མིང༌། བསྟན་འཛིན་ཆོས་འཛིན། 

གུས་མོ་བསྟན་འཛིན་ཆོས་འཛིན་ནི་དབུས་བོད་མིའི་སྒྲིག་འཛུགས་ཀྱི་བསྟི་གནས་ཆགས་ཡུལ་རྒྱ་གར་བྱང་ཕྱོགས་ཁུལ་གྱི་ས་གནས་དྷ་རམ་ས་ལ་རུ་སྐྱེས་ཤིང་། ཆུང་དུས་བཙན་བྱོལ་ནང་གི་བོད་མིའི་སློབ་གྲྭ་སྔ་ཤོས་ཏེ། དྷ་སྟེང་བོད་ཁྱིམ་སློབ་གྲྭ་ནས་འཛིན་རིམ་བཅུ་པ་དང༌། གོ་པལ་པུར་བོད་ཁྱིམ་ནས་འཛིན་གྲྭ་བཅུ་གཉིས་ཐོན་རྗེས་མཱ་རྡ་ར་སི་ཡི་ཤུའི་མཐོ་སློབ་ (Madras Christian College) ནས་དབྱིན་ཡིག་རྩོམ་ཡིག་ཐོག་ཉེ་བའི་གཙུག་ལག་རབ་འབྱམས་པའི་སློབ་མཐར་སོན། ཁོ་མོའི་དབྱིན་ཡིག་རྩོམ་རིག་ཐོག་གཙུག་ལག་རབ་འབྱམས་པའི་ཕྱག་འཁྱེར་ནེེ་རུ་གཙུག་ལག་སློབ་གཉེར་ཁང་ (Jawaharlal Nehru University) ནས་ཐོབ་ཡོད་ལ། ཁེ་ན་ཌ་ Canada ནང་ཆགས་པའི་ St Fx University གཙུག་ལག་སློབ་གྲྭའི་ (Global Change Leaders program) སློབ་ཟུར་ཡང་ཡིན།

མཐོ་སློབ་འགྲིམ་ཞོར་མཱ་རྡ་ར་སི་བོད་ཕྲུག་ཚོགས་པ་ (Tibetan Student’s Association of Madras) དང་ལྡི་ལི་ནེ་རུ་གཙུག་ལག་སློབ་གཉེར་ཁང་གི་ Tibet Forum ནང་ཧུར་ཐག་གིས་མཉམ་ཞུགས་བྱས་ཡོད།
ལས་རིགས་སྦྱོང་བརྡར་དང་། མདུན་ལམ་སློབ་གསོ། འཛིན་སྐྱོང་བཅས་ཀྱི་ཐད་ལོ་ངོ་བཅུ་ཙམ་གྱི་ཉམས་མྱོང་ལྡན་ཡོད་ལ། དབུས་བོད་མིའི་སྒྲིག་འཛུགས་ཀྱི་བོད་མིའི་མདུན་ལམ་སློབ་སྟོན་ཁང་གི་འགན་འཛིན་གྱི་འགན་འཁུར། དེ་བཞིན་གཞུང་འབྲེལ་མ་ཡིན་པའི་ཚོགས་སྡེ་དབུས་བུད་མེད་ལྷན་ཚོགས་ཀྱི་ལས་འཆར་འགན་འཛིན་ལས་གནས་ཐོག་ཞབས་ཞུ་གྲུབ་མྱོང་། དེས་མ་ཟད་རྒྱ་གར་དང་བོད་མིའི་གཞིས་ཆགས་ཁག་གི་སློབ་གྲྭ་དང་།ལས་རིགས་སྦྱོང་བརྡར་ཚོགས་སྐྱིད་ཁག་གི་མི་སྣ་ ༥༠༠༠ ལྷག གཞན་ཡང་ཕྱི་རྒྱལ་ཡུལ་གྲུཁེ་ན་ཌ་ (Canada) དང་ཨོ་སི་ཀྲེ་ལི་ཡ། (Australia) ཡོ་རོབ་ (Europe) བཅས་ཀྱི་ཚོགས་སྡེ་ཁག་ལ་ཟབ་སྦྱོང་དང་སློབ་སྟོན་ཡང་ཞུས་མྱོང་ཡོད།

ད་ལྟའི་ཆར་འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་གི་སྤྱི་ཁྱབ་འགན་འཛིན་གྱི་ལས་འགན་བཞེས་པའི་ཐོག་མི་རིགས་འདྲ་མིན་ལ་འཚེ་མེད་ཞི་བའི་སྐོར་ཁྱབ་སྤེལ་ཞུ་མུས་དང་། སྐབས་བཅུ་བདུན་པའི་བོད་མི་མང་སྤྱི་འཐུས་ལས་ཐོག་གཞོན་ཤོས་ཀྱང་ཡིན། ད་ལྟ་སྐབས་ ༡༨ པའི་སྤྱི་འཐུས་ཀྱི་ལས་འཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ།