![]() ཕྱི་ལོ༢༠༡༢ ཟླ༦ ཚེས་༢༩ ཉིན་གྱི་ཞོགས་པའི་ཆུ་ཚོད་༨ པ་ཡས་མས་སུ་ ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་བློ་བཟང་འཕྲིན་ལས་ལྷུན་འགྲུབ་ཆོས་ཀྱི་རྒྱལ་མཚན་མཆོག་གི་མ་ཡུམ་བསོད་ནམས་སྒྲོལ་མ་མཆོག་ཟི་ལིང་དུ་དགུང་ལོ་༩༧ ཐོག་སྐུ་གཤེགས་ཡོད་པའི་ཡིད་སྐྱོའི་གནས་ཚུལ་གོ་འཕྲལ་བོད་མི་མང་སྤྱི་འཐུས་རྒྱུན་ལས་ལྷན་ཚོགས་ཀྱིས་མྱ་ངན་བློ་ཕམ་དང་བཅས་ནང་མི་ཤུལ་ལུས་འབྲེལ་ཡོད་ཀུན་ལ་ཐུགས་གསོའི་འཚམས་འདྲི་ཞུ་རྒྱུ་དང་། མ་ཡུམ་བསོད་ནམས་སྒྲོལ་མ་མཆོག་གིས་མཚོན་ཚེ་ལས་འདས་པ་ཡོངས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་རིམ་བརྒྱུད་སྐུ་བཞི་རྣམ་མཁྱེན་རྒྱལ་བའི་གོ་འཕང་མྱུར་ཏུ་ཐོབ་པའི་སྨོན་འདུན་དང་བཅས། བོད་མི་མང་སྤྱི་འཐུས་རྒྱུན་ལས་རྣམ་པ་དང་རྡ་ས་ཉེ་འཁོར་ཕྱོགས་བཞུགས་སྤྱི་འཐུས་རྣམ་པ ། ཕྱི་ཟླ ༧ ཚེས་༣ ཉིན་མདོ་སྨད་དབུས་ས་གཉིས་ཀྱིས་གོ་སྒྲིག་གིས་ཐེག་ཆེན་ཆོས་གླིང་གཙུག་ལག་ཁང་དུ། ༸སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་པ་མཆོག་ཚོགས་མགོན་དུ་ཆིབས་སྒྱུར་བཀའ་དྲིན་ཆེ་ཐོབ་ཀྱིས་འདས་མཆོད་སྨོན་ལམ་འཚོགས་པར་མཉམ་ཞུགས་གནང་རྒྱུ།
བོད་མི་མང་སྤྱི་འཐུས་ལྷན་ཚོགས་ཀྱིས། ཕྱི་ལོ་༢༠༡༢ ཟླ༧ ཚེས ༢ ཉིན། |