས་ ༩༡ ལ་ཕེབས་པ། རབ་གནས་ཆུ་ཡོས་བོད་ཟླ་བཞི་པ་ས་ག་ཟླ་བའི་ཚེས་བཅོ་ལྔ། ཕྱི་ལོ་ ༢༠༢༣ ཟླ་ ༦ ཚེས་ ༤ ཉིན་གུང་ཆུ་ཚོད་དང་པོ་ཙམ་ལ་དགོངས་པ་ཞི་བར་གཤེགས། ༧སྐྱབས་རྗེ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་འདིས་བསྟན་འགྲོ་སྤྱི་དང་། ཁྱད་པར་གང་གི་སྐྱོང་ཡུལ་རྣམས་ལ་གོད་ཆག་ཆེན་པོ་བྱུང་བ་ནི་བརྗོད་མ་དགོས་པ་ཞིག་ཡིན། དེར་བརྟེན་བོད་ཕྱི་ནང་གཉིས་སུ་བཞུགས་པའི་༧སྐྱབས་རྗེ་ཁྲ་འགུ་རིན་པོ་ཆེའི་གདན་ས་དགོན་ལག་འདུས་སྤྱི་ལས་སྣེ་ཡོངས་ལ་བོད་མི་མང་སྤྱི་འཐུས་ལྷན་ཚོགས་ནས་ཡིད་གདུང་དྲག་པོས་ཐུགས་གསོ་ཞུ་རྒྱུ་དང་། ཞི་བར་གཤེགས་པ་གང་གི་ཐུགས་དགོངས་ཟབ་མོ་རྣམས་ཡོངས་སུ་རྫོགས་ཤིང་། ས་ལམ་གྱི་བར་ཆད་ཞི་ཞིང་གང་གི་ཡང་སྲིད་སྤྲུལ་པའི་ཉིན་གཞོན་མྱུར་དུ་འཆར་བའི་ཐུགས་སྨོན་གང་ཟབ་གནང་སྐྱོང་ཡོང་བ་དང་དགོངས་རྫོགས་མཆོད་དོད་དང་བཅས། ཞེས་འཁོད་འདུག་པ་བཅས། །