མིང་། ཆོས་གྲགས་རྒྱ་མཚོ།

༄༅། །༡༩༨༩ ལོའི་ཟླ་ ༠༢ པའི་ཚེས་ ༠༡ ཉིན་མཚོ་སྔོན་གཅན་ཚ་རུ་སྐྱེས་ཏེ་བོད་ནང་དུ་སློབ་ཆུང་ཕྱིན། ༢༠༠༥ ལོར་བཙན་བྱོལ་དུ་འབྱོར་ནས་སུ་ཇཱ་སློབ་གྲྭར་ཞུགས། སློབ་གྲྭའི་དུས་སྐབས་ནས་སློབ་སྦྱོང་ཡག་ཤོས་གྲས་དང་། བོད་ཨིན་གཉིས་ཀྱི་བགྲོ་གླེང་དང་སྙན་རྩོམ་འགྲན་བསྡུར་ཁྲོད་བྱ་དགའ་འང་ཐེངས་མང་བླངས། ༢༠༡༡ ལོར་ཤིང་བཟའ་རིན་པོ་ཆེས་བཀོད་སྒྲིག་འོག་བོད་མིའི་སྒྲིག་འཛུགས་ཁྱབ་ཁོངས་རྒྱ་གར་ནང་སྙན་ངག་གྱེར་འདོན་གྱི་སྡིངས་ཆའི་སྟེང་། འགྲན་ཞུགས་པ་ ༢༧༠ ཁྲོད་རྩེར་སོན་ཨང་རིམ་བཅུའི་ནང་བདམས། ༢༠༡༢ ལོར་བོད་ཁྱིམ་གོ་པལ་པུར་སློབ་ཞུགས་བྱས་ནས་༢༠༡༤ ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བོད་ཁྱིམ་གོ་པལ་པུ་སློབ་གྲྭའི་སློབ་མ་ཡོངས་ལས་ཨང་རིམ་དང་པོ་བླངས། ༢༠༡༤ ལོར་སྐབས་དེའི་རྒྱལ་ས་ལྡི་ལིའི་ཆབ་སྲིད་རིག་པའི་མཐོ་སློབ་རྩེ་ཕུད་ཨང་གསུམ་པ་ (Delhi University- Ramjas) ནང་ཆབ་སྲིད་རིག་པ་( BA. Political Science) སློབ་མཐར་སོན་ཞིང་། དེ་བཞིན་ (Indira Gandhi National Open University- IGNOU) མཐོ་སློབ་ནང་སླར་ཡང་ཆབ་སྲིད་རིག་པ་ (MA. Political Science) སློབ་སྦྱོང་བྱོས།

ལས་ཀའི་ཉམས་མྱོང་།

༢༠༡༦ ལོར་ལྡི་ལིའི་བོད་ཁྱིམ་སྡོད་ཁང་གི་མཐོ་རིམ་སློབ་མ་ཡོངས་ནས་རོ་ཧེ་ནེའི་ས་གནས་གཞོན་ནུའི་དྲུང་ཡིག་ཏུ་བསྐོས། ༢༠༡༦ ལོར་ལྡི་ལིའི་བོད་ཁྱིམ་སྡོད་ཁང་གི་དཔེ་མཛོད་དོ་དམ་པ་བྱས། ༢༠༡༨ ལོར་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་གཞོན་དུ་འདེམས་ཐོན་བྱུང་། ལས་ཡུན་རིང་བོད་དང་རྒྱ་དཀར་ནག་གསུམ་ཀྱི་མཁས་དབང་འདྲ་མིན་གྲངས་ཉི་ཤུ་ལྷག་གདན་ཞུས་ཀྱིས། སྔར་སྲོལ་མེད་པའི་ (དབུ་མའི་ལམ་ཐོག བོད་རིགས་གཞོན་སྐྱེས་བསམ་བློ་བའི་ཚོགས་འདུ།) ཐེངས་དང་པོ་དང་གཉིས་པ་སོགས་ཀྱི་སྦྱིན་བདག་ཟུར་བཙལ་གྱིས་ཚོགས་འདུ་གཙོ་སྐྱོང་དང་། མཐོ་སློབ་སློབ་མ་གྲངས་བརྒྱ་ལྷག་ལ་དབུ་མའི་ལམ་གྱི་སྲིད་བྱུས་ཐོག་ཟབ་སྦྱོང་སོགས་བཀོད་སྒྲིག་གི་གཙོ་འགན་འཁུར། ༢༠༡༩ ལོར་སྐབས་བཅུ་པའི་རྡ་ས་ས་གནས་འཐུས་མིར་བདམས་ཐོན་བྱུང་བ་དང་། ༢༠༢༡ ལོར་སྐབས་ ༡༧ པའི་བོད་མི་མང་སྤྱི་འཐུས་སུ་བདམས་ཐོན་བྱུང་བ་ལྟར་ལས་ཁུར་ཞུ་མུས་ཡིན་པ་བཅས་ཀྱི་ངོ་སྤྲོད་མདོར་བསྡུས་སུ། །