༄༅། །སྦར་ཛིལ་ (Brazil) གྲོས་ཚོགས་འཐུས་མི་གཉིས་སྤྱི་ལྷན་ཚོགས་གཙོ་གཞོན་པ་མཆོག་དང་སྤྱི་འཐུས་རྒྱུན་ལས་མཉམ་མཇལ་འཕྲད།

སྦར་ཛིལ་ (Brazil) གྲོས་ཚོགས་འཐུས་མི་དང་སྦར་ཛིལ་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Walter Feldman དང་། སྦར་ཛིལ་གྲོས་ཚོགས་འཐུས་མི་དང་སྦར་ཛིལ་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་  Pastor Eurico རྣམ་པ་གཉིས་རྡ་སར་ཕེབས་ཡོད་པས། དེ་རིང་སྔ་དྲོ་སྤྱི་ལྷན་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་མཉམ་མཇལ་འཕྲད་གནང་སྟེ་ཚོགས་གཞོན་མཆོག་ནས་བོད་མིའི་མང་གཙོ་འཕེལ་རིམ་དང་འབྲེལ་བོད་མི་མང་སྤྱི་འཐུས་ངོ་སྤྲོད་སྙིང་བསྡུས་དང་། བོད་ནང་གི་ཛ་དྲག་གནས་སྟངས་བྱུང་བཞིན་པ་ཁག་དང་། ཁྱད་པར་དུ་བོད་ནང་དུ་རྒྱ་མིའི་མི་འབོར་སྤོ་ཤུགས་དང་། བོད་ཀྱི་ཁོར་ཡུག སྐད་ཡིག་ཆོས་ལུགས་བཅས་ཉམས་ཆག་འགྲོ་བཞིན་པར་སེམས་ཚབས་དང་རྒྱབ་ལྗོང་ངོ་སྤྲོད་གནང་། རྒྱ་ནག་གཞུང་གིས་བོད་ཐོག་སྲིད་བྱུས་འཛིན་སྟངས་བཅས་ཐོག་བཀའ་མོལ་ལྷུག་པོ་གནང་ཞིང། ལྷག་པར་ཉེ་ཆར་ཀྲུང་དབྱང་ཏང་སློབ་ཀྱི་དགེ་རྒན་ཅིན་ཝེ་ལ་ཧོང་ཀོང་རླུང་སྒྲ་ཞེས་པའི་དུས་དེབ་ནང་བཅའ་འདྲི་སྐབས་ཅིན་ཝེ་ནས་༸གོང་ས་མཆོག་དང་རྒྱ་གཞུང་དབར་ཕྱོགས་གཉིས་ནས་ལྷག་བསམ་དང་། དངོས་འབྲེལ། དགེ་ཚན་ལྡན་པའི་གྲོས་མོལ་གནང་དགོས་པ་དང་ཁོང་སྒེར་གྱི་ངོས་ནས་སླར་ཡང་གྲོས་མོལ་བྱེད་དགོས་སྐོར་གསུངས་པ་ལྟར་ན་དེ་དག་ནི་བཟང་ཕྱོགས་ཀྱི་རྣམ་པ་ཞིག་ལ་ངོས་འཛིན་བྱེད་ཀྱི་ཡོད་སྐོར་སོགས་བརྗོད། སྐབས་དེར་སྐུ་མགྲོན་རྣམ་གཉིས་ཀྱིས་ཐུགས་སྣང་ཧ་ཅང་ཆེན་པོས་བོད་དོན་འཐབ་རྩོད་དང་། བོད་ནང་ཛ་དྲག་གནས་སྟངས་སྐོར་དྲི་བ་གནང་བར་ཚོགས་གཞོན་མཆོག་ནས་བཀའ་ལན་གནང། སྐུ་མགྲོན་རྣམ་གཉིས་ཀྱིས་ཀྱང་བོད་དོན་ཐོག་རྒྱབ་སྐྱོར་མུ་མཐུད་གནང་རྒྱུ༷འི་ཞལ་བཞེས་དང་སྤྱི་ལྷན་སྐུ་ཚབ་ (Brazil) ནང་ཕེབས་ཐུབ་པའི་མགྲོན་འབོད་ཀྱང་གནང་།  དེ་རྗེས་ངོ་བཞུགས་སྤྱི་འཐུས་རྒྱུན་ལས་རྣམ་པ་དང་མཇལ་འཕྲད་འཁྱུག་ཙམ་དང་སྐུ་པར་ལྷན་སྒྲོན་གནང་བ་བཅས་ཀྱི་གནས་བསྡུས་སུ།།

Menu