གསལ་བསྒྲགས།

༄༅། །ཀུན་གྱིས་བློ་མངའ་བཞིན། ཕྱི་ལོ་ ༢༠༡༡ ཟླ་ ༩ ཚེས་ ༢༤ ལ་བོད་བརྒྱུད་ནང་བསྟན་གྱི་བླ་ཆེན་ཁག་གི་ཚོགས་འདུར་གོ་བསྡུར་དང་འབྲེལ། གཞིས་བྱེས་བོད་མིས་མཚོན་བོད་བརྒྱུད་ནང་བསྟན་གྱི་རྗེས་འཇུག་ཀུན་དང་། བོད་དང་བོད་མིར་འབྲེལ་ཆགས་འཇིག་རྟེན་སྐྱེ་འགྲོ་ཡོངས་ལ་བཟློ་བའི་ངོས་ཀྱི་བསྒྲགས་གཏམ་གྱི་ནང་ “ འབྱུང་འགྱུར་ཏཱ་ལའི་བླ་མའི་སྐུ་ཕྲེང་རྒྱུན་མཐུད་དགོས་མིན་དད་ལྡན་མང་ཚོགས་ཀྱིས་ཐག་གཅོད་དགོས་པའི་གསལ་བསྒྲགས་ཕྱི་ལོ་ ༡༩༦༩ ཙམ་ནས་བྱས་ཟིན་ ” ཚུལ་དང་། ཡང་ “ ངོས་རང་རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་སོན་སྐབས་ཆོས་བརྒྱུད་བླ་ཆེན་ཁག་དང་བོད་མིས་མཚོན་འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་༸རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་བྱེད་འཆར་ཡིན། ” ཞེས་གསལ་བ་ལྟར། བར་སྐབས་འདི་ནས་དད་ལྡན་མང་ཚོགས་ལ་དམིགས་བསལ་གོ་བསྡུར་བྱ་རྒྱུ་མ་བྱུང་རུང་། འདས་པའི་ལོ་ངོ་བཅུ་བཞིའི་རིང་ཆོས་བརྒྱུད་ཁག་གི་དབུ་འཁྲིད་བླ་ཆེན་རྣམ་པ་དང་། བོད་མིའི་སྒྲིག་འཛུགས་ཀྱི་འཐུས་ཚོགས་དང་དམིགས་བསལ་ཚོགས་ཆེན། འཛིན་སྐྱོང་དང་གཞུང་འབྲེལ་མིན་པའི་ཚོགས་པ་ཁག ཧི་མ་ལ་ཡའི་རི་རྒྱུད། ཆེན་པོ་ཧོར་དང་རུ་སུའི་ཁོངས་ཀྱི་ནང་པའི་ཡུལ་དགོན། རྒྱ་ནག་སྐམ་ས་སོགས་ཀྱི་རྒྱ་རིགས་དང་ཨེ་ཤ་ཡའི་ནང་པའི་རྒྱལ་ཁབ་ཁག་གི་དད་ལྡན་མི་མང་བཅས་ནས་དང་བླང་གིས་༸རྒྱལ་དབང་སྐུ་ཕྲེང་རྒྱུན་མཐུད་དགོས་པའི་མངོན་འདོད་རྒྱུ་མཚན་དང་སྦྲགས་ཏེ་ཡིག་ཐོག་ནས་ཞུ་སྐུལ་ནན་པོ་བྱུང་བ་དང་། ལྷག་པར་དུ་གཞིས་ལུས་བོད་མི་སྤྱི་སྒེར་མང་པོས་ཐབས་ལམ་སྣ་ཚོགས་བརྒྱུད་དེ་ཡིག་ངག་གཉིས་ཐོག་ནས་རེ་སྐུལ་སྔ་རྗེས་འབྱོར་བ་ལྟར།…

  ༄༅། ། ཕྱི་ལོ་ ༢༠༢༥ ཟླ་ ༦ པའི་ཚེས་ ༢༩ ཉིན་གྱི་ཕྱི་དྲོ་ཆུ་ཚོད་ ༣།༠༠ པའི་ཐོག་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཤན་ཏི་ གྱན་ ནི་ཀེ་ཏན་ (Shanti Gyan Niketan School) སློབ་གྲྭར་འཕགས་བོད་འབྲེལ་མཐུད་ཚོགས་པའི་འགན་འཛིན་ལྷན་ཚོགས་ཀྱི་ཚོགས་ཆེན་གྱི་མཇུག་བསྡོམས་མཛད་སྒོ་ཚོགས་ཏེ། ཉིན་གྲངས་གཉིས་རིང་གི་ཚོགས་ཆེན་མཇུག་བསྒྲིལ་བ་དང་། སྐབས་དེར་རྒྱ་གར་མངའ་སྡེ་ཁག་མི་འདྲ་བ་ ༢༢ ནས་ཚོགས་བཅར་བ་འཕགས་བོད་འབྲེལ་མཐུད་ཚོགས་པའི་ཚོགས་མི་ ༡༥༠ ལྷག་མཉམ་ཞུགས་གནང་ཡོད་འདུག སྐབས་དེའི་མཇུག་བསྡོམས་མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་དབང་འདུས་རྡོ་རྗེ་མཆོག་གདན་ཞུས་ལྟར་ཆེད་ཕེབས་ཀྱིས་ཐོག་མར་ཚོགས་ཆེན་ཐོག་ཕེབས་པའི་གནད་ཡོད་སྐུ་མགྲོན་རྣམ་པར་འཚམས་འདྲིའི་མཇལ་དར་དང་། དེ་རྗེས་ཤན་ཏི་ གྱན་ ནི་ཀེ་ཏན་སློབ་གྲྭའི་ཐོག་ནས་སྤྱི་འཐུས་མཆོག་ལ་རྒྱ་གར་ཧིན་དུའི་འཚམས་ཞུའི་མཇལ་དར་དང་། དྲན་རྟེན་ཕྱག་རྟགས་ཕུལ་འདུག…

༄༅། །དེ་རིང་སྟེ་ཕྱི་ལོ་༢༠༢༥ ཟླ་ ༦ ཚེས་ ༢༩ ཉིན། སྔ་འགྱུར་བསྟན་པའི་གསལ་བྱེད་༧སྐྱབས་རྗེ་སྨིན་གླིང་མཁན་ཆེན་རིན་པོ་ཆེ་མཆོག་སྐུ་འཁོར་ལྷན་རྒྱས་སྔ་དྲོ་གདན་ས་འོག་མིན་ཨོ་རྒྱན་སྨིན་གྲོལ་གླིང་ནས་ཆིབས་ཐོན་གྱིས་ཉིན་རྒྱབ་བཞུགས་སྒར་རྡ་རམ་ས་ལར་ཆིབས་བསྒྱུར་བསྐྱངས་སྐབས། ཀངྒ་ར་གྷ་རན་ཌི་རཱ་ཇི་གསོལ་མགྲོན་ཁང་ (Hotel Grand Raj Kangra) དུ་བོད་མི་མང་རྙིང་མའི་སྤྱི་འཐུས་དང་དཔལ་ལྡན་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། མདོ་སྨད་གོ་སྟོན་གོ་སྒྲིག་ཚོགས་ཆུང་གི་ཚོགས་མི་སྤྱི་འཐུས་བློ་བཟང་ཐུབ་བསྟན་མཆོག འདེམས་ལྷན་དྲུང་ཆེ་ལེགས་གྲུབ་ལགས། ཤུགས་གསེབ་བཙུན་དགོན་གྱི་མཁན་རིན་པོ་ཆེ་དང་ལས་སྣེ་རྣམ་པ་སོགས་ཕེབས་བསུར་ཆེད་བཅར་ཞུས་པ་དང་། དེ་ནས་བཞུགས་སྒར་རྡ་རམ་ས་ལའི་མེག་གྷན་སུ་རི་ཡ་གསོལ་མགྲོན་ཁང་ (Hotel Surya) དུ་ཞབས་སོར་བདེ་བར་འཁོད་ཅིང་། སྐབས་དེར་མདོ་སྨད་གོ་སྟོན་གོ་སྒྲིག་ཚོགས་ཆུང་གི་ཚོགས་གཙོ་མཆོག་གིས་གཙོས་པའི་འབྲེལ་ཡོད་ནས་ཕེབས་བསུ་སྣེ་ལེན་ཞུས་གནང་ཡོད། གཞི་རྩའི་༸སྐྱབས་རྗེ་རིན་པོ་ཆེ་མཆོག་བཞུགས་སྒར་རྡ་རམ་ས་ལར་ཆིབས་བསྒྱུར་བཀའ་དྲིན་ བསྐྱངས་དོན་ནི། མདོ་སྨད་ཆོལ་ཁའི་༧སྐུའི་གོ་སྟོན་མཛད་སྒོ་དང་། བཙན་བྱོལ་བོད་མིའི་ཆོས་ཚོགས་ཐེངས་བཅོ་ལྔ་པ། དེ་བཞིན་བོད་མིའི་སྒྲིག་འཛུགས་ཀྱི་༸གོང་ས་མཆོག་ལ་བརྟན་བཞུགས་བསྟར་འབུལ་དང་། ༧སྐུའི་གོ་སྟོན་འཁྲུངས་སྐར་སྲུང་བརྩིའི་མཛད་སྒོ་བཅས་ཀྱི་སླད་ཆེད་ཕེབས་གནང་ཡོད་པ་བཅས།

༄༅། །དེ་རིང་ཕྱི་ལོ་༢༠༢༥ ཟླ་ ༦ ཚེས་ ༢༩ ཉིན་སྟེ། ༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་སྐུ་འཁོར་ལྷན་རྒྱས་ཞོགས་པར་གདན་ས་སྨན་རིའི་གླིང་ནས་ཆིབས་ཐོན་གྱིས་ཉིན་རྒྱབ་བཞུགས་སྒར་རྡ་རམ་ས་ལར་ཆིབས་བསྒྱུར་བསྐྱངས་སྐབས། ཀོང་ར་གསོལ་མགྲོན་ཁང་ (Hotel Grand Raj Kangra) དུ་བོད་མི་མང་གཡུང་དྲུང་བོན་གྱི་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་མཆོག་དང་། སྤྱི་འཐུས་དབྲ་ཙ་བསོད་ནམས་ནོར་བུ་མཆོག འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས། མདོ་སྨད་ཚོགས་གཞོན་དང་གོ་སྟོན་གོ་སྒྲིག་པ་ཨེམ་རྗེ་པ་སངས་སྟོབས་ཆེན་ལགས་དང་མདོ་སྨད་དབུས་རྒྱུན་དྲུང་ཆེ་དཀར་མོ་བསམ་གཏན་ལགས་བཅས་ཀོང་རར་ཕེབས་བསུར་ཆེད་བཅར་ཞུས་པ་དང་། དེའི་སྐབས་སུ་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་རིན་པོ་ཆེ་མཆོག་ལ་མཇལ་བཅར་ཞུས་འདུག དེ་ནས་བཞུགས་སྒར་རྡ་རམ་ས་ལའི་མེག་གྷན་སུ་རི་ཡ་གསོལ་མགྲོན་ཁང་ (Hotel Surya) དུ་ཞབས་སོར་བདེ་བར་འཁོད་གནང་བ་དང་། དེར་ཕེབས་མཚམས་མདོ་སྨད་གོ་སྟོན་གོ་སྒྲིག་ཚོགས་ཆུང་གི་ཚོགས་གཙོ་བཀའ་ཟུར་ཐུབ་བསྟན་ལུང་རིགས་མཆོག་གིས་གཙོས་པའི་བླ་སྤྲུལ་དགེ་བཤེས་དང་། ས་གནས་དད་ལྡན་མི་མང་ནས་ཕེབས་བསུ་སྣེ་ལེན་གཟབ་རྒྱས་ཞུས་ཡོད་པ་བཅས།

༄༅། ། ཕྱི་ལོ་ ༢༠༢༥ ཟླ་ ༦ པའི་ཚེས་ ༢༧ ཉིན་གུང་ཆུ་ཚོད་ ༡།༠༠ པོའི་ཐོག་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༥ རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་སྐུ་འཁོར་དང་བཅས་པ་བཞུགས་སྒར་རྡ་རམ་ས་ལའི་གྷ་གྷལ་གནམ་ཐང་དུ་ཕེབས་འབྱོར་སྐབས། བོད་མི་མང་དགེ་ལུགས་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག་དང་སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་མཆོག བོད་མིའི་སྒྲིག་འཛུགས་ཀྱི་སྐུ་ཚབ་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། གསང་ཆེན་རྒྱུད་གྲྭ་སྟོད་ཀྱི་སྐྱབས་གནས་མཁན་རིན་པོ་ཆེ་མཆོག་གིས་དབུས་པའི་གནས་བརྟན་བགྲེས་སོང་རྣམ་པ། ཕྱག་མཛོད་རྣམ་པ། རྡ་སར་གནས་བཞུགས་འབྲས་སྤུངས་མཁས་མང་བློ་གསལ་གླིང་གྲྭ་ཚང་གི་ཕྱག་མཛོད། མདོ་སྨད་གོ་སྟོན་གོ་སྒྲིག་ཚོགས་ཆུང་གི་ཚོགས་མི་སོགས་ཀྱིས་ཕེབས་བསུའི་སྣེ་ལེན་ཞུས་ཡོད་འདུག གཞི་རྩའི་རིན་པོ་ཆེ་མཆོག་དགའ་ལྡན་ཁྲི་ལ་འཁོད་རྗེས། ཐེངས་དང་པོར་བཞུགས་སྒར་རྡ་རམ་ས་ལར་ཕེབས་འབྱོར་གནང་ཞིང་། དེ་ཡང་ཕྱི་ཟླ་ ༧ པའི་ཚེས་ ༢ ནས་ ༤ བར་བཞུགས་སྒར་དུ་འཚོགས་འཆར་ཡོད་པའི་བཙན་བྱོལ་བོད་མིའི་ཆོས་ཚོགས་ཐེངས་བཅོ་ལྔ་པའི་ཆེད་དུ་ཕེབས་ཡོད་པ་རེད་འདུག

༄༅། །སྦིར་ནང་ཆེན་རིག་གཞུང་ཚོགས་པའི་གོ་སྒྲིག་འོག་ཕྱི་ལོ་ ༢༠༢༥ ཟླ་ ༦ པའི་ཚེས་ ༢༦ ཉིན་སྦིར་ནང་ཆེན་ས་གནས་སུ་༸དཔལ་༸རྒྱལ་བའི་དབང་པོ་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་འགྲོ་འདུལ་འཕྲིན་ལས་དབང་གི་རྡོ་རྗེ་མཆོག་བོད་ལུགས་དགུང་གྲངས་ ༤༡ ལ་ཕེབས་པའི་༸སྐུའི་འཁྲུངས་སྐར་དུས་ཆེན་གྱི་མཛད་སྒོ་ཞིག་སྲུང་བརྩི་ཞུས་གནང་སོང་། སྐབས་དེའི་མཛད་སྒོའི་སྐུ་མགྲོན་གཙོ་བོར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་རྒྱུན་ལས་བསྟན་པ་ཡར་འཕེལ་མཆོག་དང་། སྤྱི་འཐུས་རྒྱུན་ལས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག སྤྱི་འཐུས་རྒྱུན་ལས་སློབ་དཔོན་ཐུབ་བསྟན་རྒྱལ་མཚན་མཆོག སྤྱི་འཐུས་རྒྱུན་ལས་དགེ་བཤེས་ཨ་ཀྲོང་རིན་ཆེན་རྒྱལ་མཚན་མཆོག དེ་བཞིན་སྐུ་མགྲོན་དུ་བོད་ཁམས་བཟོ་ལས་ཚོགས་པའི་ཚོགས་གཙོ་སྡེ་དགེ་སྲས་བྱ་རྒོད་འཆི་མེད་རྡོ་རྗེ་མཆོག བོད་ཁམས་བཟོ་ལས་ཚོགས་པའི་ཚོགས་གཞོན་དང་། ནང་ཆེན་ཚོགས་པའི་ཚོགས་གཙོ་མཆོག་གླིང་སྲས་འཇམ་དབྱངས་རྒྱལ་མཚན་མཆོག ༸དཔལ་རྒྱལ་བ་མདོ་ཁམས་པའི་དྲུང་ཡིག་ཡེ་ཤེས་ཆོས་རྒྱལ་ལགས། དགོན་སྡེ་ཁག་གི་སྐུ་ཚབ་རྣམ་པ། སྦིར་ཁུལ་གྱི་ས་གནས་འགོ་འཛིན་རྣམ་པ་དང་། ས་འཐུས་ཚོགས་གཙོ་རྣམ་པ། སློབ་གྲྭ་ཁག་གི་སློབ་སྤྱི་དང་དགེ་ཆེ་རྣམ་པ། གཞུང་དང་གཞུང་འབྲེལ་མིན་པའི་ཚོགས་པ་ཁག་གི་ལས་སྣེ། ས་གནས་མི་མང་བཅས་ཕེབས་འདུག མཛད་སྒོའི་ཐོག་མར་སྐུ་མགྲོན་གཙོ་བོ་དཔལ་ལྡན་ཚོགས་གཙོ་མཆོག་དང་། དམིགས་བསལ་སྐུ་མགྲོན་བོད་མི་མང་ཆོས་བརྒྱུད་ཁག་གི་སྤྱི་འཐུས་རྒྱུན་ལས་རྣམ་པ་སོགས་ཀྱིས་གཙོས་པའི་སྐུ་མགྲོན་རྣམ་པས། ༸དཔལ་༸རྒྱལ་བའི་དབང་པོ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་སྐུ་པར་མཐོང་གྲོལ་རིན་པོ་ཆེ་ཚོགས་ཁང་ནང་པདྨའི་ཨེ་ཝཱཾ་ཆོས་སྒར་རྟེན་མཆོག་འགྱུར་མེད་གླིང་གི་དགེ་འདུན་པ་རྣམ་པས་སྤོས་སྣེ་དང་བཅས་གདན་ཞུས་ཀྱིས་ཞབས་པད་མི་འཇིགས་གདོང་ལྔས་བཏེགས་པའི་སེངྒེ་ཁྲི་ལ་བཞུགས་སུ་གསོལ་རྗེས། སྐུ་མགྲོན་གཙོ་བོ་དཔལ་ལྡན་ཚོགས་གཙོ་མཆོག་གིས་༸དཔལ་༸རྒྱལ་དབང་ཀརྨ་པའི་སྐུ་པར་མཐོང་གྲོལ་རིན་པོར་ཆེར་མཎྜལ་རྟེན་གསུམ་འདེགས་འབུལ་དང་། རིམ་པས་དམིགས་བསལ་སྐུ་མགྲོན་རྣམ་པ་དང་།…