སྐབས་བཅུ་བདུན་པའི་སྤྱི་འཐུས་རྣམ་པ།

null

ཚོགས་གཙོ།

མཁན་པོ་བསོད་ནམས་བསྟན་འཕེལ་མཆོག
null

ཚོགས་གཞོན།

སྒྲོལ་མ་ཚེ་རིང་མཆོག

ཆོས་ལུགས།

null

རྙིང་མའི་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག
null

རྙིང་མའི་སྤྱི་འཐུས་མཁན་པོ་འཇམ་དཔལ་བསྟན་འཛིན་མཆོག
null

བཀའ་བརྒྱུད་སྤྱི་འཐུས་ཀུན་དགའ་བསོད་སྟོབས་མཆོག
null

བཀའ་བརྒྱུད་སྤྱི་འཐུས་བསྟན་པ་ཡར་འཕེལ་མཆོག
null

ས་སྐྱའི་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་མཆོག
null

ས་སྐྱའི་སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་མཆོག
null

དགེ་ལུགས་སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་མཆོག
null

དགེ་ལུགས་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག
null

གཡུང་དྲུང་བོན་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་མཆོག
null

གཡུང་དྲུང་བོན་སྤྱི་འཐུས་དགེ་བཤེས་སྨོན་ལམ་མཐར་ཕྱིན་མཆོག

དབུས་གཙང་།

null

སྤྱི་འཐུས་སྒྲོལ་མ་ཚེ་རིང་མཆོག
null

སྤྱི་འཐུས་ཟླ་བ་ཕུན་སྐྱིད་མཆོག
null

སྤྱི་འཐུས་མི་འགྱུར་རྡོ་རྗེ་མཆོག
null

སྤྱི་འཐུས་སོག་སྟོད་དངོས་གྲུབ་རྡོ་རྗེ་མཆོག
null

སྤྱི་འཐུས་བློ་བཟང་རྒྱ་མཚོ་སྲི་ཐར་མཆོག
null

སྤྱི་འཐུས་ཚེ་རིང་དབྱངས་ཅན་མཆོག
null

སྤྱི་འཐུས་དོན་གྲུབ་བཀྲ་ཤིས་མཆོག(ཕྱི་ལོ་ ༢༠༢༢ ཟླ་ ༡ ཚེས་ ༢༠ ཉིན་དགོངས་ཞུས།)
null

སྤྱི་འཐུས་རིག་འཛིན་ལྷུན་གྲུབ་མཆོག
null

སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་མཆོག
null

སྤྱི་འཐུས་ཟླ་བ་ཚེ་རིང་མཆོག
null

སྤྱི་འཐུས་བསྟན་འཛིན་ཆོས་འཛིན་མཆོག(ཚབ་གསར། ཕྱི་ལོ་ ༢༠༢༢ ཟླ་ ༢ ཚེས་ ༡ ནས་)

མདོ་སྟོད།

null

སྤྱི་འཐུས་རྡོ་རྗེ་ཚེ་བརྟན་མཆོག
null

སྤྱི་འཐུས་དབུ་དཀར་ཚང་གཡུ་སྒྲོན་མཆོག
null

སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་མཆོག
null

སྤྱི་འཐུས་བསྟན་འཛིན་འཇིགས་བྲལ་མཆོག
null

སྤྱི་འཐུས་གསེར་རྟ་ཚུལ་ཁྲིམས་མཆོག
null

སྤྱི་འཐུས་ཆོས་འཕེལ་ཐུབ་བསྟན་མཆོག
null

སྤྱི་འཐུས་ཚེ་རིང་སྒྲོལ་མ་མཆོག
null

སྤྱི་འཐུས་རྒྱལ་ལྡོང་ཕུར་པ་རྡོ་རྗེ་མཆོག
null

སྤྱི་འཐུས་དཀོན་མཆོག་ཡང་འཕེལ་མཆོག
null

སྤྱི་འཐུས་དབང་འདུས་རྡོ་རྗེ་མཆོག

མདོ་སྨད།

null

སྤྱི་འཐུས་པདྨ་མཚོ་མཆོག
null

སྤྱི་འཐུས་ཙ་ནེ་ཚང་དོན་གྲུབ་བཀྲ་ཤིས་མཆོག
null

སྤྱི་འཐུས་ཚེ་རིང་ལྷ་མོ་མཆོག
null

སྤྱི་འཐུས་གསེར་རྟ་བཀྲ་ཤིས་དོན་གྲུབ་མཆོག
null

སྤྱི་འཐུས་དབྲ་ཙ་བསོད་ནམས་ནོར་བུ་མཆོག
null

སྤྱི་འཐུས་ཀརྨ་དགེ་ལེགས་མཆོག
null

སྤྱི་འཐུས་ཡེ་ཤེས་སྒྲོལ་མ་མཆོག
null

སྤྱི་འཐུས་བློ་བཟང་ཐུབ་བསྟན་མཆོག
null

སྤྱི་འཐུས་དགེ་བཤེས་རྔ་བ་གངས་རི་མཆོག
null

སྤྱི་འཐུས་ཆོས་གྲགས་རྒྱ་མཚོ་མཆོག

ལྷོ་བྱང་ཨ་རི།

null

སྤྱི་འཐུས་བསྟན་འཛིན་འཇིགས་མེད་མཆོག
null

སྤྱི་འཐུས་དོན་གྲུབ་ཚེ་རིང་མཆོག

ཡུ་རོབ་དང་། ཨ་ཕི་རི་ཀ།

null

སྤྱི་འཐུས་ཐུབ་བསྟན་དབང་ཆེན་མཆོག
null

སྤྱི་འཐུས་ཐུབ་བསྟན་རྒྱ་མཚོ་མཆོག

རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སེ་ཀྲེ་ལེ་ཤི་ཡ།

null

སྤྱི་འཐུས་རྡོ་རིང་བསྟན་འཛིན་ཕུན་ཚོགས་མཆོག

སྐབས་བཅུ་བདུན་པའི་སྤྱི་འཐུས་རྣམ་པའི་ལོ་རྒྱུས།

 

མིང༌། ཚོགས་གཙོ་མཁན་པོ་བསོད་ནམས་བསྟན་འཕེལ།

༄༅། །མཁན་པོ་བསོད་ནམས་བསྟན་འཕེལ་ཕྱི་ལོ་ ༡༩༧༤ ལོར་ཁམས་རེ་ཁེ་རུ་སྐྱེས། དེར་སློབ་ཆུང་སློབ་གྲྭར་བསྐྱོད་རྗེས། རྣ་རི་བཀྲ་ཤིས་ཆོས་གླིང་དུ་ཆོས་སྒོར་ཞུགས་ཏེ་སྔོན་འགྲོ་བསགས་སྦྱང་དང་ཆོ་ག་ཕྱག་ལེན་སོགས་ལ་སྦྱངས། ཕྱི་ལོ་ ༡༩༩༣ ལོར་༸གོང་ས་མཆོག་གི་གསེར་ཞལ་མཇལ་རྒྱུའི་སྐལ་བཟང་ཐོབ། ༸སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེའི་ཐུགས་བསྐྱེད་ལས་བྱུང་བ་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་རྣམ་གྲོལ་གླིང་གི་བཤད་གྲྭར་མདོ་རྒྱུད་གོང་འོག་དང་།  ཆོས་འབྱུང་། རྒྱལ་རབས། རིག་གནས་བཅས་ལ་སྦྱང་བརྩོན་གང་ལེགས་བྱས་འབྲས། ༸སྐྱབས་རྗེ་གྲུབ་དབང་རིན་པོ་ཆེའི་དྲུང་ནས་ “མཐའ་བྲལ་སྨྲ་བའི་དབང་ཕྱུག་” དང་། ཕར་ཕྱིན་རབ་འབྱམས་པ་ (Bachelor Degree)” ཞེས་པའི་ལག་འཁྱེར་བཀའ་དྲིན་སྩལ་ཐོབ་བྱུང་། ༸གོང་ས་མཆོག་གི་དྲུང་ནས་ “ངེས་གསང་ལེགས་བཤད་མཛོད་འཆང་ (Master of Buddhist Philosophy)” གི་ལག་འཁྱེར་ཞུ་རྒྱུའི་སྐལ་བཟང་ཐོབ། བཤད་གྲྭར་སྐྱོར་དཔོན་དང་། སློབ་དཔོན་གྱི་མཚན་གནས་རིམ་སྩལ་གྱིས་དགེ་རྒན་གྱི་སྲི་ཞུ་བསྒྲུབས། ཕྱི་ལོ་ ༢༠༠༣ ནས་ལོ་ ༣ རིང་རྣམ་གྲོལ་གླིང་གི་ཚོགས་ཆེན་དགེ་བསྐོས་གྱི་འགན་འཁུར་ཞབས་ཏོག་གང་ལེགས་ཞུས། ཕྱི་ལོ་ ༢༠༡༡ ལོར་མཁན་པོ་མངའ་གསོལ་དང་ཕྱག་འཁྱེར་ “མདོ་རྒྱུད་ངེས་དོན་བསྟན་པའི་སྣང་བྱེད་ཆེན་པོ་ (Doctorate in Buddhist Philosophy)” ལག་འཁྱེར་སྩལ་ཐོབ་བྱུང་ཡོད། ༸གོང་ས་མཆོག་དང་། ༸སྐྱབས་རྗེ་གྲུབ་དབང་རིན་པོ་ཆེ། ༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ། ༸སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ། སྤྲུལ་སྐུ་རྡོ་རྗེ་ཚེ་རིང་རིན་པོ་ཆེ་སོགས་ཀྱི་དྲུང་ནས་དབང་ལུང་ཁྲིད་སོགས་ཞུ་རྒྱུའི་སྐལ་བཟང་ཐོབ། ཕྱི་ལོ་ ༢༠༠༦ ལོར་རྙིང་མའི་ཆོས་བརྒྱུད་ཀྱི་གྲྭ་བཙུན་སྔགས་གསུམ་ནས་རྒྱབ་སྐྱོར་གྱིས་བོད་མི་མང་སྤྱི་འཐུས་སྐབས་ ༡༤ པ་དང་། དེ་རྗེས་སྐབས་ ༡༥།༡༦ པ་བཅས་ལ་རྙིང་མའི་སྤྱི་འཐུས་སུ་འོས་འདེམས་བྱུང་། སྐབས་ ༡༥ པར་སྤྱི་འཐུས་ཚོགས་གཙོ་གཞོན་པ་དང་། སྐབས་ ༡༦ པར་སྤྱི་འཐུས་ཚོགས་གཙོར་འོས་འདེམས་གྱི་ལས་འཁུར་ཞུས། དུས་སྐབས་དེ་དག་གི་རིང་བྱང་ཨ་རི་དང་། ཡུ་རོབ། ཨེ་ཤེ་ཡ་སོགས་ཡུལ་གྲུ་དུ་མར་བཅར་ཏེ་བོད་ཀྱི་ཆོས་དང་། ཆབ་སྲིད། རིག་གཞུང་སོགས་ལ་སྨན་པའི་ཞབས་འདེགས་ལྷོད་མེད་ཞུས། ད་ལྟ་སྐབས་ ༡༧ པའི་ཚོགས་གཙོའི་ལས་ཁུར་ཞུ་བཞིན་ཡོད་པའི་ལོ་རྒྱུས་སྙིང་བསྡུས་སུ།།

 

མིང༌། ཚོགས་གཞོན་སྒྲོལ་མ་ཚེ་རིང་།

༄༅། །གངས་ལྗོངས་ཆོས་སྲིད་གཉིས་ཀྱི་བླ་ན་མེད་པ་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་འཁྲིད་པའི་བཙན་བྱོལ་བོད་གཞུང་དགའ་ལྡན་ཕོ་བྲང་པའི་བཀྲིན་ཉག་ཅིག་ལས་བསླབ་པ་མཐར་སོན་རྗེས་དབྱིན་བོད་གཉིས་ཀྱི་ཐོག་དགེ་རྒན་འོས་སྦྱོང་དང་མཐོ་སློབ་ལེགས་ཐོན་བྱུང་། ༡༽ མི་ལོ་ ༢༦ དགེ་རྒན་གྱི་འགན་ཁུར་ཞུས་འབྲས་ཕྱི་ལོ་ ༢༠༠༠ ལོར་བོད་གཞུང་ཤེས་རིག་ལས་ཁུངས་ནས་མི་ལོ་ ༢༥ མ་འོངས་བོད་ཀྱི་སོན་རྩའི་ཤེས་ཡོན་ཐོག་ཞབས་ཞུ་བསྒྲུབས་པའི་གཟེངས་བསྟོད་ཀྱི་བྱ་དགའ་ཐོབ།

༢༽ ༢༠༠༡ ལོར་ཨ་རིར་ (Fulbright Scholarship) ཐོག་དམིགས་བསལ་དགོས་མཁོ་ཅན་གྱི་ཤེས་ཡོན་ཆེད་ལོ་གཅིག་སློབ་བསྐྱོད་སྐབས་སློབ་སྦྱོང་གི་ཞོར་དུ་རྒྱལ་སྤྱིའི་སློབ་ཕྲུག་རྣམས་ལ་བོད་དོན་གོ་རྟོགས་སྤེལ་རྒྱུའི་གོ་སྐབས་ཐོབ། ༣༽ དབུས་གཙང་དམ་པ་ཆོས་ཀྱི་ཆོལ་ཁའི་དབུས་རྒྱུན་སྐབས་དགུ་པ་དང་བཅུ་པའི་ཚོགས་གཙོའི་འགན་ཁུར་ལོ་ ༦ དང་སློབ་སྟོན་པའི་འགན་ཁུར་ཞུ་མུས། ༤༽ བོད་མི་མང་སྤྱི་འཐུས་སྐབས་བཅུ་གསུམ་པ་དང་བཅུ་བཞི། སྐབས་བཅོ་ལྔ་པ་དང་བཅུ་དྲུག་པ་བཅས་ལ་སྤྱི་འཐུས་སུ་འདེམས་ཐོན་གྱིས་སྤྱི་འཐུས་རྒྱུན་ལས་དང་གྲོས་ཚོགས་ཀྱི་ཚོགས་ཆུང་མང་པོའི་ནང་འགན་ཁུར། དེ་བཞིན་གྲོས་ཚོགས་སྔ་རྗེས་ནང་མང་ཚོགས་ཀྱི་མངོན་འདོད་དང་རེ་འདུན་འཛིན་སྐྱོང་བཀའ་ཤག་ཏུ་སྙན་སེང་གིས་བདེ་སྡུག་སེལ་ཐབས། རང་ཁྲིའི་ཞུ་སྒོ་ས་བགོས་ཕྱོགས་བསྐྱོད་རྒྱ་གར་དང་ཕྱི་རྒྱལ་ཁག་ཏུ་ཆད་ལུས་མེད་པར་བཅར་བསྐྱོད་ཀྱིས་བོད་ཀྱི་ཛ་དྲག་གི་གནས་སྟངས་ཞུ་གཏུགས་ཀྱི་ལས་དོན་རྣམས་རང་ནུས་གང་ཐུབ་ཞུས། ༢༠༢༡ ལོར་སྐབས་ ༡༧ པའི་སྤྱི་འཐུས་ཚོགས་གཞོན་དུ་འདེམས་ཐོན་བྱུང་སྟེ་ཚོགས་གཞོན་གྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། མཁན་པོ་འཇམ་དཔལ་བསྟན་འཛིན།

༄༅། །རྫོགས་ཆེན་མཁན་པོ་འཇམ་དཔལ་བསྟན་འཛིན་ནི་ཤར་མི་ཉག་ནགས་ཕྲན་སྡེ་བ་རུ་སྐྱེས། ཆུང་དུས་ནས་རང་དགོན་ལ་ཞུགས་ནས་མཐོང་བརྒྱུད་དང་། རིག་གནས་སྦྱངས་ཤིང་དེ་གའི་བཤད་གྲྭའི་སྐྱོར་དཔོན་ཡང་བྱས།  དེ་ནས་གསེར་ཐང་བླ་རུང་སྒར་ལ་ཕྱིན་ནས་༸ཆོས་རྗེ་བླ་མའི་མདུན་དབང་ལུང་གདམས་ཁྲིད། མདོ་སྔགས་རིག་གནས་དང་བཅས་པར་སྦྱངས་འབྲས་རྩེ་གྲས་སུ་ཕྱིན་ཏེ་བགྲོ་གླེང་དམ་བཅའ་ཐེངས་གཉིས་དང་། བཀའ་པོད་དམ་བཅའི་བར་སོན། ༸སྐྱབས་རྗེ་པདྨ་སྐལ་བཟང་མཆོག་ནས་སྐྱོར་དཔོན་གྱི་མཚན་གནས་དང་། རྒྱལ་འཕགས་བསྟན་བདག་ནས་མཁན་པོའི་མཚན་གསོལ་གནང་། ༸སྐྱབས་རྗེ་རྫོགས་ཆེན་རིན་པོ་ཆེའི་ཐུགས་རེ་བཞིན་འཕགས་ཡུལ་ཤྲཱི་སེང་བཤད་གྲྭའི་དགེ་རྒན་གནང་རིང་ལོ་རིམ་དགུའི་སློབ་ཚན་ཡོངས་རྫོགས་སློབ་ཁྲིད་བྱས། བཤད་གྲྭའི་འཛིན་རིམ་གོང་འོག་གཏན་འབེབས་དང་། སྒྲིག་གཞི་བསྐྱར་བཅོས། རིམ་པས་རྒྱུན་ལས་ཚོགས་གཙོ། སྐུ་སྒེར་དྲུང་ཡིག རྩོམ་སྒྲིག་འགན་འཛིན། དགོན་པའི་སྤྱི་ཁྱབ་འགན་འཛིན། ཁྱད་པར་ལས་ཐོག་མཁན་རབས་བཞི་པར་མངའ་གསོལ་བ་བཞིན་བསྟན་སྲིད་ཆེད་འགན་ཁུར། རྡོར་གདན་༸ཆོས་རྗེ་བླ་མའི་འདས་མཆོད་སྨོན་ལམ་ཆེན་མོའི་རྒྱུན་ལས་བསྟུད་མར་ཐེངས་གཉིས་བྱས། འབྲེལ་ཡོད་ཉམ་ཐག་རིགས་ལ་སྨན་བཅོས་དང་། འཚོ་སྣོན། སློབ་ཡོན་སོགས་དུས་ནས་དུས་སུ་རོགས་རམ་གནང་།  བརྩམས་དེབ། ས་བཤད་ནོར་བུའི་འཕྲེང་བ་དང་། ལོ་རྒྱུས་ཀུན་གསལ་མེ་ལོང་བཅས་དེབ་འཕྲེང་གཉིས་ཆེད་བརྩམས་གནང་ནས་ཕ་ཡུལ་རང་ནས་འགྲེམ་སྤེལ་མཛད་སྒོ་སྤེལ།  སྐབས་ ༡༦ པའི་རྙིང་མའི་སྤྱི་འཐུས་སུ་འདེམས་ཐོན་བཞིན་ལས་དོན་ཆེ་ཕྲ་གང་ཡིན་འཐུས་ཤོར་མེད་པར་མ་ཟད། འཇིག་ཉེན་ཆེ་བའི་སྐད་ཡིག་རིག་གཞུང་སྐོར་ལ་གཞེན་བསྐུལ་དང་། བགྲོ་གླེང་། གྲོས་ཆོད་བཅས་ཀྱིས་འགན་ཁུར་གཙང་མ་བླང་ཡོད་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང་། ཀུན་དགའ་བསོད་སྟོབས།

༄༅། །སྐབས་ ༡༧ པའི་བཀའ་བརྒྱུད་སྤྱི་འཐུས་དངོས་གཞིའི་འོས་མི་གཏེར་སྒར་ཀུན་དགའ་བསོད་སྟོབས་ནི། ཕྱི་ལོ་ ༡༩༨༠ ཟླ་ ༠༡ ཚེས་ ༠༡ ཉིན་མདོ་ཁམས་སྡེ་དགེ་འཇོ་མདའ་རྫོང་ཁོངས་སུ་སྐྱེས། ཆུང་དུས་ནས་ཕ་ཡུལ་གྱི་སློབ་གྲྭ་ལ་ལོ་མང་རིང་སློབ་སྦྱོང་བྱས། ཕྱིས་སུ་བོད་གཏེར་སྒར་དགོན་དུ་ཆོས་སྒོར་ཞུགས་རྒྱུའི་སྐལ་བཟང་གི་གོ་སྐབས་ཐོབ་ཅིང་། འགྲོ་མགོན་བཀའ་བརྒྱུད་པའི་ཞལ་འདོན་དང་མཐོང་བ་བརྒྱུད་པའི་ཕྱག་ལེན་སོགས་ལ་སྦྱངས་བརྩོན་བྱས།

ཕྱི་ལོ་ ༡༩༩༦ ལོར་རྒྱ་གར་འཕགས་པའི་ཡུལ་ལ་བཙན་བྱོལ་དུ་འབྱོར་ནས་བཀའ་བརྒྱུད་པའི་གདན་ས་ཆེན་མོ་དཔལ་སྤུངས་ཤེས་རབ་གླིང་གི་བཤད་གྲྭར་ཞུགས་ཏེ་ལོ་ངོ་དུ་མའི་རིང་རྒྱལ་བ་བཀའ་བརྒྱུད་པའི་གཞུང་ཆེན་ཁག་ལ་སློབ་སྦྱོང་བྱས། གཞན་ཡང་འཕགས་ཡུལ་ལྷོ་ཕྱོགས་སེར་བྱེས་མཁས་སྙན་གྲྭ་ཚང་དུ་ལོ་ངོ་བཞི་ལྷག་རིང་རི་བོ་དགེ་ལྡན་པའི་གཞུང་ཆེན་ཁག་ལ་སློབ་གཉེར་བྱས་པ་དང་།  ཕྱི་ལོ་ ༢༠༠༧ ལོར་༸སྐྱབས་རྗེ་ཡོངས་དགེ་མི་འགྱུར་རིན་པོ་ཆེའི་བཀའ་མངགས་འོག་གནས་མཆོག་རྡོ་རྗེ་གདན་དུ་གསར་བཞེངས་གནང་བའི་གཏེར་སྒར་དགོན་པའི་སྤྱི་ཁྱབ་འགན་འཛིན་གྱི་ལས་འཁུར་བླངས། དུས་དེ་ནས་བཟུང་ད་ལྟའི་བར་གཏེར་སྒར་དགོན་པའི་སྤྱི་ཁྱབ་འགན་འཛིན་དང་། སྐབས་ ༡༦ པའི་བོད་མི་མང་བཀའ་བརྒྱུད་སྤྱི་འཐུས་དང་། སྐབས་ ༡༧ པའི་སྤྱི་འཐུས་ཀྱི་འགན་ཁུར་ཞུ་མུས་དང་། རང་ནུས་གང་ལྕོགས་ཀྱིས་བོད་བསྟན་སྲིད་མི་རིགས་ལ་སྲི་ཞུ་སྒྲུབ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། བསྟན་པ་ཡར་འཕེལ།

༄༅། །བཀའ་བརྒྱུད་སྤྱི་འཐུས་བསྟན་པ་ཡར་འཕེལ་ནི། ཕྱི་ལོ་ ༡༩༧༩ ལོར་བོད་མདོ་ཁམས་ཆབ་མདོ་རྫ་རྒྱུད་རྒྱ་ཚན་ཞེས་པའི་གྲོང་ཚོར་སྐྱེས་ཤིང་། ཆུང་དུས་དོན་བརྒྱུད་དཔལ་ལྡན་འབྲུག་པའི་གདན་ས་མཚན་ཉིད་དགོན་རྣམ་རྒྱལ་ཆོས་འཁོར་གླིང་དུ་ཆོས་ཞུགས་ཀྱིས་འབྲུག་ལུགས་ཆོས་སྤྱོད་བློ་འཛིན་ནས་བརྩམས་ཏེ་དགོན་པའི་འདོན་རྟ་དབྱངས། འཆམ་གར་སྟབས་སོགས་ལ་སྦྱངས། དེ་རྗེས་༸རྒྱལ་བ་མདོ་ཁམས་པ་ཆེན་པོའི་གདན་ས་ཁམས་པ་སྒར་དཔལ་ཕུན་ཚོགས་ཆོས་འཁོར་གླིང་དང་། གསེར་རྟ་བླ་རུང་ཆོས་སྒར་བཅས་སུ་གཞུང་ཆེན་ཁག་ལ་སློབ་གཉེར་བྱས། ཕྱི་ལོ་ ༢༠༠༡ ལོར་བཙན་བྱོལ་དུ་འབྱོར་ཏེ་རྒྱ་གར་ལྷོ་ཕྱོགས་སེར་བྱེས་མཁས་སྙན་གྲྭ་ཚང་དུ་ཆོས་ཞུགས་ཀྱིས་རི་བོ་དགེ་ལྡན་པའི་གཞུང་ཆེན་རིགས་ལམ་ཁག་ལ་ལོ་མང་རིང་སྦྱང་བརྩོན་བྱས།

ཕྱི་ལོ་ ༢༠༠༤ ལོར་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ། བོད་ཀྱི་ལོ་རྒྱུས་དང་། བརྡ་སྤྲོད། རྩོམ་རིག ནང་ཆོས་བཅས་ལ་ལོ་ངོ་ལྔ་རིང་སྦྱང་བརྩོན་གྱིས་ཕྱི་ལོ་ ༢༠༠༨ ལོར་བསླབ་པ་མཐར་སོན་ཏེ་བོད་གཞུང་ཤེས་རིག་ལས་ཁུངས་ནས་མཐོ་རིམ་རིག་གནས་རབ་འབྱམས་པའི་ཕྱག་ཁྱེར་ཐོབ། ཕྱི་ལོ་ ༢༠༠༩ ནས་ལོ་གསུམ་རིང་རང་གཞུང་ཆོས་རིག་ལས་ཁུངས་སུ་བོད་ཀྱི་ཆོས་བརྒྱུད་ཆེན་པོ་བཞི། གཡུང་དྲུང་བོན་དང་བཅས་པའི་དགོན་སྡེ་ཁག་ ༣༠༠ ལྷག་གི་ལོ་རྒྱུས་དེབ་ཕྲེང་རྩོམ་སྒྲིག་བྱས།

ཕྱི་ལོ་ ༢༠༡༡ ལོར་སྐབས་ ༡༥ པའི་བོད་མི་མང་བཀའ་བརྒྱུད་སྤྱི་འཐུས་སུ་ཐོག་མར་འདེམས་ཐོན་བྱུང་བ་ནས་བཟུང་། ད་ལྟའི་སྐབས་ ༡༦ པའི་བོད་མི་མང་བཀའ་བརྒྱུད་སྤྱི་འཐུས་སུ་མུ་མཐུད་འདེམས་ཐོན་བྱུང་བ་བཅས་ལོ་ངོ་བཅུའི་རིང། གྲོས་ཚོགས་ཚོགས་དུས་གཅིག་ཀྱང་མ་ཆད་པར་གྲོས་ཚོགས་ཀྱི་ལས་རིམ་ཁག་ལ་ཆ་ཤས་བླངས་པ་ཟད། སྐབས་དུས་སོ་སོར་གཞུང་དོན་ས་བགོས་ཕྱོགས་སྐྱོད། རྒྱ་གར་གྱི་དཔོན་རིགས་མཇལ་འཕྲད། གཞན་ཡང་ཨ་རི། ཁེ་ན་ཌ། ཧྥ་རན་སི། སྦེལ་ལྗམ། ཧོ་ལན། སུད་སི། ཨོ་སུ་ཀྲོ་རིས་ཡ་བཅས་སུ་ཆེད་བཅར་གྱིས་བོད་ཀྱི་ཆོས་དང་རིག་གཞུང་ངོ་སྤྲོད། བོད་དོན་བདེན་མཐའ་གསལ་ཐབས་སུ་རང་ནུས་གང་ཡོད་ཀྱིས་ལས་དོན་འགན་འཁུར་ཞུ་མུས་ཐོག་ཕྱི་ལོ་ ༢༠༢༡ ལོར་མུ་མཐུད་སྐབས་ ༡༧ པའི་བོད་མི་མང་སྤྱི་འཐུས་སུ་འདེམས་ཐོན་བྱུང་སྟེ་སྤྱི་འཐུས་རྒྱུན་ལས་ཀྱི་ལས་འགན་བཞེས་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། སློབ་དཔོན་ཐུབ་བསྟན་རྒྱལ་མཚན།

༄༅། །བོད་ཤར་ཕྱོགས་སྨར་ཁམས་སྒང་སྤོམ་མདའ་ཚང་གི་མངའ་འབངས་ལྷ་འདུས་གོ་མོ་ནང་ས་སྲུང་ཚང་གི་ཁྱིམ་རྒྱུད་དུ་སྐྱེས། རང་ལོ་བརྒྱད་ཐོག་དཔལ་ལྡན་ལྕང་མགོ་དགོན་བརྩེ་ཆེན་བཤད་སྒྲུབ་ཐེག་མཆོག་གླིང་དུ་ཆོས་སྒོར་ཞུགས་ནས་དབྱངས་གསལ་ཕྱི་མོ་སྦྱང་འགོ་ཚུགས། རང་ལོ་བཅུ་བཞི་ཐོག་རབ་འབྱམས་པ་སེ་དམུ་དཔལ་ལྡན་གཙོས་པའི་བཤེས་གཉེན་དུ་མའི་ཞབས་རྡུལ་རེག་ནས་བརྡ་དག་དང་ནང་ཆོས་སོགས་ལ་སྦྱང་པ་གནང་། ཕྱི་ལོ་ ༢༠༠༠ ལོར་བཙན་བྱོལ་དུ་འབྱོར་ནས་བྱེས་ཀྱི་དཔལ་ལྡན་ས་སྐྱའི་གདན་ས་རཱཇ་པུར་ས་སྐྱ་ཆོས་སྒར་དུ་འཛུལ་ཞུགས་བྱས། ༸སྐྱབས་མགོན་༸གོང་མ་ཡབ་སྲས་རྣམ་པ་དབུ་བཞུགས་ཐོག་ཕུར་སྒྲུབ་འདོན་པ་ཆེན་པོའི་རྒྱུགས་སྤྲོད་ཕུལ་ནས་ཨང་རིམ་རྩེ་སོན་གྱིས་བྱ་དགའ་ཐོབ། ཕྱི་ལོ་ ༢༠༠༣ ལོར་དཔལ་ས་སྐྱའི་མ་དགོན་བཤད་གྲྭར་ྋསྐྱབས་མགོན་༸གོང་མ་ཁྲི་འཛིན་རིན་པོ་ཆེ་མཆོག་གིས་དབུས་པའི་བཤེས་གཉེན་རྣམ་པའི་དྲུང་ནས་ལོ་ངོ་བཅུ་ལྷག་མདོ་སྔགས་ཀྱི་གཞུང་ཆེན་ཁག་ལ་སྦྱང་པ་བྱས་ནས་བཀའ་བཅུ་པ་དང་སློབ་དཔོན་གནས་རིམ་དང་པོའི་ལག་འཁྱེར་ཐོབ། བཤད་གྲྭའི་དགེ་རྒན་དང་སྐྱོར་དཔོན་གྱི་ལས་འགན་ལོ་བཞིའི་རིང་ཁུར་ནས་གཞུང་ཆེན་ཁག་ལ་འཆད་ཁྲིད་བགྱིས། ཕྱི་ལོ་ ༢༠༡༠ ལོར་དཔལ་ས་སྐྱ་ྋསྐྱབས་མགོན་༸གོང་མ་ཁྲི་ཆེན་རིན་པོ་ཆེ་མཆོག་གིས་ས་སྐྱའི་གཞིས་ཆགས་འཛིན་སྐྱོང་སྐབས་བཅུ་བཞི་པའི་འཐུས་མིར་ཐད་བསྐོས་ཀྱི་ཕྱག་རྟགས་སྤྱི་སྩོལ་བྱུང་བས་ལོ་གསུམ་ཞབས་ཞུ་བསྒྲུབས། ཕྱི་ལོ་ ༢༠༡༤ ནས་ས་སྐྱའི་རྩོམ་སྒྲིག་ཁང་དུ་ཚིག་མཛོད་རྩོམ་སྒྲིག་གི་ལས་དོན་བསྒྲུབས། ཕྱི་ལོ་ ༢༠༡༦ ལོར་སྐབས་བཅུ་དྲུག་པའི་བོད་མི་མང་ས་སྐྱའི་སྤྱི་འཐུས་སུ་འདེམས་ཐོན་བྱུང་སྟེ་སྤྱི་འཐུས་རྒྱུན་ལས་དང་ཚོགས་ཆུང་ཁག་གི་ལས་དོན། ཨ་རི་དང་རྒྱ་གར་གཙོས་པའི་གྲོས་ཚོགས་འཐུས་མི་ཁག་མཇལ་འཕྲད་ཀྱིས་བོད་དོན་ཞུ་གཏུག་སོགས་ཀྱི་ལས་དོན་འཐུས་ཤོར་མེད་པ་བསྒྲུབས། ཕྱི་ལོ་ ༢༠༡༩ ལོར་ྋསྐྱབས་མགོན་༸གོང་མ་རྣམ་གཉིས་ཀྱི་བཀའ་དགོངས་ལྟར་ས་སྐྱའི་ལྷ་སྡེ་མི་སྡེ་ཐུན་མོང་ནས་རྒྱལ་བསྟན་སྤྱི་དང་བྱེ་བྲག་ལ་བཀའ་དྲིན་ལྷག་པར་ཆེ་བའི་༸སྐྱབས་མཆོག་ངོར་ཤར་ཆེན་ཀླུ་ལྡིང་མཁན་ཆེན་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་སྐབས་གོ་སྒྲིག་ཚོགས་ཆུང་གི་ལས་ཁུར་ཞུས་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། མཁན་པོ་ཀཿ བྲག་དངོས་གྲུབ་བསོད་ནམས།

༄༅། །མཁན་པོ་ཀཿབྲག་དངོས་གྲུབ་བསོད་ནམས་ནི་ཁམས་དཀར་ཛེས་ཀཿབྲག་གྲོང་དུ་སྐྱེས། ས་གནས་སློབ་གྲྭ་ནས་མཐོ་སློབ་བར་རིམ་པའི་སློབ་གཉེར་བྱས་ཏེ་སློབ་མཐར་སོན། ༡༩༩༦ ལོར་དཀར་མཛེས་ཟླ་ཐང་མ་ལྟེ་བའི་སློབ་ཆུང་གསུམ་པའི་དགེ་རྒན་བྱས། ༡༩༩༨ ལོར་ཆབ་སྲིད་ཀྱིས་རྐྱེན་རྒྱ་གར་དུ་ཕེབས་ཏེ་དཔལ་རྫོང་གསར་བཤད་གྲྭ་ཆེན་མོར་ཐོས་བསམ་སློབ་གཉེར་བྱས། ༡༩༩༩ ལོར་འཛམ་གླིང་རྒྱལ་སྤྱིའི་པན་གྱི་ཡན་ལག་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་ཆེན་ཐོག་ཞུགས་པ་དང་འཛུལ་ཞུགས་བྱས། ཕྱི་ལོ་ ༢༠༠༠ ལོར་བོད་ཀྱི་རྩོམ་པ་པོའི་མཐུན་ཚོགས་ཀྱི་རྒྱུན་ལས་ཀྱི་འགན་བཞེས། ཕྱི་ལོ་ ༢༠༠༢ ལོར་དབུ་མ་དང་ཚད་མ། མངོན་པ་བཅས་ལ་གསན་སྦྱོང་ཚུལ་བཞིན་དུ་བྱས་ནས་བཀའ་རམས་པའི་ཕྱག་ཁྱེར་ཐོབ། ༢༠༠༥ ལོར་དབུ་མ་དང་ཚད་མ། ཕར་ཕྱིན་དང་མངོན་པ། འདུལ་བ་དང་སྡོམ་གསུམ་གཞུང་ཆེན་བཀའ་པོད་དྲུག་ལ་གསན་སྦྱོང་ཚུལ་བཞིན་བྱས་ནས་བཀའ་བཅུ་པའི་ཕྱག་ཁྱེར་ཐོབ། ༢༠༠༧ ལོར་གཞུང་ཆེན་གྲགས་ཆེན་བཅོ་བརྒྱད་ཆ་ཚང་གསན་སྦྱོང་ཚུལ་བཞིན་དུ་བྱས་ཏེ་རྒྱུགས་སྤྲོད་གནས་རིམ་དང་པོའི་སློབ་དཔོན་གྱི་ཕྱག་ཁྱེར་ཐོབ། ༢༠༠༧ ལོའི་ཟླ་བ་ ༣ པའི་ཚེས་ ༡༢ ཉིན་རྫོང་གསར་གཙུག་ལག་སློབ་གཉེར་ཁང་གི་འཛིན་སྐྱོང་ལྷན་ཚོགས་ནས་སྤྱི་མོས་ཐོག་གཞུང་ལུགས་རབ་འབྱམས་སྨྲ་བའི་མཁན་པོའི་ཅོད་པན་གྱི་མཚན་གནས་གནང་སྟེ་བལ་ཡུལ་ཁྲ་རིགས་བཤད་གྲྭའི་མཁན་པོར་མངའ་གསོལ་ནས་ལོ་ངོ་དྲུག་ཙམ་བཤད་གྲྭའི་ལས་ཐོག་མཁན་པོའི་འགན་འཁུར་བཞེས་པ་སོགས་ལས་གནས་འདྲ་མིན་ཐོག་འགན་འཁུར་ཞུས་མྱོང་། བོད་ཁྱིམ་སློབ་གྲྭར་ལྟ་གྲུབ་སློབ་དཔོན་ལོ་དྲུག་ཙམ་བྱས། སྔ་ཕྱིར་བོད་དང་རྒྱ་གར་བཅས་སུ་དཔར་སྐྲུན་ཟིན་པ་ཕྱག་དཔེ་བཅུ་གསུམ་ཙམ་དང་དཔར་སྐྲུན་མ་བྱས་པ་བཞི་ལྔ་ཙམ་ཡོད་འདུག དྲྭ་ཚིགས་དང་དུས་དེབ་སོགས་སུ་འགྲན་རྩོམ་དང་རྩོམ་རིགས་གང་མང་སྤེལ། སྐབས་བཅུ་དྲུག་པའི་དཔལ་ལྡན་ས་སྐྱའི་སྤྱི་འཐུས་འོས་འདེམས་བྱུང་བ་དང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་དྲུང་ཆེ་དང་། མང་ཚོགས་རྩིས་ཁྲ་ཚོགས་ཆུང་སྐབས་དགུ་པའི་དྲུང་ཆེ། རྒྱུན་ལས་ཀྱི་ཆབ་སྲིད་སྡེ་ཚན། རྒྱུན་འབྲེལ་སྡེ་ཚན། འཛིན་སྐྱོང་སྡེ་ཚན་བཅས་སུ་འགན་འཁུར་བཞེས་ཡོད་པ་མ་ཟད། རྒྱུན་ལས་ཀྱི་འགན་འཁུར་དང་ཁམས་པའི་སྨྱུག་ཚོགས་ཀྱི་ཚོགས་གཙོའི་འགན་འཁུར་ཞུས་མྱོང་བ་དང་། སླར་ཡང་སྐབས་ ༡༧ པའི་བོད་མི་མང་སྤྱི་འཐུས་སུ་འོས་འདེམས་བྱུང་ནས་རྒྱུན་ལས་ཀྱི་འགན་འཁུར་ཞུ་མུས་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ།

༄༅། །སློབ་སྦྱོང་གི་བརྒྱུད་རིམ། ཆུང་དུས་སློབ་ཆུང་འགྲིམས་ཤིང་ཅུང་ན་སོན་དུས་འབའ་རྫིང་དགོན་གྲྭ་ཚང་དུ་ཆོས་ཞུགས་ཀྱིས་འདོད་རྟ་དབྱངས་སོགས་ལ་སློབ་སྦྱོང་གནང་། ༡༩༩༢ ལོར་རྒྱ་གར་ལྷོ་ཕྱོགས་འབྲས་སྤུངས་བློ་གསལ་གླིང་གྲྭ་ཚང་དུ་ཞུགས་ཏེ་ ༢༠༠༩ བར་ལོ་ངོ་བཅུ་ཕྲག་གཉིས་མ་ཟིན་ཙམ་གྱི་རིང་གཞུང་ཆེན་བཀའ་པོད་ལྔ་ལ་སློབ་གཉེར་ཚུལ་བཞིན་བྱས་འབྲས་བཀའ་པོད་ལྔ་སོ་སོའི་རབ་འབྱམས་པའི་ཕྱག་ཁྱེར་ཡང་རིམ་གྱིས་ཐོབ། དེ་ནས་དགེ་ལྡན་ལུགས་བཟང་ཆེས་མཐོའི་གཙུག་ལག་སློབ་གཉེར་ཁང་དུ་འཛུལ་ཞུགས་ཀྱིས་བཀའ་རམས་ལོ་རིམ་གཉིས་དང་། སློབ་དཔོན་ལོ་རིམ་གཉིས། ལྷ་རམས་ལོ་རིམ་གཉིས་རིམ་བཞིན་ལེགས་པར་ཐོན་ཏེ་དགེ་བཤེས་ལྷ་རམས་པའི་དམ་འཇོག་གནང་།

འདས་པའི་ལས་དོན་ཇི་བྱས། ཁང་ཚན་གྱིས་ཚོགས་འདུ་རྒྱས་འཛོམས་ཐོག་རེ་སྐུལ་གྱིས་བསྐོ་བཞག་བྱུང་དོན་ལྟར། ལོ་ངོ་བཞིའི་རིང་སློབ་གཉེར་བའི་དཀའ་སེལ་སླད་གྲྭ་ཤག་དང་ཚོམས་ཆེན་གསར་རྒྱག་སོགས་ཀྱི་ཨར་ལས་ལས་གཞིའི་གཙོ་འགན་ཞུས། མོན་གྷོ་སེར་སྐྱ་གཉིས་ཀྱི་འོས་བསྡུའི་ལམ་ནས་འདེམས་ཐོན་བྱུང་བ་ལྟར་སྐབས་ ༡༧ དང་། ༡༨ ཀྱི་ས་གནས་རང་བཙན་ཚོགས་ཆུང་གི་ཚོགས་གཙོའི་ལས་འགན་ཞུས། མོན་གྷོ་ས་གནས་གྲོས་ཚོགས་སྐབས་ ༧ པའི་དྲུང་གཞོན་དང་སྐབས་ ༨ པ་དང་། ༩ པ་བཅས་ས་གནས་གྲོས་ཚོགས་ཀྱི་ལས་ཁུར་ཞུས། མདོ་ཁམས་སེར་སྐྱ་གཉིས་ཀྱིས་འོས་འདེམས་བྱུང་བ་བཞིན་སྐབས་ ༡༩ དང་སྐབས་ ༢༠ ཆུ་སྒང་དབུས་རྒྱུན་ཀྱི་ལས་ཁུར་ཞུས། སྐབས་དེ་དག་ཏུ་སྐབས་དང་པོའི་ཆུ་སྒང་དགེ་རྩ་ཚོགས་པ་གསར་འཛུགས་དང་འབྲེལ་དེའི་ཚོགས་གཙོ་དང་། རྡ་ས་ཆུ་སྒང་དབུས་ཡན་ལག་ལས་ཁང་གི་འགན་འཛིན་གཅིག་ལྕོགས་བྱས། སྐབས་ ༢༠ པའི་ཆུ་སྒང་དབུས་སྤྱི་ཁྱབ་རྒྱུན་ལས་ཁང་གི་དངུལ་གཉེར་གྱི་ལས་ཁུར་ཞུས།

སྤྱི་འཐུས་ཀྱི་ལས་ཁུར་རིང་ལས་དོན་ཇི་བྱས། ༢༠༡༨ ལོར་གཞིས་བཞུགས་བོད་མིའི་བདེ་སྡུག་ཆེད་རྒྱ་གར་མངའ་སྡེ་ཁག་ལྔའི་བློན་ཆེན་དང་། གྲོས་ཚོགས་ཀྱི་འཐུས་མི། ཆབ་སྲིད་ཚོགས་པ་ཁག་གི་དཔོན་རིགས་རྣམས་ལ་མཇལ་བཅར་གྱིས་བོད་དོན་ཞུ་སྐུལ་གནང་། ༢༠༡༩ ལོར་ལ་ཏི་ཝི་ཡའི་རྒྱལ་ཁབ་ལ་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐོག་མཉམ་ཞུགས་བྱས། ༢༠༡༩ ལོར་ཨ་རིའི་ནིའུ་ཡོག་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་ས་གནས་གཞོན་ནུ་དང་ས་གནས་ཆུ་བཞི་སྒང་དྲུག་གཙོས་ཚོགས་པ་ཁག་གིས་རྒྱ་དམར་གཞུང་བཙུགས་ནས་ལོ་ངོ་ ༧༠ འཁོར་བར་ངོ་རྒོལ་ལས་འགུལ་ཆེན་མོར་མགྲོན་འབོད་ལྟར། དེར་ཆེད་བཅར་གྱིས་གཞིས་བཞུགས་བོད་མིའི་ད་ལྟའི་གནས་སྟངས་དང་མ་འོངས་གཅིག་སྒྲིལ་དགོས་པའི་འབོད་སྐུལ་ཡང་བྱས། ༢༠༡༩ ལོར་གཞིས་བཞུགས་བོད་མིའི་བདེ་སྡུག་ཆེད་ཡུ་རོབ་རྒྱལ་ཁབ་ཧྤ་རན་སི་དང་། སྦེལ་འཇེམ། ཧོ་ལན་ཌི་བཅས་ཀྱི་ནང་གི་གྲོས་ཚོགས་འཐུས་མི་དང་། དཔོན་རིགས་ཁག་ལ་བོད་ནང་གི་ད་ལྟའི་གནས་སྟངས་དང་། པན་ཆེན་ཆུང་སྲིད་རིན་པོ་ཆེས་གཙོས་བོད་ཀྱི་ཆབ་སྲིད་བཙོན་པ་རྣམས་ཀྱི་གནས་སྟངས་དང་། ཆོས་དད་རང་དབང་བཅས་ཀྱི་ཐོག་ཞུ་གཏུགས་བྱས། བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་ ༩ པའི་ཚོགས་མི་དང་། རྒྱུན་ལས་ཀྱི་ལས་ཁུར་ཞུས། ཕྱི་ལོ་ ༢༠༢༡ ལོར་རི་བོ་དགེ་ལུགས་པའི་གྲྭ་བཙུན་གཉིས་ཀྱིས་འདས་པའི་ལས་དོན་རྣམས་གང་ལེགས་བྱུང་བར་ངོས་འཛིན་གྱིས་སླར་ཡང་སྐབས་ ༡༧ པའི་དགེ་ལུགས་སྤྱི་འཐུས་སུ་བདམས་ཐོན་བྱུང་བ་ལྟར། སྐབས་ ༡༧ པའི་སྤྱི་འཐུས་རྒྱུན་ལས་ཀྱི་ལས་ཁུར་ཞུ་མུས་ཡིན་པའི་ལོ་རྒྱུས་སྙིང་བསྡུས་སུ། །

 

མིང༌། དགེ་བཤེས་ལྷ་རམས་པ་ཨ་ཀྲུག་ཚེ་བརྟན།

༄༅། །ཕྱི་ལོ་ ༡༩༧༢ ཟླ་ ༤ ཚེས་ ༡༥ ཉིན་ཕ་ཨ་ཀྲུག་དབང་འདུས་དང༌། མ་རུང་རྒྱས་ཚེ་དབང་སྒྲོལ་མ་གཉིས་ཀྱི་བུ་རུ་སྐྱེས། ༡༩༨༣ ལོར་ལི་ཐང་དགོན་ཆེན་གྱི་ཆོས་སྒོར་ཞུགས་ཏེ་མདོ་སྔགས་གཉིས་ཀྱི་ཕྱོགས་ལ་སྦྱངས་པ་མི་དམན་ཙམ་བྱས། ཕྱི་ལོ་ ༡༩༩༡ ལོར་རྒྱ་གར་ལ་བཙན་བྱོལ་དུ་འབྱོར་ཏེ་འབྲས་སྤུངས་སྒོ་མང་གྲྭ་ཚང་གི་ཆོས་སྒོར་ཞུགས། གཞུང་ལུགས་རབ་འབྱམས་སྨྲ་བའི་དགེ་བའི་བཤེས་གཉེན་དུ་མ་ཚུལ་བཞིན་དུ་བསྟེན་ནས་གཞུང་ཆེན་བཀའ་པོད་ལྔ་ལ་སློབ་གཉེར་མཐར་ཕྱིན་གྱི་གཞུང་ཆེན་སོ་སོའི་གནས་རིམ་དང་པོའི་ལག་འཁྱེར་ཤ་སྟག་ཐོབ། ༢༠༡༡ ལོར་རི་བོ་དགེ་ལུགས་པའི་གྲྭ་བཙུན་གཉིས་ཀྱིས་རྒྱབ་སྐྱོར་ཤུགས་ཆེན་གྱིས་སྐབས་ ༡༥ དང་། སྐབས་ ༡༦ བཅས་སུ་དགེ་ལུགས་སྤྱི་འཐུས་ལ་བདམས། ༢༠༡༤ ལོར་རྒྱལ་སྤྱིའི་དགེ་ལྡན་ལྷན་ཚོགས་ནས་དགེ་ལུགས་ཡོངས་ཀྱི་རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་གྱི་རྒྱུན་ལས་ཚོགས་ཆུང་གི་ཚོགས་གཙོར་བསྐོས། ༢༠༡༥ ལོར་དགེ་ལུགས་རྒྱུགས་སྤྲོད་ཆེན་མོ་ལེགས་པར་གྲུབ་སྟེ་དགེ་བཤེས་ལྷ་རམས་གནས་རིམ་དང་པོའི་མཚན་གནས་ཐོབ། གཞན་ཡང་མོན་གྷོ་མདོ་ཁམས་ས་གནས་ཆུ་བཞི་སྒང་དྲུག་གི་དྲུང་ཆེ་ཟུར་པ། འབྲས་སྤུངས་སྒོ་མང་གྲྭ་ཚང་གི་འཐུས་མི་ཟུར་པ། དགེ་ལུགས་ཡོངས་ཀྱི་རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གི་ཚོགས་ཟུར་དང་། མདོ་ཁམས་ལི་ཐང་དབུས་སྤྱི་ཁྱབ་རྒྱུན་ལས་ཁང་གི་སློབ་སྟོན་པ་དང༌། བོད་མི་མང་དགེ་ལུགས་སྤྱི་འཐུས་བཅས་ཀྱི་ལས་དོན་སྒྲུབ་མུས་ཡིན། སྐབས་དེ་དག་གི་རིང་ལ་༸སྐྱབས་མགོན་དོན་གྱི་བདག་པོའི་བཀའ་དགོངས་དང་མཐུན་པའི་ཕྱོགས་སུ་རང་ནུས་གང་ལྕོགས་ཀྱིས་ལས་དོན་ཆེ་ཕྲ་ཆུང་གསུམ་ཇི་སྙེད་ཅིག་བསྒྲུབས་ཡོད་པ་དང་། ཕྱི་ལོ་ ༢༠༢༡ ལོར་རི་བོ་དགེ་ལུགས་པའི་གྲྭ་བཙུན་གཉིས་ཀྱིས་འདས་པའི་ལས་དོན་རྣམས་གང་ལེགས་བྱུང་བར་ངོས་འཛིན་གྱིས་སླར་ཡང་སྐབས་ ༡༧ པའི་དགེ་ལུགས་སྤྱི་འཐུས་སུ་བདམས་ཐོན་བྱུང་བ་ལྟར།  ༧གོང་ས་མཆོག་གི་བཀའ་དགོངས་བཞིན་བོད་ཀྱི་རྩ་དོན་ཐོག་རང་ནུས་གང་ཐུབ་ཀྱིས་ལས་དོན་བསྒྲུབ་རྒྱུའི་གོ་སྐབས་ཐོབ་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང་། དགེ་བཤེས་ཨ་ཀྲོང་རིན་ཆེན་རྒྱལ་མཚན།

༄༅། །དགེ་བཤེས་ཨ་ཀྲོང་རིན་ཆེན་རྒྱལ་མཚན་ནི་མདོ་ཁམས་ནག་ཆུ་ཧོར་སྦྲ་ཆེན་རྫོང་ཁོངས་སུ་སྐྱེས་ཤིང་ཆུང་ནས་ཡི་གེ་འབྲི་ཀློག་དང་། བརྡ་དག་སྙན་ངག གསོ་བ་རིག་པ། ཆོ་ག་ཕྱག་ལེན་སོགས་སློབ་སྦྱོང་ལོ་མང་རིང་བྱས། ཕྱི་ལོ་ ༢༠༠༥ ལོར་རྒྱ་གར་དུ་འབྱོར་ནས་བགྲང་བྱ་བཅོ་ལྔའི་རིང་དུ་གདན་ས་སྨན་རིར་གཡུང་དྲུང་བོན་གྱི་མདོ་སྔགས་སེམས་གསུམ་གྱི་གཞུང་ཆེན་ཁག་ལ་ཐོས་བསམ་སྒོམ་སྒྲུབ་ཀྱི་སློབ་སྦྱོང་དང་། ཐུན་མོང་རིག་གནས་བརྡ་དག་སྙན་ངག་རྩིས་དཀར་ནག་ཐིག་རྡུལ་ཚོན་སྨན་དང་བཅས་པ་སློབ་སྦྱོང་མཐར་ཕྱིན་ཏེ་ ༢༠༢༠ ལོར་རབ་འབྱམས་དགེ་བའི་བཤེས་གཉེན་གྱི་མཚན་རྟགས་ཐོབ།

ལས་ཀའི་ཉམས་མྱོང་སྐོར། གཡུང་དྲུང་བོན་གྱི་དཔེ་མཛོད་དང་། གཡུང་དྲུང་བོན་གྱི་དྲ་རྒྱ། སྨན་རི་ཚང་གི་རྒྱུན་ལས། སྨན་རིའི་གྲ་ཚང་གི་གཉེར་པ་ཆེན་མོ།   ས་གནས་འཐུས་ཚོགས་ཀྱི་ཚོགས་མི་དང་ཚོགས་གཞོན་བཅས་ལོ་མང་རིང་ལས་ཁུར་ཞུས་ཡོད།  རྒྱལ་སྤྱིའི་ཚོགས་འདུའི་སྐོར། རྒྱལ་སྤྱིའི་བོད་རིག་པའི་བགྲོ་གླེང་ཚོགས་ཆེན་ཁག་དང་། རྒྱལ་སྤྱིའི་བོན་གྱི་བགྲོ་གླེང་དང་། གཞན་ཡང་མཐོ་སློབ་ཁག་ལ་རྒྱལ་རབས་ལོ་རྒྱུས་རིག་གནས་སོགས་བགྲོ་གླེང་གཏམ་བཤད་དུ་མར་བྱས་དང་བྱེད་བཞིན་ཡོད། རྩོམ་རིག་སྐོར།  སྔ་ཕྱིར་དཔྱད་རྩོམ་དེབ་ཕྲེང་གཉིས་དང་། བོན་སྒོ་གཙོས་པའི་བོད་ཕྱི་ནང་གི་དུས་དེབ་དང་དྲ་རྒྱ་སོགས་ལ་རྩོམ་རིགས་སྣ་མང་སྤེལ་མྱོང་ཡོད།

ད་ལྟའི་ལས་གནས། བོད་ཀྱི་བོན་པོའི་ཚོགས་པའི་རྒྱུན་ལས་དང་། ས་གནས་འཐུས་ཚོགས་ཀྱི་ཚོགས་གཞོན། བོན་སྒོ་རྩོམ་སྒྲིག་ཁང་གི་རྩོམ་སྒྲིག་ཚོགས་མི། སྐབས་ ༡༧ པའི་བོད་མི་མང་སྤྱི་འཐུས་བཅས་བྱེད་མུས་ཡིན་པ་བཅས་ཀྱི་ངོ་སྤྲོད་གནད་བསྡུས་སུ།  །

 

མིང་། དགེ་བཤེས་སྨོན་ལམ་མཐར་ཕྱིན།

༄༅། །ཕྱི་ལོ་ ༡༩༦༨ ལོར་བོད་མདོ་ཁམས་ཁྱུང་པོ་སྟེང་ཆེན་དུ་སྐྱེས། ཆུང་དུས་ས་གནས་གྱི་གཞི་རིམ་སློབ་གྲྭར་འགྲིམས། ༡༩༨༤ ལོ་ནས་གཡུང་དྲུང་བོན་སྒོར་ཞུགས་ཏེ་དགོན་སྡེ་ཁག་ནང་གཞུང་ལུགས་སློབ་གཉེར་དང་སྒོམ་སྒྲུབ་ཉམས་ལེན་སོགས་བྱས། ༡༩༩༢ ལོར་རྒྱ་གར་དུ་སྐྱབས་བཅོལ་ལ་ཡོང་། རྒྱ་གར་བྱང་ཕྱོགས་ཧི་མ་ཅལ་ཁོངས་བོན་གཞིས་ཐོབ་རྒྱལ་གསར་པར་༸དཔལ་གཤེན་བསྟན་སྨན་རིའི་གླིང་དུ་གཡུང་དྲུང་བོན་གྱི་མདོ་སྔགས་སེམས་གསུམ་གྱི་གཞུང་ལུགས་ཁག་དང་། ཐུན་མོང་རིག་གནས་བཅས་པར་སྦྱང་བརྩོན་བྱས་པ་དང་། དེའི་རིང་སྨན་རིའི་ཚོགས་ཆེན་དབུ་མཛད་ལོ་དྲུག་བྱས་པ་སོགས་ལས་སྣེ་མང་པོ་ཞིག་གི་ཁུར་བླངས། ༢༠༠༢ ལོར་དགེ་བཤེས་དམ་འཇོག་ཞུས་པ་དང་། སྨན་རིའི་བཤད་སྒྲུབ་འདུས་སྡེའི་རིག་གནས་དགེ་རྒན། བོན་གྱི་བགྲོ་གླེང་འདུས་སྡེའི་ཚོགས་གཙོ། ས་གནས་འོས་བསྡུའི་འཐུས་མི་སོགས་བྱས། ༢༠༠༦ ལོར་སྐབས་ ༡༤ པ་དང་། ༢༠༡༡ ལོར་སྐབས་ ༡༥ པ། ༢༠༡༦ ལོར་སྐབས་ ༡༦ པ་བཅས་ཀྱི་གཡུང་དྲུང་བོན་གྱི་སྤྱི་འཐུས་སུ་རིམ་བཞིན་འོས་འདེམས་ཀྱིས་མུ་མཐུད་རྒྱུན་ལས་བྱས། ༢༠༢༡ ལོར་སླར་ཡང་སྐབས་ ༡༧ པའི་གཡུང་དྲུང་བོན་གྱི་སྤྱི་འཐུས་སུ་འོས་འདེམས་བྱུང་བ་བཞིན་སྤྱི་འཐུས་ཀྱི་ལས་ཁུར་ཞུ་བཞིན་པ་ཡིན། སྤྱི་འཐུས་ཀྱི་ལས་རྒྱུན་རིང་གྲོས་ཚོགས་ཀྱི་ཆེད་འཛུགས་ཚོགས་ཆུང་སོགས་ཚོགས་ཆུང་ཁག་མང་པོའི་ནང་ཚོགས་གཙོ་དང་དྲུང་ཆེའི་ལས་འགན་བླངས་པ་དང་། གྲོས་ཚོགས་ཡོངས་རྫོགས་ལ་ཆད་མེད་བཅར་ཞིང་། བཙན་བྱོལ་བོད་མིའི་གཞིས་ཆགས་ཁག་དང་། རྒྱ་གར་རྒྱལ་ས། ཨ་རི་སོགས་ཕྱི་རྒྱལ་ཡུལ་གྲུ་ཁག་མང་པོར་ཚོགས་འདུ་དང་བོད་དོན་ཞུ་སྐུལ་ལ་ཆེད་བཅར་ཞུས། བསྟན་སྲིད་ཅི་རིགས་དང་འབྲེལ་བའི་ཆེད་རྩོམ་མང་པོ་བོད་ཕྱི་ནང་གཉིས་ཀྱི་དུས་དེབ་དང་དྲ་རྒྱ་ཁག་ཏུ་འགོད་ཐོན་དང་། དེབ་རིགས་མང་པོའི་རྩོམ་སྒྲིག་དང་ཞུ་དག་སོགས་ཀྱི་ལས་དོན་ཞུས་དང་ཞུ་མུས་བཅས་ཀྱི་ལོ་རྒྱུས་སྙིང་བསྡུས་སུ། །

 

 

མིང༌། ཟླ་བ་ཕུན་སྐྱིད།

༄༅། །རྡ་ས་བོད་ཁྱིམ་དུ་སློབ་བཞེས་ཀྱིས་སློབ་གྲྭའི་ནང་སྤྱི་ཁྱབ་རྒན་བདག་གི་འགན་འཁུར་འཐུས་ཚང་ཞུས་པ་དང་། བོད་གཞུང་ཤེས་རིག་ལས་ཁུངས་ནས་སློབ་བུ་རྩེ་ཕུད་ཀྱི་བྱ་དགའ་ཡང་སྩལ་ཐོབ་བྱུང་། འཛིན་རིམ་བཅུ་གཉིས་ཀྱི་རྒྱུགས་སྤྲོད་མཐའ་མ་དེ་ལེགས་འཕྲོད་བྱུང་རྗེས་ (Christian Medical College, Vellore) དང་། (St. John’s Medical College, Bangalore) བཅས་མཐོ་སློབ་གཉིས་ནང་སྨན་ཁང་དང་འཕྲོད་བསྟེན་འཛིན་སྐྱོང་གི་རིག་གནས་ཐོག་སློབ་མཐར་ཐོན་རྗེས། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་བཀའ་འབྲེལ་ལྟར་ ༡༩༨༧།༡།༡ ནས་བདེ་ལེགས་སྨན་ཁང་དུ་འཕྲོད་བསྟེན་འབྲེལ་མཐུད་པ་དང་། འཕྲོད་བསྟེན་ལས་ཁུངས་དབུས་མར་འཕྲོད་བསྟེན་འཆར་འགོད་འགན་འཛིན་གྱི་ལས་ཁུར་ཞུ་བཞིན་པའི་སྐབས།  ༡༩༩༤  ལོར་བདེ་ལེགས་སྨན་ཁང་གི་དྲུང་ཆེར་བསྐོ་གཞག་དང་། དེ་རྗེས་ ༢༠༠༦ ནས་བཟུང་སྨན་ཁང་གི་འགན་འཛིན་དུ་བསྐོ་གཞག་བྱུང་བ་བཞིན་ལས་ཁུར་ཞུ་མུས། དེ་བཞིན་རང་རེའི་སྤྱི་ཚོགས་དང་འབྲེལ་བའི་ཞབས་ཞུའི་ཁོངས་རྡ་ས་ས་གནས་གཞོན་ནུའི་ཚོགས་གཙོ་སྐབས་གཉིས། བོད་རྒྱལ་ཡོངས་དམངས་གཙོ་ཚོགས་པའི་སྤྱི་ཁྱབ་དྲུང་ཆེ། དབུས་གཙང་དབུས་རྒྱུན་ཚོགས་གཞོན་སྐབས་གཉིས། གཞན་ཡང་རྡ་ས་འཕགས་བོད་མཛའ་འབྲེལ་ཚོགས་པའི་ཚོགས་གཞོན་དང་། རྡ་སར་རྒྱལ་སྤྱིའི་ (Rotary Club) ཚོགས་པ་སོ་སོའི་ནང་ལོ་མང་ཞབས་ཞུ་ཞུས་དང་ཞུ་མུས། ད་ཆ་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་འགའི་ནང་འགན་འཛིན་ལྷན་ཚོགས་ཀྱི་ཚོགས་མི་དང་། དབུས་གཙང་སྤྱི་ཁྱབ་ཀྱི་སློབ་སྟོན་པའི་འགན་ཁུར་ཞུ་མུས། དབུས་གཙང་ཆོལ་ཁའི་རྒྱ་ཆེའི་མི་མང་ནས་བོད་མི་མང་སྤྱི་འཐུས་སྐབས་ ༡༣ པ་དང་ ༡༤། ༡༥། ༡༦། ༡༧ བཅས་སོ་སོར་འོས་འདེམས་འགན་ཁུར་ཞུ་མུས་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། མི་འགྱུར་རྡོ་རྗེ།

༄༅། །གུས་མི་འགྱུར་རྡོ་རྗེ་བོད་ལྗོངས་མངའ་རིས་ས་ཁུལ་མཐོ་ལྡིང་དུ་སྐྱེས། བཙན་བྱོལ་དུ་འབྱོར་ཉིད་༸གོང་ས་༸སྐྱབས་མགོན་ཆེན་པོས་དབུ་འཁྲིད་མཛད་པའི་བོད་གཞུང་དང་རྒྱ་གར་གཞུང་གིས་མཐུན་འགྱུར་བཀའ་དྲིན་འོག་གཞི་རིམ་སློབ་གྲྭ་དང་། ཕྱི་ལོ་ ༡༩༧༥ ལོར་མཐོ་སློབ་ཐོན། ༡༩༧༦ ལོར་གཞུང་ཞབས་སུ་ཞུགས། མི་ལོ་ཧྲིལ་པོ་ ༣༧ རིང་གཞུང་གི་ཞབས་ཞུ་ཞུས་པའི་ཁོངས་འགན་ཁུར་ཆེ་གྲས་ཁག  ལ་སྤྱི་དང་། ལྡི་ལི་དོན་ཁང་དྲུང་ཆེ། ༸གོང་ས་༸སྐྱབས་མགོན་ཆེན་པོར་འཆར་འབུལ་ཕྱག་རྟགས་རིན་པོ་ཆེའི་དགོངས་དོན་ ༡༩༩༡ ལོར་ལྡི་ལི་སྐུ་ཚབ་དོན་གཅོད་དུ་བསྐོ་བཞག་དང་། ༡༩༩༥ ལོར་བཀའ་ཤག་གི་ཆབ་སྲིད་དྲུང་ཆེ། ༡༩༩༧ ལོར་ཕྱག་རྟགས་རིན་པོ་ཆེའི་དགོངས་དོན་ཨིན་ལེན་སྐུ་ཚབ་དོན་གཅོད་དང་། དེ་རྗེས་ཡོ་རོབ་སྤྱི་མཐུན་རྒྱལ་ཁབ། ལྷོ་ཨ་ཕི་རི་ཁ་བཅས་རྒྱལ་ཁབ་འདྲ་མིན་ནང་༸རྒྱལ་བའི་སྐུ་ཚབ་དོན་གཅོད་ཀྱི་ལས་འགན་ལོ་ ༡༥ རིང་ཞུས། ཕྱི་ལོ་ ༢༠༠༥ ལོར་འཆར་འབུལ་ཕྱག་རྟགས་རིན་པོ་ཆེའི་དགོངས་དོན་བོད་གཞུང་དགའ་ལྡན་ཕོ་བྲང་པ་ཆེན་པོའི་བཀའ་ཤག་སྐབས་ ༡༢ དང་ ༡༣ བཅས་ནང་བཀའ་དྲུང་གི་འགན་འཁུར་ཞུས། རང་གི་མི་ཚེའི་དྭང་མ་དེ་བོད་གཞུང་མང་གི་ཞབས་འདེགས་སུ་ཕུལ་ཐུབ་པ་དེ་༸རྒྱལ་བ་དགྱེས་པའི་མཆོད་སྤྲིན་དུ་གྱུར་ཡོད་སྙམ་པའི་དགའ་སྤོབས་རྒྱུན་དུ་གནས། ༢༠༡༦ ལོར་དམ་གཙང་དབུས་གཙང་མང་ཚོགས་ཀྱི་ཐུགས་རེ་བཞིན་སྐབས་ ༡༦ པའི་དབུས་གཙང་སྤྱི་འཐུས་སུ་འདེམས་ཐོན་བྱུང་། འདས་པའི་ལོ་བཞི་ལྷག་རིང་མང་ཚོགས་ཀྱི་མངོན་འདོད་དང་རང་གི་དམ་བཅའ་བཅས་དམ་འཛིན་གྱིས་གཙོ་བོ་༸རྒྱལ་བ་རིན་པོ་ཆེའི་མཚན་སྙན་དང་མཛད་འཕྲིན་ལ་ཕྱི་ནང་སུ་ཐད་ནས་དོ་ཕོག་འབྱུང་གཞིའི་རིགས་ལ་དངོས་ཤུགས་བརྒྱུད་གསུམ་ནས་གདོང་ལེན་ཐེ་ཚོམ་མེད་པ་ཞུ་རྒྱུ་དང་། བོད་མིའི་སྒྲིག་འཛུགས་ཀྱི་བསྟན་སྲིད་ལས་དོན་ཐོག་རང་གི་ལོ་མང་ཉམས་མྱོང་ལ་གཞིགས་ཏེ་དགེ་སྐྱོན་ཡོ་བསྲང་དང་ཕྱར་གྲུ་མཉམ་འདེགས་ཞུ་འོས་གྲོས་ཚོགས་ཀྱི་ཕྱི་ནང་གང་བདེའི་ལམ་ནས་ཞུས། དེ་བཞིན་ཁྲིམས་མཐུན་དྲང་བདེན་ལས་འགུལ་རིགས་ལ་རྒྱབ་སྐྱོར་ཞུ་འོས་ཞུས་དང་ཞུ་བཞིན་ཡོད་པ། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། དངོས་གྲུབ་རྡོ་རྗེ།

༄༅། །སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཐུགས་རྗེ་སྐུ་དྲིན་ཉག་ཅིག་ལ་བརྟེན་ནས་དེང་དུས་ཤེས་ཡོན་སློབ་མཐར་འཁྱོལ་རྗེས་ཤི་རི་ཎ་གྷར་དུ་དྲུང་ཡིག་སློབ་སྦྱོང་ཐོན་ཏེ་ལ་སླེལ་བོད་མིའི་གཞིས་ཆགས་མཉམ་འབྲེལ་དུ་ས་གནས་རང་ཁོངས་ལས་བྱེད་ཞབས་ཞུ་འགོ་འཛུགས་ཞུས། དེ་ནས་ཕྱི་ལོ་ ༡༩༨༢ ལོར་གཞུང་ཞབས་སུ་འཚུད་དེ་ལ་དྭགས་སླེལ་བྱང་གཉིས་སུ་བཟོ་འགོ་དང་མཉམ་དྲུང་། ར་སྤུར་མཉམ་ལས་བཟོ་འགོ། སྒང་ཏོག་བདེ་དོན། མོན་གྷོ་ས་གནས་འགོ་འཛིན། ལྷོ་ཕྱོགས་གཞིས་སྤྱི། ནང་སྲིད་ལྷན་ཁང་གི་དྲུང་འཕར་དང་དྲུང་ཡིག་ཆེན་མོ། དེ་ནས་སྤེལ་ལྗམ་དང་སུད་སི་སྐུ་ཚབ་དོན་གཅོད་ཁང་བཅས་སུ་ཐེམ་པ་རིམ་འཛེགས་ཀྱིས་ལོ་ངོ་ ༤༠ ཙམ་ཞབས་ཞུས་རིང་འཛིན་སྐྱོང་སྤེལ་གསུམ་གང་ཅིར་གོང་རིམ་ནས་བསྔགས་བརྗོད་དང་། མི་མང་ནས་ཆེ་མཐོང་གུས་བརྩི། གདེང་འཇོག་ཆེན་པོ་བྱུང་བ་ལ་བརྟེན་ནས་ཕྱི་ལོ་ ༡༩༩༧ ལོར་ལས་བྱེད་རྩེ་ཕུད་གཟེངས་ཐོན་གཟེངས་རྟགས་དང་། ཕྱི་ལོ་ ༡༩༩༨ ལོར་དམིགས་བསལ་གནས་སྤར་སོགས་བསྩལ་ཐོབ་བྱུང་ཡོད།

ཕྱི་ལོ་ ༢༠༢༡ ལོར་བོད་མི་མང་སྤྱི་འཐུས་སྐབས་ ༡༧ འོས་བསྡུ་ཆེན་མོའི་སྐབས་སུ་དབུས་གཙང་རྒྱ་ཆེ་མང་ཚོགས་ནས་ལྷག་བསམ་དང་། ཉམས་མྱོང་། ཤེས་འཇོན་གང་ཅིར་གཞི་བཅོལ་ཏེ་སྤྱི་འཐུས་སུ་འོས་འདེམས་བྱུང་བ་བཞིན་ཕྱི་ལོ་ ༢༠༢༡ ཟླ་ ༦ ཚེས་ ༨ ཉིན་བཅའ་ཁྲིམས་དགོངས་དོན་དམ་འབུལ་ཞུས་འདུག་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང་། བློ་བཟང་རྒྱ་མཚོ་སྲི་ཐར།

༄༅། །གུས་པ་བློ་བཟང་རྒྱ་མཚོ་སྲི་ཐར་ ༡༩༨༢ ལོར་བཞུགས་སྒར་དྷ་རམ་ས་ལར་སྐྱེས། དྷ་སྟེང་བོད་ཕྲུག་ཁྱིམ་སྡེ་ནས་སློབ་གྲྭ་མཐར་ཕྱིན་ཏེ་རྒྱ་གར་ལྷོ་ཕྱོགས་ཅེ་ནཡེ་ ལོ་ཡ་ལ་མཐོ་སློབ་ནས་ (B.Sc. Computer Science) ཀློག་ཀླད་ཚན་རིག་གི་གཙུག་ལག་རབ་འབྱམས་པ་ལེགས་ཐོན་གྱིས་གསེར་གྱི་རྟགས་མ་ཐོབ། གུས་པས་མུ་མཐུད་དེ་དབྱིན་ཡུལ་རྒྱལ་ས་ལོན་ཌོན་མཐོ་སློབ་ནས་མཉེན་ཆས་བཟོ་སྐྲུན་རིག་པའི་ (Software Engineer) སློབ་སྦྱོང་བྱས། དེ་ནས་དྷ་རམ་ས་ལར་ཕྱིར་ལོག་རྗེས་བོད་པའི་སྤྱི་ཚོགས་ནང་དྲ་རྒྱའི་བདེ་འཇགས་ཀྱི་གནད་དོན་དང་འབྲེལ་རྒྱལ་སྤྱིའི་ཉམས་ཞིབ་པ་བྱས་དང་བྱེད་མུས་ཡིན། ༢༠༡༡ ནས་ད་བར་གུས་པ་བོད་དོན་ལས་འགུལ་བསྟི་གནས་ཁང་གི་བརྡ་འཕྲིན་སྲུང་སྐྱོབ་ལས་གཞིའི་འགན་འཛིན་བྱེད་བཞིན་ཡོད། ཉེ་ཆར་ང་རང་དབྱིན་ཡུལ་དུ་རྟེན་གཞི་བྱས་པའི་ (Wired UK) ཞེས་པའི་དུས་དེབ་ཀྱིས་མ་འོངས་པའི་འཛམ་གླིང་དེ་བཟང་ཕྱོགས་སུ་འཁྲིད་ཐབས་ཐད་ཕྱག་ལས་གནང་མཁན་གསར་གཏོད་པ་ ༣༢ ཁོངས་སུ་མིང་འདོན་ཆེ་བསྟོད་བྱུང་ཡོད་པ་མ་ཟད། ཨ་རིའི་ཁད་ལི་ཧྥོར་ནི་ཡའི་བྷར་ཀེ་ལེ་མཐོ་སློབ་ (Berkeley) ནང་ཡོད་པའི་དྲ་རྒྱའི་བདེ་འཇགས་སློབ་སྟོན་པ་ལོ་གཉིས་རིང་ ༢༠༡༨-༢༠ བསྐོ་བཞག་བྱུང་།

ངས་འདས་པའི་ལོ་ངོ་ ༡༠ ལྷག་གཞིས་བོད་དང་འབྲེལ་ཐག་ཉེ་པོའི་ཐོག་ནས་མཉམ་ལས་བྱས་པ་དང་དྲ་རྒྱའི་བདེ་སྲུང་དང་སོ་ལྟ་སོགས་དྲ་རྒྱའི་རང་དབང་དང་འབྲེལ་བའི་བོད་དང་རྒྱལ་སྤྱིའི་གསར་ཁང་གི་འདྲི་རྩད་ཁག་ལ་ལན་འདེབས་བྱས་དང་བྱེད་མུས་ཐོག་རྒྱལ་སྤྱིའི་དྲ་རྒྱའི་རང་དབང་ཚོགས་པ་མང་པོའི་ནང་ལའང་ལས་ཀ་བྱས་པའི་ཉམས་མྱོང་ཡོད་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང་། ཚེ་རིང་དབྱངས་ཅན།

༄༅། །རྒྱ་གར་ལྷོ་ཕྱོགས་སྦེལ་ཀོབ་བདེ་སླར་དང་སློབ་གྲྭ་དབུས་མ་གཉིས་ནས་གཞི་རིམ་སློབ་གཉེར་དང་། ཕྱི་ལོ་ ༡༩༩༠ ལོར་མ་སུ་རི་གཏན་སློབ་ནས་འཛིན་རིམ་བཅུ་གཉིས་ཐོན་རྗེས་མེ་སོར་གཙུག་ལག་སློབ་གཉེར་ཁང་ནས་ལོ་ལྔའི་གཙུག་ལག་རབ་འབྱམས་པ་ (M.A) ས་ཁམས་རིག་པའི་ཐོག་གསེར་གྱི་རྟགས་མ་ (Bhoo-gola Shastra Gold Medal) ཐོབ། དེ་སྐབས་ཧུན་སུར་རྫོང་ཆོས་གྲྭ་ཚང་གི་སྤྱི་ཚོགས་ཞབས་ཞུའི་ཁོངས་དྭང་བླངས་ཐོག་མི་མང་ཉམ་ཐག་ཁག་ཅིག་ལ་ཕན་ཐོགས་ཕྲན་བུ་བསྒྲུབས། ཕྱི་ལོ་ ༡༩༩༦ ལོར་སྦེལ་ཀོབ་དབུས་ཉིན་སློབ་ཏུ་འཛིན་རིམ་དགུ་པ་ནས་བཅུ་གཉིས་བར་དགེ་རྒན་གྱི་ལས་ཚབ་ཞུས། ཕྱི་ལོ་ ༡༩༩༨   ལོར་ཤེས་རིག་བརྒྱུད་ནོར་ཝེ་སློབ་ཡོན་བྱ་དགའ་ལོ་གཉིས་རིང་ཐོབ་སྟེ་ཉེ་བའི་འབུམ་རམས་པ་ (M.Phil) ཐོན། དེའི་རིང་རྒྱལ་སྤྱིའི་ཀྲོན་གྲེམ་མཐུན་ཚོགས་དང་།      བོད་རིགས་མཐུན་ཚོགས་ཀྱི་རྒྱུན་ལས་སོགས་ལས་འགུལ་མང་པོར་མཉམ་ཞུགས་བྱས། སློབ་སྦྱོང་ཐོན་རྗེས་ཕྱི་དྲིལ་ཁོར་ཡུག་ཚན་པའི་ཉམས་ཞིབ་པའི་འགན་བླངས། དེ་སྐབས་ཕྱིའི་རྒྱལ་ཁབ་  (South Korea, Thailand, South Africa, Germany) སོགས་སུ་རང་གཞུང་གི་ངོ་ཚབ་དང་རྒྱ་གར་ནང་དུའང་ལན་མང་མཉམ་ཞུགས་བྱས། ནང་མིའི་དཀའ་སེལ་སླད་དགོངས་པ་ཞུས་རྗེས་གཞིས་ཆགས་སུ་ཕྲུ་གུའི་ཤེས་ཡོན་ཆེད་ཕ་མ་རྣམ་པར་ཕྲུ་གུ་གསོ་སྐྱོང་དང་སློབ་མར་མ་འོངས་མདུན་ལམ་སོགས་གང་འོས་གོ་སྒྲིག་ཞུས་ཏེ་སྤྱི་ཚོགས་ཞབས་འདེགས་ཕྲན་བུ་བསྒྲུབས། སྒེར་ངོས་ཡུ་རོབ་ཏུ་ལན་མང་དང་རང་ཡུལ་བོད་དུའང་བསྐྱོད་མྱོང་། ཕྱི་ལོ་ ༢༠༡༥ ལོར་བོད་མིའི་སྒྲིག་འཛུགས་ཀྱིས་གོ་སྒྲིག་གནང་བའི་ཕ་མའི་ཚོགས་འདུ་དང་ ༢༠༡༩ ལོར་དམིགས་བསལ་ཚོགས་ཆེན་ཐེངས་གསུམ་པར་སྦེལ་ཀོབ་བདེ་སླར་མི་མང་གི་ངོ་ཚབ་ཏུ་ཚོགས་བཅར་ཞུས་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང་། དོན་གྲུབ་བཀྲ་ཤིས།(དགོངས་ཞུས།)

༄༅། །ཁོ་བོའི་མིང་ལ་དོན་གྲུབ་བཀྲ་ཤིས་དང་། སྤྱི་འཐུས་ལས་ཐོག་པ་ཡིན། ཕྱི་ལོ་ ༡༩༧༡ ཟླ་ ༠༦ ཚེས་ ༠༣ ཉིན་ལ་དྭགས་བསོད་ནམས་གླིང་བོད་མིའི་གཞིས་ཆགས་སུ་སྐྱེས། ལ་དྭགས་བོད་ཁྱིམ་སློབ་གྲྭ་དང་དྷ་ས་བོད་ཁྱིམ་སློབ་གྲྭ་བཅས་ནས་གཞི་རིམ་གྱི་སློབ་གཉེར་ཡོངས་སུ་བྱ་རྒྱུའི་གོ་སྐབས་ཐོབ་པ་དང་། དཔལ་འབྱོར་རིག་པའི་སྟེང་གཙུག་ལག་རབ་འབྱམས་པ་དང་། གསར་འགོད་རིག་གནས་དང་དགེ་རྒན་འོས་སྦྱོང་གི་སློབ་གཉེར་མཐར་ཕྱིན་བྱས།

ལོ་བཅུ་བཞིའི་རིང་ལ་དྭགས་བོད་ཁྱིམ་སློབ་གྲྭའི་ནང་དགེ་རྒན་གྱི་ལས་དོན་གྲུབ་པ་དང་། ལོ་གཉིས་རིང་ལ་དྭགས་གླེ་ལམ་སྒྲོན་མཐོ་འབྲིང་སློབ་གཉེར་ཁང་དུ་དཔལ་འབྱོར་རིག་པའི་སྟེང་སློབ་དཔོན་གྱི་ལས་དོན་གྲུབ། ཕྱི་ལོ་ ༢༠༡༠ ལོར་ལ་དྭགས་བོད་མིའི་གཞིས་ཆགས་ཀྱི་མི་མང་གིས་འོས་འདེམས་བྱས་པའི་ས་གནས་འགོ་འཛིན་ཐོག་མའི་སྐབས་འོས་ཐོབ་ (༧༨%) ཐོབ་པ་དང་།  ཕྱི་ལོ་ ༢༠༡༣ ལོར་སླར་ཡང་མི་མང་གིས་སྔར་ལས་ཚད་མཐོའི་རྒྱབ་སྐྱོར་འོག ཐེངས་གཉིས་པའི་སྐབས་འོས་ཐོབ་ (༩༥.༥%) བྱུང་སྟེ། ས་གནས་འགོ་འཛིན་དུ་སྔ་ཕྱིར་བསྐོ་བཞག་བྱས་པ་བཞིན་ལས་དོན་འཐུས་ཚང་རང་ནུས་ཅི་ལྕོགས་ཀྱིས་གྲུབ་ཁུལ་ཡིན། ས་གནས་འགོ་འཛིན་བྱེད་ཞོར་ས་གནས་ཀྱི་འོས་བསྡུའི་འགན་འཛིན་ལོ་དྲུག་དང་། ས་གནས་ཁྲིམས་ཞིབ་པ་ལོ་གཉིས་ལྷག་ཙམ་བྱས། ༸གོང་ས་༸སྐྱབས་མགོན་ཆེན་པོས་དུས་དབང་སོ་གསུམ་པ་བསྩལ་པའི་སྐབས་དུས་དབང་གོ་སྒྲིག་ཚོགས་ཆུང་གི་ཚོགས་མི་ཡང་བྱ་རྒྱུའི་སྐལ་བཟང་གོ་སྐབས་ཐོབ།  ཕྱི་ལོ་ ༢༠༡༦ ལོར་བོད་མི་མང་སྤྱི་འཐུས་ལྷན་ཚོགས་ཀྱི་དབུས་གཙང་ཆོལ་ཁའི་སྤྱི་འཐུས་སུ་བདམས་ཐོན་བྱུང་སྟེ་ལོ་ལྔའི་རིང་ལས་ཁུར་ཧུར་ཐག་ཞུས་ཡོད།  ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། རིག་འཛིན་ལྷུན་གྲུབ།

༄༅། །གཙང་ལ་སྟོད་བྱང་ངམ་རིང་རྫོང་ཚོམ་བུ་ལུང་ཞེས་པར་ཕ་རྡོ་རྗེ་ཚེ་དབང་དང་མ་ལྷ་མོ་ཚེ་རིང་གཉིས་ཀྱི་བུར་ཕྱི་ལོ་ ༡༩༨༤ ཟླ་ ༡༠ པའི་ ༢ ཉིན་སྐྱེས། ཕྱི་ལོ་ ༡༩༩༩ ལོར་བཙན་བྱོལ་དུ་འབྱོར་རྗེས། སུ་ཇཱ་བོད་ཁྱིམ་སློབ་གྲྭ་ནས་འཛིན་གྲྭ་དགུ་པ་བར་གཞི་རིམ་སློབ་སྦྱོང་དང་། དེ་ནས་ཕྱི་ལོ་ ༢༠༠༤ ལོར་ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་ནས་ནང་དོན་རིག་པ་དང་། བོད་ཀྱི་སྐད་ཡིག་དང་རྩོམ་རིག། ལེགས་སྦྱར། དབྱིན་ཇི།  སྲིད་དོན་ཚན་རིག་ཐོག་བཅས་ཤཱསྟྲཱི་དང་། སློབ་དཔོན་ཨྰ་ཅྰ་རྱ་སློབ་མཐར་ཕྱིན།  དེ་རྗེས་མཚན་ཉིད་རིག་པ་དང་ཉམས་ཞིབ་རིག་པའི་ཐོག་ཁྱད་འཕགས་སློབ་དཔོན་ཐོན། ཕྱི་ལོ་ ༢༠༢༠ ལོར་འབུམ་རམས་པའི་ཉམས་ཞིབ་ལེགས་པར་གྲུབ། ཕྱི་ལོ་ ༢༠༠༧-༢༠༠༩  ཝཱཎའི་རིག་རླབས་དུས་དེབ་ཀྱི་རྩོམ་སྒྲིག་ཚོགས་མི། ༢༠༠༧-༢༠༠༩  བོད་ཀྱི་གཞོན་ནུའི་ནང་ཆོས་མཐུན་ཚོགས་ཀྱི་རིག་གཞུང་འགན་འཛིན་དང་།  ༢༠༠༩-༢༠༡༡ ཚོགས་གཙོ། ༢༠༡༡-༢༠༡༢ རྙིང་མའི་སློབ་གཉེར་བདེ་དོན་ལྷན་ཁང་གི་དངུལ་གཉེར། ༢༠༡༠-༢༠༡༤ ཝཱཎ་ས་གནས་འོས་བསྡུ་ལྷན་ཁང་གི་ཚོགས་མི། ༢༠༡༢-༢༠༡༣ ཝཱཎའི་སློབ་གཉེར་བདེ་དོན་ལྷན་ཚོགས་ཀྱི་ཚོགས་གཙོ། ༢༠༡༢-༢༠༡༥ རྒྱལ་སྤྱིའི་ན་གཞོན་གོང་འཕེལ་དང་གཉེར་སྲུང་ཚོགས་པའི་བོད་རིགས་འཐུས་མི། ༢༠༡༣-༢༠༡༤ ཝཱཎ་བོད་ཁྱིམ་སློབ་ཟུར་ཚོགས་པའི་དངུལ་གཉེར། ༢༠༡༣-༢༠༡༤ བོད་རིགས་མཐོ་རིམ་སློབ་མའི་ཚོགས་ཆེན་གྱི་སྤྱི་ཁྱབ་འབྲེལ་མཐུད་པ། ༢༠༡༦ ནས་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་དབུས་རྒྱུན། ༢༠༡༧ ལོར་<བདེན་པ་དང་འཚེ་བ་མེད་པའི་སྦྱོར་བ་ཕྱག་བཞེས་>ཞེས་པའི་དེབ་དབྱིན་སྐད་ནས་བོད་སྐད་ཐོག་བསྒྱུར་ཅིང་དཔར་འགྲེམས་ཞུས་པ་དང་། ཕྱི་ལོ་ ༢༠༢༠ ལོ་ནས་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་བོད་ཀྱི་སྐད་ཡིག་སློབ་དཔོན་གྱི་ཞབས་ཞུ་སྒྲུབ་བཞིན་པ་དང་། དེ་བཞིན་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། ལྷ་རྒྱ་རི་རྣམ་རྒྱལ་སྒྲོལ་དཀར།

༄༅། །ཕྱི་ལོ་ ༡༩༨༦ ལོར་སྐྱེས། བོད་ཁྱིམ་ནས་སློབ་ཐོན་གྱིས་ (Delhi university) དང་ལྡེ་ར་ལྡུན་ (Garhwal University) བཅས་ནས་དབྱིན་ཡིག་རྩོམ་རིག་གི་རིག་གནས་རམས་འབྱམས་པ་དང་གཙུག་ལག་རམས་འབྱམས་པའི་ཐོག་སྦྱང་འབྲས་རྩེར་སོན་གྱིས་བསླབ་པ་མཐར་ཕྱིན། ༢༠༡༢ ལོར་མཐོ་སློབ་གུང་སེང་དང་བསྟུན་བོད་རྒྱལ་ཁབ་དང་མི་རིགས་ཆེད་རང་སྲོག་བློས་གཏོང་གནང་མཁན་རྣམས་ཀྱི་ཆེད་དུ་༸གོང་ས་མཆོག་གི་ཞལ་སྔར་རྟེན་འབུལ་བསྔོ་སྨོན་ཞུས་ཏེ། རྡོ་རྗེ་གདན་ནས་འགོ་བཙུགས་ཏེ་རྒྱ་གར་དང་བལ་ཡུལ་ནང་གི་ནང་པའི་གནས་ཆེན་ཁག་ཏུ་ (བོད་ནང་ཞི་བདེ་དང་རང་དབང་གི་ཆེད་དད་པའི་གོམ་བགྲོད་) ཅེས་པའི་རྒྱང་བསྐྱོད་གོམ་མགྲོད་ལས་འགུལ་སྤེལ། མཐོ་སློབ་ཐོན་རྗེས་ (DBS (PG) College) ལ་དབྱིན་ཡིག་རྩོམ་རིག་སློབ་ཁྲིད་བྱས། ལས་གནས་དེ་བཞག་ནས་བོད་ཀྱི་བུད་མེད་ལྷན་ཚོགས་སུ་བཙན་བྱོལ་བོད་ཀྱི་བུད་མེད་ཀྱི་ཁྲིམས་ལུགས་ནུས་སྟོབས་གོང་སྤེལ་སླད་ལས་གཞིའི་གཙོ་འགན་བླངས་ཏེ་བོད་མིའི་གཞིས་ཆགས་ཁག་ ༡༦ ལྷག་ལ་སྐོར་བསྐྱོད་ཀྱིས་ཟབ་སྦྱོང་སྤྲད།

༢༠༡༣ ལོར་དགུ་བཅུ་གསུམ་གྱི་ཚོགས་ཆེན་ཐོག་སྐབས་དྲུག་པའི་ཚོགས་གཞོན་དུ་འོས་འདེམས་བྱུང་བ་དང་། དེ་རྗེས་སྐབས་བདུན་པའི་ཚོགས་གཙོར་འོས་འདེམས་ཀྱིས་འགན་ཁུར། ༢༠༡༦ ལོར་སྐབས་ ༡༦ པའི་དབུས་གཙང་སྤྱི་འཐུས་སུ་འོས་འདེམས་ཀྱིས་ལས་ཁུར་ཞུ་སྒོ་མཐའ་དག་འཐུས་ཤོར་མེད་པ་ཞུས་པ་དང་། ༢༠༢༡ ལོར་སྐབས་ ༡༧ པའི་དབུས་གཙང་སྤྱི་འཐུས་སུ་འོས་འདེམས་བྱུང་ནས་ལས་ཁུར་ཞུ་བཞིན་པ། དེ་བཞིན་བོད་སོག ཡུ་གུར། ཐེ་ཝན། ཧོང་ཀོང་བཅས་ལས་འདུས་པའི་ (Free Indo-Pacific Alliance) ཚོགས་པའི་ཚོགས་གཞོན་གྱི་འགན་འཁུར་མུས། ད་བར་བོད་དོན་འཐབ་རྩོད་སླད་རྒྱལ་ཁབ་ཕྱི་ནང་གི་ཚོགས་འདུ་དང་ལས་འགུལ་རིགས་མང་པོར་མཉམ་ཞུགས་ཀྱིས་གོ་སྒྲིག་བྱས་པ་དང་། རྒྱ་གར་དང་རྒྱལ་སྤྱིའི་གསར་ལམ་ཁག་ཏུ་བོད་དོན་དང་འབྲེལ་བའི་བགྲོ་གླེང་བཅར་འདྲི་རིམ་པར་ཆ་ཤས་བླངས་དང་ལེན་མུས་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། ཟླ་བ་ཚེ་རིང་།

༄༅། །༡༩༦༣ ནས་ ༡༩༧༧ བར་ཌལ་ཧོར་དང་སིམ་ལ་གཏན་སློབ་ནང་བཅུ་དཔོན་དང་སྤྱི་པའི་རྒན་བདག་དང་ ༡༩༧༧ ཟླ་ ༩ ནས་ ༡༩༨༣ བར་དབུས་གཞོན་ནུའི་ཡིག་ཚང་གི་གད་ཕྱགས་དང་ཡིག་སྐྱེལ། ༡༩༧༩ ནས་ ༡༩༨༦ བར་མེག་གྷན་གཞོན་ནུའི་རུ་དཔོན་དང་རྡ་ས་གཞོན་ནུའི་ས་གནས་རྒྱུན་ལས། ༡༩༨༤ ལོར་ཡོངས་གླིང་སློབ་གྲྭ་དབུ་བཙུགས། ༡༩༨༦ ནས་ ༡༩༩༢ བར་བོད་གཞུང་དབུས་སྨན་རྩིས་ཁང་རྡ་སྟེང་ཡན་ལག་སྨན་ཁང་གི་དངུལ་གཉེར་དང་རྩིས་པ། ༡༩༩༢ ནས་༢༠༠༡ བར་རྡ་ས་ས་གནས་འགོ་འཛིན། ༡༩༩༤ ནས་ ༡༩༩༨ བར་བོད་ཀྱི་རྒྱལ་ཡོངས་མང་གཙོ་ཚོགས་པའི་སྒྲིག་འདོམས་དྲུང་ཆེ། ༡༩༩༦ ལོར་སྤྱི་འཐུས་དང་རྡ་ས་ས་གནས་འགོ་འཛིན་གཉིས་སུ་འོས་འདེམས་བྱུང་ཡང་སྤྱི་འཐུས་ལས་འཁུར་བཞག་ནས་རྡ་ས་བདེ་དོན་ལས་འཁུར་ཞུས།     ༡༩༩༥ ལོར་ཧིན་བོད་མཛའ་འབྲེལ་ཚོགས་པའི་ཚོགས་གཞོན་དང་སློབ་སྟོན་པའི་ལས་འཁུར། ༡༩༩༦ ཕ་མའི་ཚོགས་ཆུང་དབུ་འཛུགས་དང་སློབ་ཕྲུག་བསྐྱེལ་རྒྱུའི་སྣུམ་འཁོར་འཁོ་སྒྲུབ་ཞུས།    ༢༠༠༡ ལོར་གུ་ཇུ་རཌ་མངའ་སྡེར་ས་ཡོམ་བྱུང་སྐབས་བཀའ་འབྲེལ་བཞིན་ས་ཡོམ་ངལ་སྐྱོབ་དྭང་བླང་བའི་འགོ་འཁྲིད་ཟླ་བ་ ༦ རིང་ཞུས། ༢༠༠༥ ནས་ ༢༠༡༢ བར་འདམ་ག་ཚོགས་པའི་ཚོགས་གཙོ། ༢༠༠༡ ནས་ ༢༠༠༦ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཐུགས་བརྩེ་ཆེན་པོའི་ཐད་བསྐོས་སྤྱི་འཐུས་སུ་བཀྲིན་བསྐྱངས། ༢༠༠༦ ནས་ ༢༠༡༡ དང་། ༢༠༡༡ ནས་ ༢༠༡༦། ༢༠༡༦ ནས་ ༢༠༢༡། ༢༠༢༡ ལོར་སྐབས་ ༡༧ པའི་སྤྱི་འཐུས་བཅས་སོ་སོར་དབུས་གཙང་རྒྱ་ཆེ་མི་མང་ནས་སྤྱི་འཐུས་སུ་འོས་འདེམས་བྱུང་བ་བཞིན་མང་ཚོགས་ཀྱི་མངོན་འདོད་དང་ཚོགས་གཙོ་སྦྲེལ་པོའི་བཀོད་མངགས་གང་གནང་ལྟར་འགན་འཁུར་ཞུས་ཡོད། ༢༠༠༢ ནས་ ༢༠༠༤ བར་གཞོན་སྐྱེས་ཚོར་རྒྱལ་ཞེན་གྱི་ལས་འགུལ་སྤེལ། ༢༠༠༣ ལོ་ནས་བཙུན་མ་ལོ་དང་ཤེས་ཚད་གནས་བབ་ཀྱི་བཙུན་དགོན་སྒྲིག་འཛུགས་གང་དུའང་མ་ཚུད་པ་རྣམས་བདག་སྐྱོང་བྱེད་ཆེད་བཙུན་དགོན་བསམ་གཏན་ཆོས་གླིང་བཙུགས། ༢༠༠༣ ལོར་བོད་རིགས་ལས་མེད་ཚོགས་པ་བཙུགས་པ་དང། ༢༠༠༥ ལོར་རྡ་སར་ནང་ཆོས་ངོ་སྤྲོད་ཚོགས་ཆུང་འགོ་འཛུགས་དང། ༢༠༠༥ སྒྲོལ་མ་ཤེལ་ཕྲེང་བཟོ་ལས་ཁང་འགོ་འཛུགས་ཀྱིས་ད་ལྟ་བར་ཆོལ་གསུམ་བོད་རིགས་གསར་འབྱོར་དང་ལས་མེད། ཉལ་ཐག་ཆང་རག་ངན་གོམས་ཀྱི་ནད་པ་བཅས་བོད་མི་བརྒྱ་སྐོར་ལྷག་ལ་ལས་ཀ་སྤྲོད་ཐུབ་པ་བྱུང། ༢༠༠༨ ལོར་དབུ་མའི་ལམ་མི་མང་ལས་འགུལ་ཁང་འགོ་འཛུགས་དང། ༢༠༠༠ ནས་ ༢༠༡༢ བར་ཀུན་ཕན་ལས་ཁང་གི་འགན་འཛིན་ལྷན་ཚོགས་ཀྱི་འཐུས་མི་དང་ ༢༠༡༣ ལོ་ནས་ངེས་སྟོན་པའི་འགན་འཁུར་ཞུ་མུས། ༢༠༡༡ ལོར་ཨིག་ནོ་མཐོ་སློབ་ཡན་ལག་འགོ་འཛུགས་ཀྱིས་ཧིན་བོད་སློབ་མ་ ༣༠༠ ལྷག་སློབ་སྦྱོང་བྱས། ༡༩༩༢ ནས་ ༢༠༡༥ བར་བོད་རིགས་གཞོན་སྐྱེས་ཕོ་མོ་བདག་མེད་དང་ཉལ་ཐག་དང་ཆང་རག་ངན་གོམས་ནད་པ་གཙོས་བོད་མི་དཀའ་ངལ་ཅན་ ༢༥ ལྷག་སོ་སོའི་སར་བདག་སྐྱོང་ཞུས། ༢༠༢༠ ཟླ་ ༨ ཚེས་ ༧ ཉིན་རྡ་ས་ཞི་བདེ་དང་བྱམས་བརྩེ་གོང་འཕེལ་ལས་འགུལ་ཚོགས་ཆུང་འགོ་འཛུགས་དང་དྲུང་ཆེ་ལས་འཁུར་ (Dhasa Peace and Compassion Promotion Group) མདོ་དོན་མི་ལོ་ ༤༣ ཙམ་རིང་ལ་བདག་གི་དྲིན་ཆེན་རྩ་བའི་བླ་མ་སྤྱི་ནོར་༸གོང་ས་༸སྐྱབས་མགོན་ཆེན་པོའི་ཞབས་འོག་ཏུ་བཀའ་དགོངས་འགལ་མེད་རང་ནུས་གང་ཐུབ་ཀྱི་སྤྱི་ཚོགས་ཞབས་ཞུ་བྱ་རྒྱུའི་སྐལ་བཟང་གི་གོ་སྐབས་གནང་ཐོབ་བྱུང་བའི་ལོ་རྒྱུས་སྙིང་བསྡུས་སུ། །

མིང་། བསྟན་འཛིན་ཆོས་འཛིན། (ཚབ་གསར།)

སྤྱི་འཐུས་བསྟན་འཛིན་ཆོས་འཛིན་མཆོག་ནི་ཕྱི་ལོ་ ༡༩༩༢ ཟླ་ ༧ ཚེས་ ༢༧ ཉིན་བཞུགས་སྒར་རྡ་རམ་ས་ལར་འཁྲུངས་ཤིང་། རྡ་སྟེང་བོད་ཕྲུག་ཁྱིམ་སྡེ་ནས་གཞི་རིམ་སློབ་སྦྱོང་དང་། གོ་པལ་པུར་བོད་ཕྲུག་ཁྱིམ་སྡེ་ནས་འཛིན་རིམ་བཅུ་གཉིས་སློབ་མཐར་སོན་རྗེས། རྒྱ་གར་གྲོང་ཁྱེར་ཅི་ནའི་ (Chennai) ནང་རྟེན་གཞི་བྱས་པའི་མ་དྷ་རཱ་སི་ཡེ་ཤུའི་མཐོ་སློབ་ (Madras Christian College) ནས་ཨིན་ཡིག་རྩོམ་རིག་ཐོག་ཉེ་བའི་གཙུག་ལག་རབ་འབྱམས་པ་དང་། རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ནེ་རུ་གཙུག་ལག་སློབ་གཉེར་ཁང་ (JNU) ནས་ཨིན་ཡིག་སློབ་ཚན་ཐོག་གཙུག་ལག་རབ་འབྱམས་པའི་སློབ་མཐར་སོན།

ཕྱི་ལོ་ ༢༠༡༦ ནས་ ༢༠༡༧ བར་དབུས་བོད་ཀྱི་བུད་མེད་ལྷན་ཚོགས་ཀྱི་འཆར་འགོད་འགན་འཛིན་གྱི་འགན་ཁུར་ཞུསཤིང་། ལས་ཀའི་བརྒྱུད་རིམ་ཁྲོད་ཟབ་འཁྲིད་པའི་ཟབ་སྦྱོང་མང་པོ་ཐོབ་ཡོད། ཕྱི་ལོ་ ༢༠༡༧ ནས་ ༢༠༢༠ བར་དབུས་བོད་མིའི་སྒྲིག་འཛུགས་ནང་སྲིད་ལྷན་ཁང་གི་ན་གཞོན་རོགས་སྐྱོར་ཚན་པའི་ཁྱབ་ཁོངས་འོག་ཡོད་པའི་བོད་མིའི་མདུན་ལམ་སློབ་སྟོན་ཁང་གི་འགན་འཛིན་གྱི་འགན་ཁུར་ཞུས་གནང་ཡོད། ད་ལྟ་རྡ་སར་རྟེན་གཞི་བྱས་པའི་འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་དུ་ཕྱག་ལས་གནང་བཞིན་ཡོད།

དེ་བཞིན་བོད་མིའི་སྤྱི་ཚོགས་ལ་ཞབས་འདེགས་ཞུ་རྒྱུའི་འདུན་པ་ཡོད་པའི་ཐོག་བོད་མིའི་འདུ་སྡོད་གཞིས་ཆགས་ཁག་ལ་ཐེངས་མང་ཆེད་བཅར་གྱིས་ན་གཞོན་ནུས་སྟོབས་གོང་འཕེལ་དང་། ལས་འཚོལ་བའི་རྩལ། ཕོ་མོ་འདྲ་མཉམ་སོགས་ཀྱི་སྐོར་ཟབ་སྦྱོང་དང་བགྲོ་གླེང་སོགས་ཀྱི་ལས་གཞི་མང་པོ་བརྩམས་ཐུབ་པ་བྱུང་ཡོད་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། རྡོ་རྗེ་ཚེ་བརྟན།

༄༅། །རྡོ་རྗེ་ཚེ་བརྟན་ནི། བཙན་བྱོལ་བོད་མིའི་ན་གཞོན་འགོ་ཁྲིད་ཅིག་ཡིན། ཁོང་གིས་ལོ་བཅུའི་རིང་རྒྱལ་སྤྱིའི་ཐོག་བོད་དོན་ངོ་སྤྲོད་བྱས་ཏེ། རྒྱ་གར་གཙོས་རྒྱལ་སྤྱིའི་ནང་ནས་མཐོ་རིམ་སློབ་མ་གཙོས་བོད་དོན་རྒྱབ་སྐྱོར་བ་མང་པོ་བཙལ་ཡོད། གླིང་ཕྲན་བཞིའི་རྒྱལ་ཁབ་བཅུ་ལྷག་གི་ནང་སྐོར་བསྐྱོད་བྱས་ཏེ་རྒྱལ་སྤྱིའི་མི་མང་ཁྲོད་དུ་བོད་དོན་ཞི་བའི་འཐབ་རྩོད་བྱེད་སྟངས་སྐོར་ངོ་སྤྲོད་དང་། ལས་འགུལ་སྤེལ་ཕྱོགས་ལ་སྦྱོང་བརྡར་སྤྲད་པ། གཏམ་བཤད་སྤེལ་བ་སོགས་བྱས་ཏེ། བོད་དོན་ཆེད་དོན་ཕན་ལྡན་པའི་ལས་ཀ་བྱེད་ཐུབ་ཀྱི་ཡོད། རྒྱལ་སྤྱིའི་བོད་རང་བཙན་སློབ་ཕྲུག་ཚོགས་པའི་འགན་འཛིན་བྱེད་བཞིན་པ་དང་། བོད་མི་མང་སྤྱི་འཐུས་སྐབས་ ༡༦ དང་། ༡༧ གཉིས་སུ་འདེམས་ཐོན་བྱུང་ཡོད་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

 

མིང༌། དབུ་དཀར་ཚང་གཡུ་སྒྲོན།

༄༅། །གུས་མོ་དབུ་དཀར་ཚང་གཡུ་སྒྲོན་ནི། བོད་མི་མང་སྤྱི་འཐུས་ལས་ཐོག་དང་། ལྡི་ལིར་རྟེན་གཞི་བྱས་པའི་ན་གཞོན་ནུས་སྤེལ་ལས་གཞི་ཚོགས་པའི་གཞི་རྩ་འཛུགས་མཁན་དང་། ད་ལྟ་ཚོགས་པའི་འཛིན་སྐྱོང་དགེ་རྩའི་མ་དངུལ་དོ་དམ་པ་ (Managing Trustee) གནང་མུས་ཡིན།  ཕྱི་ལོ་ ༢༠༠༠ ལོ་ནས་བཟུང་ལོ་བཞིའི་རིང་གུས་མོ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ལས་འཆར་འགན་འཛིན་བགྲེས་པའི་འགན་ཁུར་བཞེས་མྱོང་ཡོད།  དེ་བཞིན་བོད་ཀྱི་བུད་མེད་ལྷན་ཚོགས་ཀྱི་དབུས་རྒྱུན་གནང་མྱོང་ཞིང་ཕྱི་ལོ་ ༡༩༩༤  ནས་ ༡༩༩༦ བར་བུད་མེད་ལྷན་ཚོགས་ནང་ཉམས་ཞིབ་པའི་འགན་ཁུར་ཡང་བཞེས་མྱོང་ཡོད། མདོར་ན་གུས་མོས་ལོ་ ༢༠ ལྷག་རིང་བོད་ཀྱི་རྩ་དོན་དང་བོད་མིའི་སྤྱི་ཚོགས་ལ་ཐད་ཀར་ཞབས་འདེགས་ཞུས་ཡོད།

གུས་མོའི་དོ་སྣང་ཆེ་ཤོས་བྱེད་སའི་གནས་དོན་ནི་མང་གཙོ་དང་འགྲོ་བ་མིའི་ཐོབ་ཐང་། བོད་རྒྱའི་གནད་དོན་དང་རྒྱལ་སྤྱིའི་འབྲེལ་ལམ། བུད་མེད་དང་ན་གཞོན་གྱི་ནུས་སྟོབས། ཤེས་ཡོན་དང་སྤྱི་ཚོགས་ཡར་རྒྱས། སྤྱི་དོན་གཙོ་བོར་བཟུང་སྟེ་ཕྱོགས་རིས་འཐེན་འཁྱེར་མེད་པར་ལས་དོན་མཐའ་དག་དྲང་བཞག་དང་ལྷག་བསམ་རྣམ་དག་གིས་སྒྲུབ་མཁན་ཞིག་ཡིན།  གུས་མོའི་སློབ་སྦྱོང་གི་བརྒྱུད་རིམ་ནང་ཨ་རིའི་ཊ་པ་ས་གཙུག་ལག་སློབ་གཉེར་ཁང་དང་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱེད་པའི་ཇ་ཝ་ཧར་ལླ་ནེ་རུ་གཙུག་ལག་སློབ་གཉེར་ཁང་ནས་རྒྱལ་སྤྱིའི་ཁྲིམས་དང་རྒྱལ་སྤྱིའི་ཆབ་སྲིད་ཐོག་གཙུག་ལག་རབ་འབྱམས་པ་དང་ལེ་ཊི་ཤི་རི་རམ་མཐོ་སློབ་ནས་སྲིད་དོན་ཚན་རིག་ཐོག་ཉེ་བའི་གཙུག་ལག་རབ་འབྱམས་པ་ཐོན་པ། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ངོ་སྤྲོད་ལོ་རྒྱུས་སྙིང་བསྡུས་སུ། །

མིང༌། འཇུ་ཆེན་དཀོན་མཆོག་ཆོས་སྒྲོན།

གུས་མོ་འཇུ་ཆེན་དཀོན་མཆོག་ཆོས་སྒྲོན་ཕྱི་ལོ་ ༡༩༧༢ ལོར་སྦེལ་ཀོབ་གཞིས་ཆགས་སུ་སྐྱེས་ཤིང་། བོད་ཡིག་དང་ཨིན་ཧིན་གསུམ་ལ་སྦྱངས་པ་བྱས་མཐར། ཕ་དམ་པས་བོད་གཞུང་གི་ཐུགས་འགན་རྒྱུན་རིང་བཞེས་པའི་བཀའ་སློབ་ལམ་སྟོན་བཅས་ལ་བརྟེན་བོད་སྤྱི་པའི་སྒྲིག་འཛུགས་དང་། བོད་དོན་བདེན་མཐའ་གསལ་ཐབས་སོགས་ལ་ཞབས་ཕྱི་ཞུ་རྒྱུའི་འདུན་པ་བྱུང་བ་ལྟར། ཕྱི་ལོ་ ༢༠༠༡ ལོར་མདོ་སྟོད་སེར་སྐྱ་མང་ཚོགས་ཀྱིས་སྐབས་ ༡༣ པའི་སྤྱི་འཐུས་སུ་འོས་འདེམས་བྱུང་བ་དང་། དེ་རྗེས་སྐབས་ ༡༤། ༡༥། ༡༦། བཅས་སུ་སྤྱི་འཐུས་ཀྱི་ལས་འཁུར་བླངས་ཏེ། ༸གོང་ས་མཆོག་གི་བཀའ་དགོངས་སྤྱི་དང་། གྲོས་ཚོགས་ནས་ཁྲིམས་སྒྲིག་གཏན་འབེབས་གནང་བའི་དགོངས་དོན་འགལ་མེད་ཉམས་ལེན་ཞུ་རྒྱུའི་དམ་བཅའ་ཕུལ་བ་བཞིན་འཛེམས་ཟོན་ངོ་སྲུང་སྤང་བའི་འགན་འཁུར་གང་ཐུབ་ཞུས།

བཙན་བྱོལ་གཞིས་ཆགས་ཁག་ཏུ་ཕྱོགས་བསྐྱོད་སྐབས་རྒས་ཁོག་ཉམས་ཐག་དང་། སློབ་ཕྲུག་སོགས་ཀྱི་གནས་སྟངས་ལ་རྒྱུས་ལོན་གྱིས་འབྲེལ་ཡོད་ལྷན་ཁང་ཁག་ནས་མཐུན་འགྱུར་སྦྱར་ཐབས་ཞུས། བྱང་ཨ་རི་དང་། ར་ཤི་ཡ། ཨོ་སི་ཏྲོ་ལི་ཡ། རྒྱ་གར་གྱི་རྒྱལ་ས་ལྡི་ལི་སོགས་སུ་ཆེད་བཅར་གྱིས་བོད་དོན་ཞུ་བསྐུལ་བྱས། ཕྱི་ལོ་ ༢༠༡༢ ལོར་ཁེ་ཎ་ཌའི་རྒྱལ་སར་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ལ་མཉམ་ཞུགས་དང་། སྤྱི་འཐུས་རྒྱུན་ལས་ཚོགས་ཆུང་། དམིགས་བསལ་ཚོགས་ཆེན་ཐེངས་དང་པོའི་གོ་སྒྲིག་ཚོགས་ཆུང་། མང་ཚོགས་རྩིས་ཁྲ་ཚོགས་ཆུང་སོགས་ནང་འགན་ཁུར་ཞུས། མདོ་ཁམས་ཆུ་བཞི་སྒང་དྲུག་གི་དབུས་འོས་བསྡུ་ཚོགས་ཆུང་གི་ཚོགས་གཙོ་དང་ཚོགས་མི་བཅས་ཀྱི་འགན་འཁུར་ཐེངས་མང་ཞུས། སྡེ་དགེ་རྒྱལ་ཡོངས་ལྷན་ཚོགས་ཀྱི་ཚོགས་གཞོན་གྱི་ལས་འཁུར་བྱ་མུས་ཡིན། ལྷག་པར་དུ་ལས་དོན་ཐམས་ཅད་ཁྲིམས་ལུགས་ཁོ་ནའི་དབང་བསྒྱུར་འོག་བསྐྱོད་ཐབས་དང་། བསྒྲུབ་བྱའི་དམིགས་ཡུལ་གཙོ་བོ་ནི་བོད་དོན་བདེན་མཐའ་གསལ་ཐབས་སོགས་ཀྱི་ཕྱིར་དུ་བོད་མིའི་སྒྲིག་འཛུགས་གཞུང་མང་ནུས་པ་གཅིག་འདུས་དགོས་གནད་ཆེ་བར་ངོས་འཛིན་དང་། ད་བར་གྱི་ཉམས་མྱོང་བཅས་ལ་བརྟེན་འབད་བརྩོན་ཞུ་སེམས་ཡོད་ལགས་ན། སྐབས་ ༡༧ པའི་སྤྱི་འཐུས་ཀྱི་འགན་འཁུར་ཞུ་མུས་ཡིན། མདོ་སྟོད་རྒྱ་ཆེའི་སེར་སྐྱ་མང་ཚོགས་ནས་སྔར་བཞིན་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། བསྟན་འཛིན་འཇིགས་བྲལ།

༄༅། །བསྟན་འཛིན་འཇིགས་བྲལ་ནི། རྡ་ཤོད་དང་རྡ་སྟེང་བོད་ཁྱིམ་སློབ་གྲྭ་ནས་གཞི་རིམ་སློབ་གྲྭ་འགྲིམ་རྗེས། དབྱིན་ཡུལ་གྱི་ (Sussex Coast College) ནས་སློབ་མཐར་སོན། ཕྱིར་ལོག་སྟེ་རྒྱ་གར་ལྷོ་ཕྱོགས་མ་དྷ་ར་སི་གཙུག་ལག་སློབ་གྲྭ་ཆེན་མོ་ནས་གློག་ཀླད་ཚན་རིག་གི་གཙུག་ལག་རབ་འབྱམས་པ་ཐོན། དེའི་རྗེས་དབྱིན་ཡུལ་གྱི་ (London Metropolitan) གཙུག་ལག་སློབ་གྲྭ་ཆེན་མོ་ནས་ཀྱང་གློག་ཀླད་ཚན་རིག་གི་ཆེད་ལས་སློབ་སྦྱོང་བྱས། རྒྱལ་སྤྱིའི་འཚེ་མེད་ཞི་བའི་འཐབ་རྩོད་བསྟི་གནས་ (International Center on Nonviolent Conflict) ཀྱི་ཨ་རིའི་ (Tufts) གཙུག་ལག་སློབ་གྲྭའི་ (Fletcher School of Law &  Diploma-cy) ནང་འཚེ་མེད་ཞི་བའི་ལས་འགུལ་སློབ་སྦྱོང་ཆེད་བསྐྱོད། སུད་སི་ཇི་ནེ་ཝར་ (International Service for Human Rights) འགྲོ་བ་མིའི་ཐོབ་ཐང་དང་འབྲེལ་བའི་ཟབ་སྦྱོང་ཞུས། ཡུ་རོབ་སི་པེན་རྟེན་གཞི་བྱས་པའི་ (ULEX Project)  ལས་འཆར་ཁང་དུ། སྤྱི་ཚོགས་ལས་འགུལ་ཆེད་སྦྱོང་བརྡར་བྱས། དབྱིན་ཡུལ་བོད་རང་བཙན་སློབ་ཕྲུག་ཚོགས་པའི་འགན་འཛིན་ལོ་ ༣ རིང་བྱས་པ་     དང་། དེ་རྗེས་མུ་མཐུད་རྒྱ་གར་དུ་ལོ་ ༣ རིང་བོད་རང་བཙན་སློབ་ཕྲུག་ཚོགས་པའི་ལས་འཆར་འགན་འཛིན་བྱས། བོད་དོན་ལས་འགུལ་བསྟི་གནས་ཁང་དུ་ལོ་ ༢ རིང་སློབ་སྟོན་པ་བྱས། ད་ལྟའི་ཆར་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་འགན་ཁུར་དེ་ལོ་ ༨ འགྲོ་བཞིན་ཡོད་པ་དང་། དེ་བཞིན་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། གསེར་རྟ་ཚུལ་ཁྲིམས།

གསེར་རྟ་ཚུལ་ཁྲིམས་ནི། ཁམས་གསེར་རྟ་རུ་སྐྱེས་ཤིང། རང་ལོ་ ༦ ནས་ས་གནས་སུ་གཞི་རིམ་སློབ་གྲྭར་སློབ་སྦྱོང་དང་། རགས་བཀྲམ་བྱམས་པ་གླིང་དང་གསེར་རྟ་བླ་རུང་ཆོས་སྒར་སོགས་ནས་བོད་ཀྱི་ཐུན་མོང་བརྡ་དག སྙན་ངག རྩིས། ལྷ་བྲིས་སོགས་དང༌། ཐུན་མིན་ནང་པ་སངས་རྒྱས་པའི་གཞུང་ཆེན་ཁག་ལ་སྦྱང་བརྩོན་བྱས།

ཕྱི་ལོ་ ༡༩༩༨ ལོར་བཙན་བྱོལ་དུ་ཡོང་ནས་ཟླ་ཤས་རིང་གསོག་སློབ་ཏུ་སློབ་སྦྱོང་དང༌། དེའི་རྗེས་སུ་བོད་གཞུང་ཆོས་རིག་ལས་ཁུངས་དང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་རྩོམ་སྒྲིག་ཞིབ་འཇུག་གི་ལས་ཀ་བྱས།

ཕྱི་ལོ་ ༢༠༠༣ ལོར་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གསར་འཛུགས་ཀྱིས་ད་བར་མི་ལོ་བཅོ་བརྒྱད་རིང་འགན་འཛིན་དང༌། བདུན་རེའི་གསར་ཤོག་<<བོད་ཀྱི་བང་ཆེན་>>དང་། བོད་ཀྱི་བང་ཆེན་དྲ་རྒྱ་བཅས་ཀྱི་སྤྱི་ཁྱབ་རྩོམ་སྒྲིག་པའི་འགན་ཁུར། གཞན་ཡང་ཆབ་སྲིད་དང་། སྤྱི་ཚོགས། རིག་གཞུང་སོགས་ཀྱི་སྐོར་དཔྱད་བརྗོད་རྩོམ་ཡིག་གྲངས་ཆིག་སྟོང་ཙམ་སྤེལ་ཡོད་པ་མ་ཟད། དཔྱད་རྩོམ་དང་། ལོ་རྒྱུས། སྙན་རྩོམ་སོགས་རྩོམ་ཡིག་མང་པོ་ཞིག་བྲིས་ནས་བོད་ཕྱི་ནང་གཉིས་སུ་སྤེལ། དཔེ་དེབ་གང་མང་ཞིག་ཀྱང་གསར་རྩོམ་གྱིས་འགྲེམས་སྤེལ་བྱས་ཡོད་པ་དང་། དེའི་ནང་གི་དེབ་ཁག་ཅིག་དབྱིན་ཡིག་དང་རྒྱ་ཡིག་ཏུ་བསྒྱུར་ནས་དཔར་སྐྲུན་བྱས། ཕྱི་ལོ་ ༢༠༡༢ ལོ་ནས་བཟུང་ཟླ་ཟུང་དུས་དེབ་<<སྔ་འགྱུར་རིག་འཛིན་>>རྩོམ་སྒྲིག་དང་། ཇུས་འགོད། ཞིབ་འཇུག་བཅས་ཀྱི་འགན་གཅིག་ལྕོགས་ཀྱིས་ཁུར་ནས་ད་བར་དུས་དེབ་འདོན་ཐེངས་ ༥༠ ལྷག་ཙམ་བོད་ཕྱི་ནང་གཉིས་དང་ཕྱི་རྒྱལ་ཡུལ་གྲུ་ཁག་ཏུ་འགྲེམས་སྤེལ་ཞུས།

ཕྱི་ལོ་ ༢༠༠༦ ལོར་སྐབས་བཅུ་བཞི་པ་དང་། ཕྱི་ལོ་ ༢༠༡༡ ལོར་སྐབས་བཅོ་ལྔ་པ། ཕྱི་ལོ་ ༢༠༡༦ ལོར་སྐབས་བཅུ་དྲུག་པ་བཅས་ཀྱི་མདོ་སྟོད་སྤྱི་འཐུས་སུ་འདེམས་ཐོན་བྱུང་ཡོད་པ་དང་། ཕྱི་ལོ་ ༢༠༢༡ ལོར་སླར་ཡང་སྐབས་བཅུ་བདུན་པའི་མདོ་སྟོད་སྤྱི་འཐུས་སུ་འདེམས་ཐོན་བྱུང་ནས་ལས་ཁུར་ཞུ་བཞིན་ཡོད། ཕྱི་ལོ་ ༢༠༠༦ ནས་བཟུང་སྤྱི་འཐུས་ལྷན་ཚོགས་ཀྱི་ལས་དོན་དང་འབྲེལ་ནས་སྤྱི་འཐུས་རྒྱུན་ལས་དང་ཚོགས་ཆུང་ཁག་ཏུ་ལས་དོན་བསྒྲུབས་པ་དང་། ས་བགོས་བཞིན་གཞིས་ཆགས་ཁག་ཏུ་བསྐྱོད་ནས་མི་མང་གི་བདེ་སྡུག་ཆད་ལུས་མེད་པར་དབུས་སུ་ཞུ་རྒྱུ་དང་མཇུག་སྐྱོང་བརྡ་འདེད་སོགས་ཆད་ལུས་མེད་པ་བྱས། རྒྱ་གར་གྱི་མངའ་སྡེ་ཁག་དང་ཕྱི་རྒྱལ་ཡུལ་གྲུ་ཁག་ཏུ་བསྐྱོད་ནས་བོད་དོན་ཞུ་གཏུག་གི་ལས་འགུལ་སོགས་སྔ་རྗེས་གང་མང་དུ་མཉམ་ཞུགས་བྱས་ཡོད་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། ཆོས་འཕེལ་ཐུབ་བསྟན།

༄༅། །སྦེལ་ཀོབ་ཉིན་སློབ་ནས་འཛིན་གྲྭ་ ༡༢ ཐོན་རྗེས་སྦེང་ལོར་ཀརྱསཌ་མཐོ་སློབ་ (Christ College) ནས་ཉེ་བའི་གཙུག་ལག་རབ་འབྱམས་པ་ (BA) དང་གསར་འགྱུར་རིག་པའི་ཐོག་དྲིབ་ལོ་མ་ (Diploma) སློབ་གཉེར་ལེགས་པར་མཐར་སོན། སློབ་གཉེར་གནང་ཡུན་རིང་སློབ་ཕྲུག་ཚོགས་པའི་ཚོགས་གཙོ་དང་། ཐེངས་གཉིས་ཙམ་ས་གཞོན་ཚོགས་གཙོའི་འགན་ཁུར་བླངས་ཏེ་བོད་དོན་དང་འབྲེལ་བའི་ལས་འགུལ་མང་དག་སྤེལ། ཕྱི་ལོ་ ༡༩༩༢ ལོ་ནས་ད་བར་བོད་མིའི་སྒྲིག་འཛུགས་ནང་དུ་ལོ་ངོ་ ༢༨ ཙམ་ཞབས་ཞུ་དང་། ལྷག་པར་ལྷོ་སྤྱིའི་འགན་ཁུར་ཞུས་སྐབས་རྒྱ་གར་ལྷོ་ཕྱོགས་མངའ་གཞུང་ཁག་གི་དཔོན་རིགས་དང་། ཡུལ་མི། ཧིན་བོད་མཛའ་འབྲེལ་ཚོགས་པ། ཕྱི་རྒྱལ་གཞུང་ཚབ་ཁག་བཅས་ལ་འབྲེལ་ལམ་དམ་ཟབ་ཞུས་ཏེ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་། ཆབ་སྲིད། ཤེས་ཡོན། འཕྲོད་བསྟེན། སྤྱི་ཚོགས་ཡར་རྒྱས་བཅས་ལ་ཕན་རླབས་ཅི་ཆེ་བསྒྲུབས་ཡོད། དེ་བཞིན་ཁྱབ་ཁོངས་ལྷོ་ཕྱོགས་གྲོང་ཁྱེར་ཁག་ཏུ་ཡོད་པའི་སློབ་ཕྲུག་དང་ཚོང་པ་དཀའ་ངལ་ཅན་ལ་ལྟ་སྐྱོང་། བོད་མིའི་སྤྱི་མཐུན་མཉམ་འབྲེལ་གཙོས་པའི་ལྷོ་ཕྱོགས་མཉམ་འབྲེལ་ཁག་ལ་རམ་འདེགས། ལྷོ་གཞིས་ཁག་ལྔའི་ལམ་ཆུ་གློག་གསུམ་གྱི་མཐུན་རྐྱེན་ཡར་རྒྱས་སོགས་ལ་རོགས་ཕན་མི་དམན་པ་བྱས། ཕྱོགས་མཚུངས་ལྷོ་སྤྱིའི་ལས་ཁུངས་དང་། ལྷོ་གཞིས་ལས་ཁུངས་ཁག་གི་འཛིན་སྐྱོང་དང་། འཛུགས་སྐྲུན། ཡར་རྒྱས་བཅས་ཀྱི་ཆེད་དུ་ཀར་ཎ་ཀྲ་ཀའི་མངའ་གཞུང་གི་སྔོན་རྩིས་ནས་གཏན་འཇགས་རོགས་དངུལ་ཐབས་འཚོལ་ཐོག་ད་བར་ས་ཡ་ ༥༠ ཞུས་ཐོབ་བྱུང་ཡོད། ལྷག་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྷོ་ཕྱོགས་གཞིས་ཆགས་གཙོས་པའི་གྲོང་ཁྱེར་ཁག་ཏུ་ཆིབས་སྒྱུར་ལན་མང་བསྐྱངས་སྐབས་མངའ་གཞུང་ཁག་ལ་འབྲེལ་ལམ་གྱིས་ཆིབས་སྒྱུར་མཛད་འཆར་ལ་ཞབས་འདེགས་ཞུ་སྒོ་ཁག་འཐུས་གཙང་ཞུས་ངོར་དཔལ་ལྡན་སྐུ་སྒེར་ཡིག་ཚང་ནས་ལེགས་སོའི་ཕྱག་བྲིས་ཀྱང་གསོལ་རས་གནང་ཡོད་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། ཚེ་རིང་སྒྲོལ་མ།

༄༅། །གུས་མོ་ཚེ་རིང་སྒྲོལ་མ་རྒྱ་གར་བྱང་ཤར་མེག་གྷ་ལ་ཡའི་མངའ་སྡེ་ཤེས་ལོངས་ས་གནས་སུ་སྐྱེས། ༸གོང་ས་མཆོག་གི་ཐུགས་རྗེའི་བཀྲིན་ལ་བརྟེན་ནས་ཆུང་དུས་ནས་སློབ་སྦྱོང་བྱ་རྒྱུའི་གོ་སྐབས་ཐོབ། རྡོར་གླིང་བོད་མིའི་གཏན་སློབ་ནས་འཛིན་རིམ་ ༡༢ ཐོན། དེའི་རྗེས་ཤེས་ལོངས་རྟེན་གཞི་བྱས་པའི་ནེ་ཧུ་ (North Eastern Hill University – NEHU) གཙུག་ལག་མཐོ་སློབ་ནས་ལོ་ ༣ རིང་རབ་འབྱམས་པ་སློབ་མཐར་ཕྱིན། ས་གནས་བོད་ཀྱི་གཞོན་ནུ་ཚོགས་པའི་ཚོགས་མི་དང་རྒྱུན་ལས་དྲུང་ཆེའི་ལས་སྣེ་བྱས། དེའི་རྗེས་ས་གནས་བོད་ཀྱི་བུད་ལྷན་ཚོགས་ཀྱི་ཚོགས་མི་དང་དྲུང་ཆེ་ལས་འགན་བྱས། གཞུང་འབྲེལ་དང་གཞུང་འབྲེལ་མ་ཡིན་པའི་ལས་འགུལ། དམིགས་བསལ་ ༢༠༡༣ ལོར་བཀའ་སྤྱི་གཉིས་ཀྱི་ལྡི་ལིར་ཆབ་སྲིད་ཀྱི་ལས་འགུལ་ཆེན་མོ་སྐབས་དང་བླངས་ཐོག་ཉམས་ཞུགས་བྱས། ཤེས་ལོངས་ས་གནས་མདོ་སྟོད་འོས་བསྡུའི་ཚོགས་མིའི་འགན་ཁུར་ཐོག་དེ་སྔོན་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ལས་དོན་ཚགས་ཚུགས་ལེགས་སྒྲུབ་བྱས། ཤེས་ལོངས་ས་གནས་ཆུ་སྒང་གི་ཚོགས་མི་དང་། དེང་ཤེས་ལོངས་མི་མང་ནས་ཐུགས་རེ་ཆེན་པོའི་ས་གནས་འཐུས་ཚོགས་སུ་འདེམས་ཐོན་དང་ས་གནས་འཐུས་མི་རྣམ་པའི་ཤེས་ལོངས་ས་འཐུས་ཚོགས་གཙོ་འོས་འདེམས་ཀྱིས་ལས་འཁུར་དམ་འབུལ་ལས་དོན་འགན་ཁུར་བྱས། དམིགས་བསལ་ལྷག་བསམ་དང་ཉམས་མྱོང་སེམས་ཤུགས་ཐོག་བོད་རང་དབང་བསྐྱར་གསོ་ཆེད་༸གོང་ས་མཆོག་གི་བཀའ་དགོངས་བཞིན་ལས་དོན་ཐོག་རང་ནུས་གང་འོས་ཞུ་རྒྱུའི་ཆོད་སེམས་བརྟན་པོ་ཡོད། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། རྒྱལ་ལྡོང་ཕུར་པ་རྡོ་རྗེ།

རྒྱལ་ལྡོང་ཕུར་པ་རྡོ་རྗེ་ནི་ཕྱི་ལོ་ ༡༩༨༩ ལོར་ཁམས་མི་ཉག་ཡུལ་དུ་སྐྱེས། ཆུང་དུས་ནས་ས་གནས་དེ་ག་རུ་སློབ་ཆུང་དང་སློབ་འབྲིང་། དེ་བཞིན་དར་རྩེ་མདོ་རུ་ཡོད་པའི་ཞིང་ཆེན་བོད་ཡིག་སློབ་གྲྭ་བཅས་ནས་བོད་རྒྱ་གཉིས་ཀྱི་རིག་གནས་ལ་སློབ་གཉེར་བྱས་ཏེ་རིག་གནས་རབ་འབྱམས་པ་ཐོན། ༢༠༠༧ ལོར་བཙན་བྱོལ་དུ་བསླེབས་ཏེ་ཐོག་མར་གསོག་སྒར་སློབ་གྲྭར་ཨིན་ཡིག་གཙོ་བོར་སྦྱངས། དེ་ནས་ས་རྭ་མཐོ་སློབ་ཏུ་བོདཀྱི་ལོ་རྒྱུས་གཙོས་པའི་བོད་པའི་རིག་གནས་སྤྱི་ལ་སློབ་མཐར་སོན། ༢༠༡༥ ཟླ་ ༡༠ ཚེས་ ༡ ཉིན་ནས་ ༢༠༡༨ ཟླ་ ༦ ཚེས་ ༣༠ བར་དཔལ་ལྡན་དགའ་ལྡན་ཕོ་བྲང་གི་ལས་འཆར་ཏེ་ཆོལ་གསུམ་ལོ་རྒྱུས་ཆེན་མོའི་ལས་གཞིའི་ཁོངས་ནས་ཁམས་པའི་ལོ་རྒྱུས་ཉམས་ཞིབ་ཁང་གི་ཉམས་ཞིབ་པ་བྱས། ༢༠༡༨ ཟླ་ ༡༠ ཚེས་ ༡༤ ནས་ ༢༠༢༡ ཟླ་ ༦ ཚེས་ ༣༠ བར་ནོར་ཝེ་བོད་ཀྱི་རླུང་འཕྲིན་ཁང་གི་རྒྱ་ཡིག་སྡེ་ཚན་གྱི་གསར་འགོད་པ་དང་རྩོམ་སྒྲིག་པ་བྱས། ༢༠༢༡ ཟླ་ ༥ ཚེས་ ༡༤ ཉིན་བོད་མི་མང་སྤྱི་འཐུས་སྐབས་ ༡༧ པའི་མདོ་སྟོད་ཆོལ་ཁའི་སྤྱི་འཐུས་སུ་འདེམས་ཐོན་བྱུང་བ་བཅས་ལོ་རྒྱུས་སྙིང་བསྡུས་སུ། །

 

མིང༌། དཀོན་མཆོག་ཡང་འཕེལ།

༄༅། །ཕྱི་ལོ་ ༡༩༩༣ ལོར་བཙན་བྱོལ་དུ་འབྱོར་ནས་སུ་ཇ་བོད་ཁྱིམ་སློབ་གྲྭའི་ནང་སློབ་ཞུགས་བྱས། ཕྱི་ལོ་ ༢༠༠༠ ལོར་འཛིན་རིམ་བཅུ་པའི་བསླབ་མཐར་སོན། སློབ་ཡུན་རིང་སློབ་གཉེར་དང་སྤྱི་དོན་འགན་ཁུར་འཐུས་ཤོར་མེད་པ་ཞུས་པས་བོད་གཞུང་ཤེས་རིག་ལས་ཁུངས་ནས་བུམ་སྐྱོན་གསུམ་བྲལ་གྱི་སློབ་མ་རྩེ་ཕུད་ཀྱི་གཟེངས་རྟགས་ཐོབ། དེ་རྗེས་རྡ་སྟེང་བོད་ཁྱིམ་དུ་སློབ་ཞུགས་ཀྱིས་འཛིན་རིམ་བཅུ་གཉིས་ལེགས་ཐོན་བྱུང་། ལྡི་ལིའི་གཙུག་ལག་སློབ་གཉེར་ཁང་དུ་ལོ་གསུམ་རིང་སྲིད་དོན་ཚན་རིག་ཐོག་སློབ་གཉེར་གྱིས་ཕྱི་ལོ་ ༢༠༠༥ ལོར་ཉེ་བའི་གཙུག་ལག་རབ་འབྱམས་པའི་ (B.A Political Science) ལག་འཁྱེར་ཐོབ། ཕྱི་ལོ་ ༢༠༠༥ ནས་ ༢༠༠༧ བར་སླར་ཡང་ལོ་གཉིས་རིང་སློབ་གཉེར་གྱིས་སྲིད་དོན་ཚན་རིག་གི་གཙུག་ལག་རབ་འབྱམས་པའི་ (M.A. Political Science) བསླབ་པ་མཐར་སོན་བྱུང་ཡོད། སློབ་གྲྭའི་སྤྱི་ཁྱབ་རྒན་བདག་དང་བུ་ཡི་སྡོད་ཁང་གི་རྒན་བདག་སོགས་སུ་རྒྱུན་པར་འདེམས་ཐོན་བྱུང་ནས་སློབ་གཉེར་གྱི་ཞོར་དུ་སྤྱི་ཚོགས་ཞབས་ཞུ་དང་། ཚོགས་པའི་འགན་ཁུར་ཐོག་ཁུར་བབ་ཀྱི་ལས་སྣེ་ཚང་མ་སླ་བཅོས་ཙམ་མ་ཡིན་པར་གྲུབ་འབྲས་རྩེ་ཐོན་སོན་པ་བྱུང་ཡོད། མཐོ་སློབ་སྐབས་ལྡི་ལི་བོད་ཁྱིམ་གྱི་རྒན་བདག་གམ་སློབ་ཕྲུག་ཚོགས་པའི་ཚོགས་གཙོར་འདེམས་ཐོན་བྱུང་བ་མ་ཟད། ལྡི་ལི་ས་གནས་གཞོན་ནུའི་ཚོགས་གཙོར་འདེམས་ཐོན་གྱིས་ལས་ཁུར་ཞུས། ཕྱི་ལོ་ ༢༠༠༧ ནས་བཟུང་ ༢༠༡༣ བར་བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་སུ་འོས་འདེམས་ཐེངས་གཉིས་བྱུང་བ་མ་ཟད། རྒྱུན་ལས་སུ་སྡོད་ཡུན་རིང་རྒྱལ་ས་ལྡི་ལིར་དུས་བཀག་མེད་པའི་ཟས་བཅད་ངོ་རྒོལ་བྱས་པ་དང་། དེ་བཞིན་ཕྱི་རྒྱལ་ཡུལ་གྲུ་ཁག་དང་། རྒྱ་གར་བོད་མིའི་གཞིས་ཆགས་ཁག་སོགས་ལ་རྒྱ་གཞུང་གིས་བོད་མིའི་ཐོག་འཛིན་པའི་གདུག་རྩུབ་ཅན་གྱི་སྲིད་བྱུས་ཐེར་འདོན་དང་། བོད་མིའི་དཀའ་སྡུག་གི་གནས་བབ་རྒྱལ་སྤྱིའི་ཐོག་ཁྱབ་བསྒྲགས། བོད་མི་རིགས་ཀྱི་ངོ་བོ་དང་གནས་བབ་རྒྱུད་འཛིན་དགོས་སྐོར་སོགས་ཁྱབ་སྤེལ་དང་གོ་རྟོགས་སྤེལ་ཡོད། གཞོན་ནུའི་རྒྱུན་ལས་ནས་འཕོས་རྗེས་ད་བར་སྨར་ཁམས་གྲགས་པ་རིན་པོ་ཆེ་མཆོག་གིས་གསར་འཛུགས་གནང་བའི་རྒྱལ་སྤྱིའི་བྱམས་བརྩེ་བདེ་རྩ་ཞེས་པ་བོད་དང་ཧི་མ་ལ་ཡའི་རི་བརྒྱུད་ཀྱི་དྭ་ཕྲུག་དང་། ཕྱེད་དྭ་ཕྲུག དེ་བཞིན་ཉམས་ཐག་སོགས་ཀྱི་ཆེད་ལས་དོན་བྱེད་བཞིན་པའི་ཚོགས་པའི་དྲུང་ཆེའི་འགན་ཁུར་བྱེད་བཞིན་པ་ཡིན།

ཕྱི་ལོ་ ༢༠༡༦ ལོར་སྐབས་ ༡༦ པའི་བོད་མི་མང་མདོ་སྟོད་སྤྱི་འཐུས་སུ་འོས་འདེམས་བྱུང་བ་ནས་བཟུང་སྤྱི་འཐུས་ཀྱི་ལས་ཁུར་ཞུ་སྒོ་ཡོངས་རྫོགས་ལྷོད་མེད་དུ་ཞུ་བཞིན་པ་དང་། དམིགས་བསལ་སྤྱི་འཐུས་རྒྱུན་ལས་ནང་འགན་ཁུར་ལོ་གཅིག་དང་། རྒྱ་གར་དབུས་དང་མངའ་སྡེ་ཁག་ནང་བོད་དོན་ཞུ་སྐུལ། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་དང་། དམིགས་བསལ་ཚོགས་ཆེན་བཅས་སུ་མཉམ་ཞུགས་ཀྱིས་འགན་ཁུར་བླངས། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིས་བསྡུས་སུ། །

 

མིང༌། དབང་འདུས་རྡོ་རྗེ།

གུས་པ་སྦིར་གཞིས་ཆགས་སུ་སྐྱེས་ནས་འཚར་ལོངས་བྱུང་།  ཆུང་དུས་ནས་མ་ནཱ་ལི་སམ་བྷོ་ཊ་དང་བོད་ཁྱིམ་སློབ་གྲྭ་སོགས་ནས་གཞི་རིམ་སློབ་མཐར་ཕྱིན་ནས་ཅན་དྷི་གྷར་གྱི་པན་ཇབ་གཙུག་ལག་སློབ་གཉེར་ཁང་དུ་རབ་འབྱམས་པའི་སློབ་སྦྱོང་གི་གོ་སྐབས་ཐོབ།  གཞི་རིམ་སློབ་གྲྭ་ཁག་ནས་འགོ་ཁྲིད་ཀྱི་ཉམས་མྱོང་ཕུན་སུམ་ཚོགས་པ་ཐོབ་མྱོང་ཡོད་པ་མ་ཟད། མཐོ་རིམ་སློབ་གཉེར་བྱེད་པའི་ཞོར་ལ་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་ཡང་བྱས་ཏེ་ལས་འགུལ་མང་པོར་མཉམ་ཞུགས་བྱས་མྱོང་ཡོད། སློབ་སྦྱོང་བྱས་ཟིན་པའི་རྗེས་སུ་སྦིར་སྡེ་དགེ་ས་གནས་གྲོས་ཚོགས་ཀྱི་ཚོགས་མི་ལོ་ངོ་བཞི་དང་སྦིར་ས་གནས་ཆུ་སྒང་གི་ཚོགས་གཞོན་ལོ་ངོ་དགུ། སྦིར་དང་ཅོན་ཏཱ་ར་དུང་སྒྲུབ་ཚོགས་པའི་གཉེར་པ་ལོ་ངོ་བཞི། དེ་བཞིན་ལོ་ངོ་དྲུག་གི་རིང་དབུས་མདོ་ཁམས་ཆུ་བཞི་སྒང་དྲུག་གི་རྩིས་ཞིབ་པ་བྱས། དེ་ནས་ལོ་ངོ་གསུམ་རིང་ ༼༢༠༡༧-༢༠༢༠༽ ཆུ་བཞི་སྒང་དྲུག་དབུས་རྒྱུན་ཤེས་ཡོན་འགན་འཛིན་གྱི་ལས་ཁུར་ཞུས།  ད་ལོ་སྐབས་ ༢༢ པའི་མདོ་ཁམས་ཆུ་བཞི་སྒང་དྲུག་གི་དབུས་རྒྱུན་བྱེད་མུས་ཡིན། ཕྱི་ལོ ༢༠༡༩ ལོར་གུས་པས་བོད་ཀྱི་ཐུན་མོང་མ་ཡིན་པའི་ཁྱད་ཆོས་ཡོད་པའི་བོད་ཟས་ཞེས་པ་གསར་གཏོད་བྱས་ནས་རྒྱལ་ནང་དང་རྒྱལ་སྤྱིའི་སྡིངས་ཆའི་ཐོག་གནའ་བོའི་བོད་ཀྱི་སྲོལ་རྒྱུན་བཟའ་བཅའ་ཁྱབ་གདལ་གཏོང་རྒྱུའི་ལས་འཆར་བསྒྲིག་མུས་ཡིན།  དེ་བཞིན་ཕྱི་ལོ་ ༢༠༢༠ ལོར་རྒྱ་ནད་ཏོག་དབྱིབས་ན་ཚའི་ནད་རླབས་དང་པོས་རྒྱ་གར་ནང་དུ་གནོད་སྐྱོན་ཐེབས་པའི་སྐབས་སུ་ནད་འགོག་གདོང་ཁེབས་གསར་གཏོད་བྱས་ནས་སྦིར་དང་ཅོན་ཏཱ་རའི་བོད་ཁམས་བཟོ་གཞིས་ཚོགས་པས་མཐུན་རྐྱེན་སྦྱར་ནས་རིན་མེད་ཀྱིས་རྒྱ་གར་དང་བོད་ཀྱི་གཞུང་འབྲེལ་ཡིན་མིན་གྱི་སྡེ་ཚན་མང་པོར་ཞལ་འདེབས་ཕུལ་ནས་ཞབས་འདེགས་ལེགས་པར་བྱུང་བས་རྒྱ་གར་གྱི་དཔོན་རིགས་ཁག་ནས་ཐུགས་རྗེ་ཆེ་ཞུའི་གཟེངས་བསྟོད་དང་བསྔགས་བརྗོད་ཀྱི་ལག་ཁྱེར་ཡང་ཐོབ་ཡོད། ཕྱི་ལོ་ ༢༠༢༡ ལོར་རྒྱ་ནད་ཏོག་དབྱིབས་ན་ཚའི་ནད་རླབས་གཉིས་པའི་སྐབས་སུ་རྒྱལ་ས་ལྡི་ལིར་རྟེན་གཞི་བྱས་པའི་རྒྱལ་སྤྱིའི་ནང་པའི་མཐུན་ཚོགས་(International Buddhist Confederation) བརྒྱུད་ནས་བོད་མིའི་གཞིས་ཆགས་ཁག་ ༢༠ དང་གཞུང་འབྲེལ་མ་ཡིན་པའི་ཚོགས་པ་ ༨ ལ་སྲོག་སྐྱོབ་འཕྲུལ་ཆས་དང་སྨན་གྱི་མཁོ་ཆས་རིགས། (Oxygen Concentrator, Oxygen Cylinder,Medical Aids) སོགས་ཧིན་སྒོར་རོབ་རྩིས་བྱས་ན་འབུམ་ཕྲག་བཞི་བཅུ་ལྷག་གིས་རོགས་རམ་དང་ཞབས་འདེགས་བསྒྲུབས་ཐུབ་པ་བྱུང་ཡོད་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་མུས་ཡིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། པདྨ་མཚོ།

༄༅། །ཕྱི་ལོ་ ༡༩༨༦ ལོར་བོད་རྔ་བ་ཁུལ་རྐ་ཁོག་རྫོང་ངམ་ཁྱུང་མཆུ་རྫོང་དབལ་ཤུལ་རྨེ་བའི་མཐོང་སྨོན་སྡེ་བ་རུ་སྐྱེས། ཆུང་དུས་ནས་མཐོང་སྨོན་སྡེ་བའི་སློབ་ཆུང་དང་རྫོང་སློབ་འབྲིང་གཉིས་ནས་སློབ་མཐར་ཕྱིན་རྗེས། ཕྱིི་ལོ་ ༢༠༠༢ ལོར་སི་ཁྲོན་ཞིང་ཆེན་བོད་ཡིག་ཆེད་གཉེར་སློབ་གྲྭར་ཡིག་རྒྱུགས་ཀྱི་ལམ་ནས་ཚུད་དེ་བོད་རྒྱ་ཡིག་སྒྱུར་ཐོག་ཆེད་སྦྱོང་བྱས། སློབ་གྲྭ་ཆུང་འབྲིང་དང་མཐོ་སློབ་བཅས་སུ་སློབ་སྦྱོང་བྱེད་སྐབས། སི་ཁྲོན་ཞིང་ཆེན་རྔ་བ་ཁུལ་གྱི་གཞོན་ནུའི་རྩོམ་ཡིག་འགྲན་སྡུར་ཁྲོད་ཨང་གཉིས་པ་ཐོབ་པ་དང་། སི་ཁྲོན་ཞིང་ཆེན་བོད་ཡིག་ཆེད་གཉེར་སློབ་གྲྭ་ནས་ལོ་འཁོར་ཡིག་རྒྱུགས་ཁྲོད་ཨང་དང་པོ་ཐོབ་པར་བརྟེན། ཨ་དཀོན་རིན་པོ་ཆེ་མཆོག་ནས་ལོ་གསུམ་རིང་སློབ་ཡོན་བྱ་དགའ་གནང་། མཐོ་སློབ་ཀྱི་ལོ་གཉིས་ལ་སྤྱོད་ཡོན་གཙང་གསུམ་ལྡན་པའི་སློབ་མ་གཟེངས་ཐོན་གྱི་བྱ་དགའ་ཐོབ། ཕྱི་ལོ་ ༢༠༠༥ ལོར་སི་ཁྲོན་ཞིང་ཆེན་བོད་ཡིག་ཆེད་གཉེར་སློབ་གྲྭ་ནས་གཙུག་ལག་རབ་འབྱམས་པ་མཐར་སོན།

སློབ་གྲྭ་ཐོན་པ་དང་ཁ་ཐུག་ལི་ཟིང་སྤང་རྒྱན་དཔར་ཁང་དུ་སློབ་གྲྭ་དང་ཚོགས་པ་ཁག་གི་དུས་དེབ་དང་སྒེར་དེབ་སོགས་ལ་ཞུ་དག་རྩོམ་སྒྲིག་གི་ལས་ཀ་བྱས། ཕྱི་ལོ་ ༢༠༠༥ ལོའི་ཟླ་ ༡༢ པའི་ནང་བཙན་བྱོལ་དུ་ཡོང་སྟེ་ཕྱི་ལོ་ ༢༠༠༦ ཟླ་ ༢ ཚེས་ ༢༥ ཉིན་བལ་ཡུལ་སྣེ་ལེན་ཁང་དུ་འབྱོར། དེ་ནས་ཤེས་རབ་དགའ་ཚལ་སློབ་གླིང་དུ་ཟླ་ཤས་རིང་སློབ་སྦྱོང་བྱས་རྗེས་སྔ་གཞུག་ཏུ་སུ་ཇ་དང་། མཚོ་པདྨའི་འབྲི་གུང་དགོན་གཉིས་སུ་དགེ་རྒན་གྱི་ལས་ཀ་བྱས། ཕྱི་ལོ་ ༢༠༠༩ ལོར་རྒྱལ་སྤྱིའི་བོད་ཀྱི་ཆ་འཕྲིན་གསར་ཁང་གི་གསར་འགོད་པ་དང་། ཤམ་བྷ་ལ་བོད་ཡིག་དྲ་བའི་རྩོམ་སྒྲིག་པ་གཞོན་པའི་ལས་ཀ་བྱས། ཕྱི་ལོ་ ༢༠༡༣ ནས་བོད་ཀྱི་དུས་བབ་གསར་ཁང་དུ་གསར་འགོད་པའི་ལས་ཀ་བྱས་ཏེ། ཕྱི་ལོ་ ༢༠༡༨ ལོར་བོད་ཀྱི་དུས་བབ་གསར་ཁང་གི་རྩོམ་སྒྲིག་པར་བསྐོ་བཞག་གནང་བ་ལྟར་འགན་འཁུར་མུས་ཡིན་ལ། ལས་ཞོར་དུ་བོད་ཀྱི་གསར་འགོད་མཐུན་ཚོགས་དང་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་རྒྱུན་ལས་བཅས་བྱས་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། དོན་འགྲུབ་བཀྲ་ཤིས།

༄༅། །ཕྱི་ལོ་ ༡༩༨༠ ལོར་མདོ་སྨད་བླ་བྲང་དུ་སྐྱེས། ཆུང་དུས་ཕྱུགས་རྫིའི་ཞོར་དུ་སློབ་སྦྱོང་གནང་བར་གྲུབ་འབྲས་འབུར་ཐོན་བླངས་སྟབས། ཕ་མའི་རྒྱབ་སྐྱོར་འོག་ ༡༩༩༦ ལོ་ནས་བླ་བྲང་བཀྲ་ཤིས་འཁྱིལ་དུ་སློབ་གཉེར་ལ་བསྐྱོད་ཅིང་དགེ་བའི་བཤེས་གཉེན་མང་པོ་བསྟེན། ཐུན་མོང་རིག་གནས་གཙོས་པའི་ནང་དོན་རིག་པ་དང་སྒྲ་སྙན་སྨན་རྩིས་སོགས་ལ་སློབ་གཉེར་གནང་། སྐབས་དེར་ཀན་སུའུ་ཞིང་ཆེན་ནང་བསྟན་སློབ་གྲྭ་དང༌། གཙོས་མི་རིགས་དགེ་ཐོན་སློབ་གྲྭ་སོགས་སུ་ཟུར་ཞུགས་ཀྱིས་ལོ་རྒྱུས་དང་བརྡ་རྙིང་སོགས་ལ་སློབ་སྦྱོང་གནང་། ༢༠༠༠ ལོར་ནུབ་བྱང་མི་རིགས་སློབ་ཆེན་དུ་ཟུར་ཞུགས་ཀྱིས་ནུབ་ཕྱོགས་མཚན་ཉིད་རིག་པ་དང་དེང་རབས་སྤྱི་ཚོགས་རིག་པར་སློབ་སྦྱོང་གི་ཞོར་དུ་ <<བོད་བརྒྱུད་ནང་བསྟན་མཚན་ཉིད་རིག་པའི་མ་ལག་གསར་འཛུགས།>> དང༌། <<སློབ་མའི་རང་མོས་གླེང་སྟེགས།>> སོགས་གསར་འཛུགས་སྣེ་ཁྲིད་ཚོགས་མི་གནང་།

༢༠༠༢ ལོར་ཆབ་སྲིད་དཀའ་ངལ་འོག་རྒྱ་གར་ལ་བཙན་བྱོལ་དུ་འབྱོར་ཏེ། ཤེས་རབ་དགའ་ཚལ་སློབ་གླིང་དུ་དབྱིན་ཡིག་དང་གློག་ཀླད་སོགས་སློབ་སྦྱོང་གི་ཞོར་དུ་སློབ་གྲྭའི་རྩོམ་སྒྲིག་པ་དང་བོད་ཡིག་དགེ་རྒན་གནང་། ༢༠༠༧ ལོ་ནས་བོད་ཀྱི་དུས་བབ་གསར་འགོད་པ་དང༌། ༢༠༡༠ ལོ་ནས་རྩོམ་སྒྲིག་པའི་ཕྱག་ལས་གནང་། ༢༠༠༧ ནས་ ༢༠༡༠ ལོའི་བར་བོད་ཀྱི་གསར་འགོད་པའི་མཐུན་ཚོགས་ཀྱི་ཚོགས་གཞོན་དང༌། ༢༠༠༨ ལོ་ནས་མདོ་སྨད་བདེན་རྒྱབ་རྩོམ་སྒྲིག་ཚོགས་ཆུང་གི་རྩོམ་སྒྲིག་པ་གནང་མུས་དང་། ༢༠༡༦ ལོར་སྐབས་བཅུ་དྲུག་པའི་མདོ་སྨད་ཆོལ་ཁའི་སྤྱི་འཐུས་སུ་འདེམས་ཐོན་བྱུང་བ་ལྟར་ ༢༠༡༨ ལོ་ནས་བསྟུད་མར་ལོ་གསུམ་ལ་སྤྱི་འཐུས་རྒྱུན་ལས་དང་། ༢༠༢༡ ལོར་སྔོན་རྩིས་ཚོད་དཔག་འཆར་རྩིས་ཚོགས་ཆུང་ནང་ཕྱག་ལས་གནང་། ༢༠༢༡ ལོར་སླར་ཡང་སྐབས་བཅུ་བདུན་པའི་མདོ་སྨད་ཆོལ་ཁའི་སྤྱི་འཐུས་སུ་འདེམས་ཐོན་བྱུང་ཡོད་པ་བཅས་ཀྱི་ལོ་རྒྱུས་སྙིང་བསྡུས་སུ།།

མིང༌། ཚེ་རིང་ལྷ་མོ།

༄༅། །ཕྱི་ལོ་ ༡༩༨༧ ལོར་རྔ་བ་རྫོང་གི་འབྲིང་རིམ་སློབ་གྲྭ་ནས་སློབ་མཐར་ཕྱིན། དེ་རྗེས་སི་ཁྲོན་ཞིང་ཆེན་བོད་ཡིག་སློབ་གླིང་དུ་ལོ་བཞིའི་རིང་བོད་ཀྱི་ཐུན་མོང་རིག་གནས་དང་བོད་རྒྱ་ཡིག་བསྒྱུར་ལ་ཆེད་སྦྱོང་བྱས། ༡༩༩༡ ལོར་རྔ་བ་རྫོང་སྲིད་གྲོས་ལས་ཁུངས་སུ་བོད་རྒྱ་ཡིག་བསྒྱུར་གྱི་བྱ་བ་བསྒྲུབས། ༡༩༩༢ ལོར་རྒྱ་གར་ལ་སྐྱབས་བཅོལ་དུ་འབྱོར། ༩༣ ལོར་བོད་གཞུང་གིས་བོད་རྒྱ་སྐད་གཉིས་སྨྲ་བའི་གཞུང་ཞབས་གསར་འདེམས་ཀྱི་ཚང་རྒྱུགས་སུ་ཞུགས། བདེ་སྲུང་བོད་གནས་ཉམས་ཞིབ་ཁང་དུ་དྲུང་གཞོན་ལས་རོགས་དང་དྲུང་གཞོན་ཀྱི་ལས་འགན་ཐོག་ལོ་དྲུག་རིང་ཉམས་ཞིབ་ཀྱི་ལས་ཀ་བྱས།  དུས་མཚུངས་སུ་རྩོམ་པ་པོ་འཇམ་དཔལ་རྒྱ་མཚོས་བརྩམས་པའི་༼ སློབ་དཔོན་ཆེན་པོ་པཎ་ཆེན་རིན་པོ་ཆེ། ༽ ཞེས་པའི་དེབ་དེ་བོད་བསྒྱུར་དང༌། དེ་རྗེས་པཎ་ཆེན་རིན་པོ་ཆེ་སྐུ་གོང་མའི་ ༼ ཡིག་འབྲུ་ཁྲི་བདུན་གྱི་སྙན་ཞུ། ༽ བོད་ཡིག་ཏུ་མཉམ་བསྒྱུར་ཞུས། ༡༩༩༩ ལོར་ཐའེ་ཝན་དུ་བསྐྱོད། སྔ་ཕྱིར་ལོ་བརྒྱད་རིང་ཨེ་ཤི་ཡ་རང་དབང་རླུང་འཕྲིན་ཁང་དང་། ཨ་རིའི་རླུང་འཕྲིན་ཁང་གི་བོད་སྐད་གསར་འགོད་པའི་ལས་ཀ་བྱས།

༢༠༠༨ ལོ་ནས་སླར་ཡང་རང་གཞུང་བདེ་སྲུང་ལས་ཁུངས་སུ་ཟུང་འབྲེལ་དྲུང་ཆེའི་ལས་འགན་ལོ་གསུམ་དང་། དེའི་རྗེས་ཕྱི་དྲིལ་ལས་ཁུངས་སུ་ལོ་ལྔ་ཙམ་ལ་རྒྱ་ཡིག་སྡེ་ཚན་གྱི་འགན་འཛིན་དང་། གཞུང་འབྲེལ་རྒྱ་ཡིག་དྲྭ་རྒྱའི་རྩོམ་སྒྲིག་པའི་འགན་ཁུར། ༢༠༡༦ ལོར་བོད་མི་མང་མདོ་སྨད་སྤྱི་འཐུས་སུ་བདམས་ཐོན་བྱུང་། ལས་ཞོར་དུ་༸གོང་ས་མཆོག་གི་མཛད་རྣམ་ ༼ ངོས་ཀྱི་ཡུལ་དང་ངོས་ཀྱི་མི་དམངས། ༽ རྒྱ་ཡིག་ཏུ་བསྒྱུར་ཅིང་། ༢༠༡༩ ལོའི་༸སྐུའི་འཁྲུངས་སྐར་ཉིན་ཐའེ་ཝན་ནས་པར་བསྐྲུན་འགྲེམས་སྤེལ་ཞུས་ཡོད་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། གསེར་རྟ་བཀྲ་ཤིས་དོན་གྲུབ།

༄༅། །གུས་གསེར་རྟ་བཀྲ་ཤིས་དོན་གྲུབ་ཕ་ཚེ་འདས་མགོ་ལོག་གསེར་རྟ་བཀྲ་ཤིས་ཟླ་བ་དང་མ་ཚེ་རིང་པདྨ་གཉིས་ཀྱི་བུ་རུ་བལ་ཡུལ་གློ་སྨོན་ཐང་དུ་སྐྱེས། ཕྱི་ལོ་ ༡༩༨༩ མཐོ་སློབ་ཐོན་རྗེས་ཕྱི་ལོ་ ༡༩༩༠ ནས་ ༢༠༠༠ བར་བལ་ཡུལ་སྤོག་ར་གློ་སྒྲིག་ཁྱབ་ཁོངས་ཚོང་ལས་སྡེ་ཚན་ཨར་ན་པུར་ན་མགྲོན་ཁང་ (Hotel Annapur-na) ནང་ལས་འགན་འདྲ་མིན་ཐོག་ལོ་ངོ་བཅུ་ལྷག་ཙམ་གྱི་ཉམས་མྱོང། ཕྱི་ལོ་ ༡༩༩༨ ནས་ ༢༠༠༠ བར་སྤོག་ར་བྱམས་པ་གླིང་ས་གནས་གཞོན་ནུའི་རྒྱུན་ལས་བྱས། དེ་ནས་རང་གཞུང་དཔལ་འབྱོར་ལས་ཁུངས་ཀྱི་བཀའ་འབྲེལ་ཐོག་ཕྱི་ལོ་ ༢༠༠༠ ནས་ ༢༠༠༣ བར་བལ་ཡུལ་བོད་ཀྱི་གསོལ་མགྲོན་ཁང་ (Hotel Tibet) གི་འགན་འཛིན་ལས་རོགས་དང་དེ་རྗེས་གནས་སྤར་གྱི་འགན་འཛིན་ཐོག་ཞབས་ཞུ་ཞུས། ཕྱི་ལོ་ ༢༠༠༣ ནས་ ༢༠༠༦ དང་ ༢༠༠༦ ནས་ ༢༠༠༨ བར་བལ་ཡུལ་ནང་སྐར་མ་གསུམ་ཅན་གྱི་མགྲོན་ཁང་གངས་ལྗོངས་ (Hotel Gangjong) དང་མ་ནང་ (Hotel Manang) གཉིས་ཀྱི་སྤྱི་ཁྱབ་འགན་འཛིན་བྱས། ཕྱི་ལོ་ ༢༠༠༨ ནས་ ༢༠༡༡ དང་ཡང་ ༢༠༡༤  ནས་ ༢༠༡༩  བར་རང་གཞུང་ནང་སྲིད་ལས་ཁུངས་ཀྱི་ཁྱབ་ཁོངས་ཚེ་རིང་རྒན་གསོ་ཁང་གི་འགན་འཛིན་བྱས། ཕྱི་ལོ་ ༢༠༡༣ ནས་ ༢༠༡༨ བར་མདོ་སྨད་དབུས་སྤྱི་ཁྱབ་རྒྱུན་ལས་ཀྱི་སྐབས་ ༡༥ དང་ ༡༦ གི་ཕྱི་འབྲེལ་འགན་འཛིན་བྱས། བལ་ཡུལ་མདོ་སྨད་སྐབས་ ༥ ནས་ད་ལྟའི་སྐབས་ ༡༠ པའི་ས་གནས་རྒྱུན་ལས་ཀྱི་ཚོགས་གཞོན་ལས་འགན་ཐོག་སྔ་རྗེས་ཐེངས་དྲུག་བསྟུད་མར་བྱ་མུས་དང་། བོད་མི་མང་སྤྱི་འཐུས་སྐབས་ ༡༥ དང་། ༡༦། ད་ལྟ་སྐབས་ ༡༧ གྱི་སྤྱི་འཐུས་ལས་འགན་ཞུ་མུས་ཡིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། དབྲ་ཙ་བསོད་ནམས་ནོར་བུ།

༄༅། །དབྲ་ཙ་བསོད་ནམས་ནོར་བུ་ནི། ཕ་ཨ་མདོ་ཤར་པ་དང་མ་བླ་བྲང་བཀྲིས་སྒོ་མང་ནས་ཡིན། པཱན་ཇབ་མཐོ་སློབ་ཆེན་མོར་འཛུལ་ཞུགས་བྱས་ཏེ་དེ་གར་མུ་མཐུད་བསླབ་པ་སློབ་གཉེར་དང་མཐོ་སློབ་ཀྱི་བྱེད་སྒོ་འདྲ་མིན་ཐད་སྦྱངས་པ་མཐར་སོན་བྱུང་ཡོད།  མཐོ་སློབ་ནས་བཟུང་སྤྱི་ཚོགས་དང་ཆབ་སྲིད་ཀྱི་ལས་འགུལ་འདྲ་མིན་ནང་མཉམ་ཞུགས་བྱས་ཡོད།

ཕྱི་ལོ ༢༠༡༠ ནས་ ༢༠༡༦ བར་ཁེ་ན་ཌའི་དངུལ་ཁང་ (Royal Bank of Canada) ནང་དུ་སྣེ་ཁྲིད་རྒན་པའི་མཚན་རྟགས་བཞེས་ཏེ་ཕྱག་ལས་གནང་། དེའི་གོང་ལོ་ངོ་བཞིའི་རིང་ཨ་རིའི་དཔལ་འབྱོར་གྱི་ཚོགས་པ་ (FMCA) ཞེས་པར་ཕྱག་ལས་གནང་། དེ་བཞིན་རྒྱ་གར་གྱི་གཞུང་འབྲེལ་མིན་པའི་ཚོགས་པ་འདྲ་མིན་དང་འབྲེལ་བ་ཡོད་ལ། དེ་དག་བརྒྱུད་ཉམ་ཐག་ཕྲུ་གུ་དང་རྒན་གྲས་རྣམས་ལ་དང་བླངས་ཀྱི་ཐོག་ནས་ཤེས་ཡོན་གྱི་སློབ་འཁྲིད་ཞུས། ཤེས་ཡོན་དང་ཉམས་མྱོང་ཕུན་སུམ་ཚོགས་པར་བརྟེན་བོད་པ་དང་རྒྱ་གར་དང་ཕྱི་རྒྱལ་གྱི་ཁོར་ཡུག་འདྲ་མིན་ནང་དཀའ་ཚེགས་མེད་པར་ལས་ཀ་བྱེད་རྒྱུའི་གདེང་སྤོབས་ཡོད། ༢༠༡༦ ལོར་བོད་མི་མང་མདོ་སྨད་སྤྱི་འཐུས་སུ་འོས་འདེམས་བྱུང་བ་ལྟར་ལས་འཁུར་ཞུ་སྒོ་གང་མཆིས་ཐད་ལྷག་བསམ་ཟོལ་མེད་ཀྱིས་ཞབས་འདེགས་ཐུབ་པ་བྱུང་བ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། ཀརྨ་དགེ་ལེགས།

༄༅། །གུས་ཀརྨ་དགེ་ལེགས། ༡༩༨༥ ལོར་མ་སུ་རི་གཏན་སློབ་ནས་གཞི་རིམ་འཛིན་གྲྭ་བཅིུས་ཐོན། ལོ་ ༡༢ དྭང་སློབ་དམག་སྒར་ནང་འགན་ཁུར་ཞུས། སྤྱི་ནོར་༸གོང་ས་༸སྐྱབས་མགོན་ཆེན་པོའི་སྐུ་སྲུང་ལོ་ ༢ ཞུས། མདོ་སྨད་དབུས་རྒྱུན་སྐབས་གསུམ་བསྟུད་མར་འགན་ཁུར་ཞུས། དེ་བཞིན་སྦན་ད་ར་ས་གནས་གྲོས་ཚོགས་འཐུས་མི་ལོ་ ༡༨ ཞུས་ཁོངས་ནས་ལོ་ ༡༢ བསྟུད་མར་ཚོགས་གཙོ་བྱས། རྒྱ་གར་རྒྱལ་ཡོངས་བཙན་བྱོལ་བོད་མིའི་སུད་ཚོང་ཚོགས་པའི་ཚོགས་གཙོ་ལས་འགན་ལོ་ ༣ བྱས། ད་ལྟའི་ལས་གནས་སྤྱི་འཐུས་ལས་ཐོག བོད་མི་མང་སྤྱི་འཐུས་རྒྱུན་ལས་ལོ་གཅིག ལོ་གཉིས་བསྟུད་མར་སྔོན་རྩིས་ཚོད་དཔག་ཚོགས་ཆུང་ཚོགས་མིའི་འགན་འཁུར་ཞུས། བོད་དོན་ཞུ་གཏུགས་ལས་འགུལ་སྔ་རྗེས་ཐེངས་གཉིས་རྒྱལ་ས་ལྡི་ལིར་ཞུས། བོད་ལྗོངས་མདོ་སྨད་༸སྐུའི་གྱ་སྟོན་གོ་སྒྲིག་ཚོགས་ཆུང་གི་ཚོགས་མིའི་ལས་འགན་ཞུས། སྤྱི་འཐུས་ཕྱོགས་བསྐྱོད་ས་བགོས་ལྟར་ས་གནས་རྡི་མ་པུར་དང་ཀོ་ཧི་མ། མེའོ་ཆོས་འཕེལ་གླིང་། ཏི་ཛུ་དར་རྒྱས་གླིང། ཀྲུ་ཀྲིང་ཁ་ཐོར་ས་གནས་ཁག་ཏུ་ཕྱོགས་བསྐྱོད་བྱས།

འདས་པའི་ལོ་ ༣༥ རིང་སྤྱི་དོན་གཞན་ཕན་ལྷག་བསམ་འཕྱུག་མེད་ཀྱི་རང་ནུས་གང་འཇོན་ཞུ་ཁུལ་ཡིན་པས་རྒྱ་ཆེ་མདོ་སྨད་མི་མང་ཡོངས་ནས་སྔོན་འགྲོ་དང་། དངོས་གཞིའི་འོས་བསྡུའི་སྐབས་གུས་པར་ཚད་མཐོའི་རྒྱབ་སྐྱོར་གནང་བར་ད་རེས་གོ་སྐབས་འདི་བརྒྱུད་ནས་བཀའ་དྲིན་ཆེ་ཞུ་བ་དང་། རང་ཉིད་ཀྱི་རིན་ཐང་ཆེ་བའི་མང་གཙོའི་འོས་ཤོག་དེ་གུས་པར་གནང་བ་ལྟར། མང་ཚོགས་ཀྱི་མངོན་འདོད་དང་བསམ་འཆར་ཡིད་ཆེས་འགན་བསྐུར་དེ་དག་འགྲུབ་ཐུབ་པའི་གདེང་སྤོབས་དང་ལངས་ཕྱོགས་བརྟན་པོ་ཡོད། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། ཡེ་ཤེས་སྒྲོལ་མ།

༄༅། །གུས་མོ་ ༡༩༧༡ ལོར་ཕ་བློ་བཟང་བསྟན་འཛིན་གྱི་བུ་མོར་བཞུགས་སྒར་དུ་སྐྱེས། ྋགོང་ས་མཆོག་དང་བཙན་བྱོལ་བོད་གཞུང་གི་བཀའ་དྲིན་འོག་རྡ་ས་བོད་ཁྱིམ་སློབ་གྲྭར་འགྲིམས་ནས་སློབ་སྦྱོང་རིམ་ཐོན་བྱས། ༡༩༩༦ ནས་ ༡༩༩༩ ལོའི་བར་རྡ་ས་ས་གནས་བུད་མེད་ཚོགས་པའི་རྒྱུན་ལས་དང་། ༢༠༠༣ ལོར་རྡ་ས་མདོ་སྨད་ས་རྒྱུན་དངུལ་གཉེར། ༢༠༠༣ ནས་ ༢༠༠༦ ལོའི་བར་དབུས་བོད་ཀྱི་བུད་མེད་ལྷན་ཚོགས་ཀྱི་འབྲེལ་མཐུད་འགན་འཛིན། ༢༠༠༥ ལོར་དབུས་བུད་མེད་ལྷན་ཚོགས་ཀྱི་གོ་སྒྲིག་འོག་རྒྱ་གར་གྲོང་ཁྱེར་ཆེ་ཁག་བཞིའི་ནང་ཞི་བའི་གོམ་བགྲོད་གནང་སྐབས་ལྡེ་ར་ལྡུན་ནས་རྒྱལ་ས་ལྡི་ལི་བར་མི་གྲངས་ ༡༧༠ ལྷག་གི་འགོ་ཁྲིད་དང་ཚོགས་གཙོའི་འགན་ཞུས། རྒྱ་གར་བྱང་ཤར་མངའ་ཁོངས་སུ་ཡོད་པའི་བོད་མི་འདུས་སྡོད་ས་གནས་ཁག་ ༡༨ ལ་དབུས་བུད་མེད་རྒྱུན་ལས་ཀྱི་ལས་དོན་སྒྲུབ་ཕྱོགས་དང་མ་འོངས་ལས་འཆར་སྐོར་ལ་དྲིལ་བསྒྲགས་ཞུས། ༢༠༠༦ ལོར་དབུས་བུད་མེད་ལྷན་ཚོགས་ཀྱི་ཚོགས་ཆེན་ཐོག་ཡང་བསྐྱར་རྒྱུན་ལས་ལ་འདེམས་ཐོན་བྱུང་བ་བཞིན་ ༢༠༠༩ བར་ལས་ཁུར་ཞུས། ༢༠༠༩ ཟླ་ ༡༡ ནང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ལྔ་པ་ཨི་ཊ་ལིའི་རྒྱལ་སར་ཚོགས་སྐབས་གོ་སྒྲིག་ཚོགས་ཆུང་ནང་ལས་ཀ་བྱས། ༢༠༠༩ ལོར་མདོ་སྨད་དབུས་སྤྱི་ཁྱབ་རྒྱུན་ལས་སུ་བདམས་ཐོན་བྱུང་བ་ལྟར་སྐབས་བཅུ་བཞི་པའི་ཚོགས་གཙོའི་ལས་འགན་ཁུར། ཕྱི་ལོ་ ༢༠༠༨ ལོ་ནས་བོད་ནང་ཛ་དྲག་གནས་ཚུལ་བྱུང་སྟེ་ ༢༠༡༡ ལོར་བཞུགས་སྒར་ཀིརྟིའི་བྱེས་པ་གྲྭ་ཚང་གི་དགེ་འདུན་པ་ ༡༠༠ ཡིས་རྡ་ས་ནས་ལྡི་ལི་བར་སེར་བསྒྲེངས་སྙན་སྐུལ་མཆོད་འབུལ་ཞེས་གོམ་བགྲོད་སྐབས་ཀྱི་ཚོགས་གཙོའི་ལས་འགན་ཁུར། བོད་ལྗོངས་མདོ་སྨད་ཆོལ་ཁའི་ྋསྐུའི་གྱ་སྟོན་གོ་སྒྲིག་ཚོགས་ཆུང་ལ་བདམས་ཐོན་བྱུང་བ་ལྟར་དངུལ་གཉེར་གྱི་ལས་འགན་ཁུར།

༢༠༠༧ ལོར་སྐབས་བཅུ་བཞི་པའི་མདོ་སྨད་ཆོལ་ཁའི་སྤྱི་འཐུས་དང་། ༢༠༡༡ ལོར་སྐབས་བཅོ་ལྔ་པ། ༢༠༡༦ ལོར་སྐབས་བཅུ་དྲུག་པ། ༢༠༢༡ ལོར་སྐབས་ ༡༧ པའི་བོད་མི་མང་སྤྱི་འཐུས་བཅས་སུ་བདམས་ཐོན་བྱུང་བ་ལྟར་སྤྱི་འཐུས་ཀྱི་ལས་འགན་ཁུར་མུས་ཡིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། བློ་བཟང་ཐུབ་བསྟན།

༄༅། །ཕྱི་ལོ་ ༡༩༨༡ ལོར་རེབ་གོང་རྒྱལ་པོ་དཔོན་ཚང་དུ་སྐྱེས། ཕྱི་ལོ་ ༡༩༩༨ ལོར་བཙན་བྱོལ་དུ་འབྱོར་ནས་བོད་ཁྱིམ་སློབ་གྲྭར་སློབ་སྦྱོང་དང་།  ཕྱི་ལོ་ ༢༠༠༣ ནས་ ༢༠༠༤ ལོ་བར་ལྡི་ལིར་རྟེན་གཞི་བྱས་པའི་ (Mother’s International School) སློབ་གྲྭའི་ནང་སྤྱི་ཚོགས་འབྲེལ་ལམ་སྐོར་ཆེད་སྦྱོང་བྱས། ཕྱི་ལོ་ ༢༠༠༥ ནས་ ༢༠༡༢ བར་སྤྱི་འཐུས་ཚོགས་ཟུར་དང་བདེ་སྲུང་བཀའ་ཟུར་འཇིགས་མེད་རིན་པོ་ཆེ་མཆོག་གི་སྐུ་སྒེར་གྱི་དྲུང་ཡིག་གི་འགན་ཁུར་བླངས། ཕྱི་ལོ་ ༢༠༠༦ ལོ་ནས་ཨ་རིའི་གྷུ་ར་སུ་ཁྱིིམ་ཚང་གི་ཐེབས་རྩ་དང་ཧྥ་རན་སིའི་ (Graines d’Adenir) རོགས་སྐྱོར་ཚོགས་པ་གཉིས་ལ་འབྲེལ་ལམ་ཞུས་འབྲེལ། གཞིས་བྱེས་བོད་མིའི་སྤྱི་ཚོགས་གང་སར་བོད་མི་སྐྱོ་བོའི་རིགས་ལ་འཚོ་སྣོན་དང་། སློབ་ཕྲུག་མང་པོར་སློབ་སྦྱོང་མཐུན་རྐྱེན་འཚོལ་སྒྲུབ་ཞུས་ཡོད།༢༠༡༠ ནས་ལོ་བཞིའི་རིང་ཀུན་ཕན་རིགས་གནས་སློབ་གྲྭའི་དྲུང་ཆེའི་ལས་ཁུར་དང་ ༢༠༡༤ ནས་སློབ་གྲྭ་དེ་གའི་སྤྱི་ཁྱབ་འགན་འཛིན་གྱི་ལས་ཁུར་བླངས་ཏེ་རང་རིགས་གཞོན་སྐྱེས་རྣམས་ལ་དབྱིན་ཡིག་དང་། གློག་ཀླད་སོགས་ཆེད་སྦྱོང་མཐུན་རྐྱེན་བསྒྲུབས། ཕྱི་ལོ་ ༢༠༡༥ ལོར་༸སྐུའི་གྱ་སྟོན་སྐབས་མདོ་སྨད་གྱ་སྟོན་གོ་སྒྲིག་ཚོགས་ཆུང་གི་རེ་སྐུལ་ལྟར། མདོ་སྨད་ཆོལ་ཁོངས་གི་མཁན་བླ་སྤྲུལ་རྣམ་པ་དང་། ཡབ་གཞིས་ནང་མི། གྱ་སྟོན་སྦྱིན་བདག་རྣམས་ལ་བཞུགས་གནས་མགྲོན་ཁང་དང་། རླངས་འཁོར་གོ་སྒྲིག་སོགས་མཐུན་རྐྱེན་ཞུ་དགོས་རིགས་ཞུས། ༢༠༡༦ ནས་ ༢༠༡༨ བར་དུ་མདོ་སྨད་དབུས་སྤྱི་ཁྱབ་རྒྱུན་ལས་ཁང་གི་བདེ་དོན་འགན་འཛིན་གྱི་ལས་འགན་ཁུར་ཞུས། ད་ལྟའི་ཆར་བདེན་རྒྱབ་རྩོམ་སྒྲིག་ཚོགས་ཆུང་གི་འབྲེལ་མཐུད་པའི་འགན་འཁུར་དང་། སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་ཡོད་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། དགེ་བཤེས་རྔ་བ་གངས་རི།

༄༅། །ཕྱི་ལོ་ ༢༠༠༥ ནས་བཟུང་བོད་བསྟན་སྲིད་ཀྱི་ཆེད་དུ་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་གཞོན་དང་དྲུང་ཆེ། མོན་གྷོ་ས་གནས་གྲོས་ཚོགས་སོགས་ཀྱི་འགན་ཁུར་མང་པོ་ཞིག་ཁུར་ཡོད་པ་མ་ཟད།  བོད་དོན་དྲིལ་བསྒྲགས་ཆེད་ཕྱི་ལོ་ ༢༠༠༩ ལོར་རྒྱ་གར་རྒྱལ་ཡོངས་སུ་རྐང་འཁོར་སྐོར་སྐྱོད་དང་གོམ་བགྲོད། ཟས་བཅད་ངོ་རྒོལ་སོགས་ཀྱི་ལས་འགུལ་མང་པོ་ཞིག་གིས་འགན་ཁུར་གཙོ་ཁུར་གནང་ནས་སྤེལ་ཡོད། ཕྱི་ལོ་ ༢༠༡༡ ལོར་དཔལ་ལྡན་འབྲས་སྤུངས་ནས་དགེ་བཤེས་དམ་བཅའ་བཞག ཡང་ཕྱི་ལོ་ ༢༠༡༠ ལོར་བཀའ་སྤྱི་གསར་འདེམས་སྐབས་ཀྱི་དགོས་བབ་དང་བསྟུན་བོད་མི་མང་སྤྱི་འཐུས་ཞེས་པའི་གསར་ཤོག་ཞིག་འདོན་སྤེལ་གྱིས་རྩོམ་སྒྲིག་དང་འགྲེམ་སྤེལ་བྱས་ཡོད་ལ།  སྔ་ཕྱིར་གསར་ཤོག་དང་དུས་དེབ། དྲ་ལམ་ཁག་ཏུའང་། སྤྱི་ཚོགས་དཔྱད་གླེང་དང་འབྲེལ་བའི་རྩོམ་ཡིག་མང་དག་ཅིག་སྤེལ་ཡོད།

མོན་གྷོ་མདོ་སྨད་ས་གནས་རྒྱུན་ལས་ཚོགས་གཙོ་ནས་བཟུང་མདོ་སྨད་དབུས་རྒྱུན་སྐབས་བཅོ་ལྔ་བའི་རྒྱུན་ལས་དང་མཉམ་དུ་༸སྐུའི་གྱ་སྟོན་ཚོགས་ཆུང་དུ་ལོ་གསུམ་ལ་ཕྱག་ལས་གནང་ཡོད་པ་དང་། དེ་རྗེས་དབུས་རྒྱུན་སྐབས་བཅུ་དྲུག་པའི་ཚོགས་གཙོའི་འགན་ཁུར་ཡོད་པ་མ་ཟད། ད་ལྟའི་སྐབས་བཅུ་བདུན་པའི་མདོ་སྨད་དབུས་རྒྱུན་ཚོགས་གཙོའི་འགན་ཁུར་ཡང་གནང་བཞིན་ཡོད་པ། དེ་བཞིན་བོད་མི་མང་སྤྱི་འཐུས་སྐབས་ ༡༦ པའི་ལས་ཁུར་ཞུས་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་མུས་ཡིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང་། ཆོས་གྲགས་རྒྱ་མཚོ།

༄༅། །༡༩༨༩ ལོའི་ཟླ་ ༠༢ པའི་ཚེས་ ༠༡ ཉིན་མཚོ་སྔོན་གཅན་ཚ་རུ་སྐྱེས་ཏེ་བོད་ནང་དུ་སློབ་འབྲིང་བར་ཕྱིན། ༢༠༠༥ ལོར་བཙན་བྱོལ་དུ་འབྱོར་ནས་སུ་ཇཱ་སློབ་གྲྭར་ཞུགས། སློབ་གྲྭའི་དུས་སྐབས་ནས་སློབ་སྦྱོང་ཡག་ཤོས་གྲས་དང་། བོད་ཨིན་གཉིས་ཀྱི་བགྲོ་གླེང་དང་སྙན་རྩོམ་འགྲན་བསྡུར་ཁྲོད་བྱ་དགའ་འང་ཐེངས་མང་བླངས། ༢༠༡༡ ལོར་ཤིང་བཟའ་རིན་པོ་ཆེས་བཀོད་སྒྲིག་འོག་བོད་མིའི་སྒྲིག་འཛུགས་ཁྱབ་ཁོངས་རྒྱ་གར་ནང་སྙན་ངག་གྱེར་འདོན་གྱི་སྡིངས་ཆའི་སྟེང་།  འགྲན་ཞུགས་པ་ ༢༧༠ ཁྲོད་རྩེར་སོན་ཨང་རིམ་བཅུའི་ནང་བདམས། ༢༠༡༢ ལོར་བོད་ཁྱིམ་གོ་པལ་པུར་སློབ་ཞུགས་བྱས་ནས་༢༠༡༤ ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་བོད་ཁྱིམ་གོ་པལ་པུ་སློབ་གྲྭའི་སློབ་མ་ཡོངས་ལས་ཨང་རིམ་དང་པོ་བླངས། ༢༠༡༤ ལོར་ལྡི་ལིའི་མཐོ་སློབ་རྩེ་ཕུད་ཀྱི་གྲས་ (Delhi University- Ramjas) ནང་དང་ (Indira Gandhi National Open University- IGNOU) གཉིས་ནས་ཆབ་སྲིད་རིག་པར་སློབ་མཐར་སོན།

ལས་ཀའི་ཉམས་མྱོང་། ༢༠༡༦ ལོར་ལྡི་ལིའི་བོད་ཁྱིམ་སྡོད་ཁང་གི་མཐོ་རིམ་སློབ་མ་ཡོངས་ནས་རོ་ཧི་ནེ་ས་གནས་གཞོན་ནུའི་དྲུང་ཡིག་ཏུ་བསྐོས། ༢༠༡༦ ལོར་ལྡི་ལིའི་བོད་ཁྱིམ་སྡོད་ཁང་གི་དཔེ་མཛོད་དོ་དམ་པ་བྱས། མཐོ་སློབ་འགྲིམས་རིང་སློབ་གྲོགས་གཞན་གསུམ་དང་ལྷན་ ༼པོ་ཏ་ལ་རོལ་ཚོགས་༽ གསར་འཛུགས་ཀྱིས་ལྡི་ལིའི་རྒྱ་གར་གྱི་མཐོ་སློབ་འདྲ་མིན་ནང་བོད་པའི་ཚབ་མཚོན་གྱིས་རིག་གཞུང་འཁྲབ་སྟོན་ཐེངས་མང་བྱས། མཐོ་སློབ་འགྲིམས་ཞོར་སློབ་སྦྱོང་ཡག་པོ་ཡོད་ཀྱང་དཔལ་འབྱོར་གྱི་དཀའ་ངལ་ཡོད་པའི་མདོ་སྨད་ཀྱི་སློབ་མ་ལྔ་ལ་ཧིན་སྒོར་འབུམ་གསུམ་ལྷག་གི་སྦྱིན་བདག་བཙལ། རེ་ཟུང་སློབ་མཐར་མ་ཕྱིན་བར་དུ་སློབ་ཡོན་ཙམ་མ་ཟད། ཉིན་རེའི་ཟས་སོང་སོགས་ལའང་སྦྱིན་བདག་རག ༢༠༡༨ ལོར་སློབ་ཆེན་སློབ་མ་དྲུག་ཅུ་ལྷག་འཁྲིད་དེ་རྒྱལ་སྤྱིའི་དབུ་མའི་ལམ་གྱི་ཚོགས་ཆེན་དུ་ཞུགས་པ་དང་། ཚོགས་ཐོག་ཏུ་གཏམ་བཤད་དང་། ཚོགས་མི་བདུན་བརྒྱ་ལྷག་ནས་འོས་བསྡུས་ཀྱིས་དབུས་སྤྱི་ཁྱབ་རྒྱུན་ལས་སུ་བདམས། དབུས་ཀྱི་མ་དངུལ་བེད་སྤྱོད་གཏོང་མ་དགོས་བའི་ཐོག་ལོ་རེར། བོད་དང་རྒྱ་དཀར་ནག་གཉིས་ཀྱི་མཁས་དབང་འདྲ་མིན་གྲངས་ཉི་ཤུ་ལྷག་གདན་ཞུས་ཀྱིས། སྔར་སྲོལ་མེད་པའི་ (དབུ་མའི་ལམ་ཐོག བོད་རིགས་གཞོན་སྐྱེས་བསམ་བློ་བའི་ཚོགས་འདུ།) ཐེངས་དང་པོ་དང་གཉིས་པ་སོགས་ཀྱི་སྦྱིན་བདག་ཟུར་དུ་བཙལ། མཐོ་སློབ་འགྲིམས་བཞིན་པའི་གཞོན་སྐྱེས་གྲངས་བརྒྱ་ལྷག་ལ་དབུ་མའི་ལམ་གྱི་སྲིད་བྱུས་ཐོག་ཟབ་སྦྱོང་སོགས་བཀོད་སྒྲིག་གི་གཙོ་འགན་བཞེས། ༢༠༡༩ ལོར་སྐབས་བཅུ་པའི་རྡ་ས་ས་གནས་འཐུས་མིར་བདམས་ཐོན་བྱུང་བ་དང་། ༢༠༢༡ ལོར་སྐབས་ ༡༧ པའི་བོད་མི་མང་སྤྱི་འཐུས་སུ་བདམས་ཐོན་བྱུང་བ་ལྟར་ལས་ཁུར་ཞུ་མུས་ཡིན་པ་བཅས་ཀྱི་ངོ་སྤྲོད་མདོར་བསྡུས་སུ། །

 

མིང༌། བསྟན་འཛིན་འཇིགས་མེད།

༄༅། །གུས་པ་ད་ལྟའི་ཆར་ཨ་རིའི་མངའ་སྡེ་མི་ནེ་སོ་ཊའི་ནང་གནས་སྡོད་བྱེད་བཞིན་ཡོད། བལ་ཡུལ་གྱི་རྒྱལ་ས་ཀཋ་མཎཌུར་ཕ་གཉའ་ནང་བཀྲིས་དོན་གྲུབ་དང་། མ་སྐྱིད་གྲོང་ཕུར་བུ་སྒྲོལ་མ་གཉིས་ཀྱི་བུར་སྐྱེས། འཛིན་རིམ་བཅུ་པ་བར་རྡོ་རྗེ་གླིང་སེནཊ་ཇོ་སེབ་ནོརྠ་པོཨེཎཊ་སློབ་གྲྭར་ཕྱིན་པ་དང་། ༡༩༩༩ ནང་ཨ་རིར་འབྱོར་ཏེ། ཁོ་ལོ་ར་ཌོའི་གཙུག་ལག་སློབ་གྲྭ་ནས་ཉེ་བའི་གཙུག་ལག་རབ་འབྱམས་པའི་ཕྱག་འཁྱེར་བླངས། ད་ལྟ་མི་ནེ་སོ་ཊའི་གཙུག་ལག་མཐོ་སློབ་ལ་སློབ་དཔོན་ཕྱག་འཁྱེར་གྱི་ཆེད་དུ་སློབ་སྦྱོང་བྱེད་མུས་དང་། ༢༠༢༠།༢༠༢༡ ལོའི་ཏཱ་ལའི་བླ་མའི་མཐོ་རིམ་སློབ་ཡོན་ཐོབ་མཁན་གྱི་གྲས་ཞིག་ཡིན།

ཁོ་ལོ་ར་ཌོའི་གཙུག་ལག་སློབ་གྲྭར་ཡོད་སྐབས། བོད་རང་བཙན་སློབ་ཕྲུག་ཚོགས་པའི་ཡན་ལག་གསར་འཛུགས་བྱས་པ་དང་། དེའི་རྗེས་ཁོ་ལོ་ར་ཌོའི་བོད་ཀྱི་གྲོགས་པོ་ཚོགས་པའི་སྤྱི་ཁྱབ་འགན་འཛིན་གྱི་འགན་འཁུར་ཞུས། ༢༠༠༦ ལོར་ཁོ་ལོ་ར་ཌོ་བོད་རིགས་སྤྱི་མཐུན་ཚོགས་པའི་ཚོགས་གཙོར་འོས་འདེམས་བྱུང་། ༢༠༠༩ ནང་མི་ནེ་སོ་ཊར་གནས་སྤོས་བྱས་རྗེས་ས་གནས་གཞོན་ལྷན་གྱི་ཚོགས་གཞོན་ལོ་གཉིས་དང་། དེའི་རྗེས་སུ་ས་གནས་གཞོན་ལྷན་གྱི་ཚོགས་གཙོའི་ལས་ཁུར་ལོ་གཉིས་རིང་ཞུས། ༢༠༡༣ ནང་བོད་ཀྱི་གཞོན་ནུ་ལྷན་ཚོགས་ཀྱི་དབུས་སྤྱི་ཁྱབ་རྒྱུན་ལས་ཀྱི་ཚོགས་གཙོར་འོས་འདེམས་བྱུང་། དེ་ནས་དྷ་རམ་ས་ལར་གནས་སྤོས་ཀྱིས་འགན་འཁུར་བླངས་པ་དང་། ༢༠༡༦ ལོར་སླར་ཡང་ཚོགས་གཙོར་སྐྱར་འདེམས་བྱུང་བས་ ༢༠༡༩ བར་ཁྱོན་བསྡོམས་ལོ་དྲུག་ཧྲིལ་པོར་ཞབས་ཞུ་ཞུས་པ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། དོན་གྲུབ་ཚེ་རིང་།

༄༅། །ཕྱི་ལོ་ ༡༩༨༣ ལོར་ (Chandigarh) མཐོ་སློབ་ཐོན་རྗེས་ལོ་ངོ་ ༡༣ ལྷག་བོད་ཕྲུག་ཁྱིམ་སྡེར་ཤེས་ཡོན་སློབ་སྟོན་པའི་འགན་འཁུར་ཞུས། དེ་རྗེས་ཨ་རི་ཨེམ་ཧས་གྲོང་ཁྱེར་ལ་ཡོད་པའི་མེ་སི་ཆུ་སེཊ་གཙུག་ལག་སློབ་གྲྭ་ཆེན་མོ་ (University of Massachusetts) ནང་ལོ་ངོ་ ༢༥ སློབ་ཕྲུག་འབྲེལ་མཐུད་ཀྱི་ལས་འགན་བྱེད་མུས་དང་གཞན་ཡང་ཚོགས་པ་གཞན་ཁག་གི་འགན་འཛིན་ལྷན་ཚོགས་ཀྱང་བྱས་མྱོང་ཡོད། ངས་འདས་པའི་ལོ་ངོ་བཞི་བཅུ་ལྷག་གི་ནང་། ཤེས་ཡོན་གྱི་བསྟི་གནས་ཁང་དང་། བཙན་བྱོལ་བོད་མིའི་སྤྱི་ཚོགས་དང་། ཆབ་སྲིད་ཚོགས་པ་ཁག་གི་ནང་འགོ་ཁྲིད་ཀྱི་ལས་སྣེ་འདྲ་མིན་ཐོག་ཞབས་ཞུ་བྱས། དེ་བཞིན་ཨ་རིའི་ནང་གཞི་རིམ་སྤྱི་ཚོགས་ཀྱི་འགན་འཁུར་བླངས་པའི་རྒྱུད་རིམ་ཁྲོད། འདས་པའི་ལོ་ངོ་ཉི་ཤུའི་རིང་གུས་རང་ཉིད་ནས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས། (Jim McGovern) ལགས་ཀྱིས་དབུས་པའི་ (Massachusetts) གྱི་གྲོས་ཚོགས་འཐུས་མི་རྣམས་ལ་བོད་དོན་དང་འབྲེལ་བའི་ཞུ་གཏུག་གི་ལས་འགུལ་སྔ་ཕྱི་བར་གསུམ་བརྩམས་ཡོད་པས་ཁོང་རྣམ་པས་བོད་དོན་ཐད་རྒྱབ་སྐྱོར་སྔར་ལྷག་གིས་ནུས་པ་ལྡན་པའི་གྲོས་ཆོད་ཡང་འཇོག་ཐུབ་ཡོད་པའི་མྱོང་ཚོར་ཆེན་པོ་བྱུང་བ་དང་། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། ཐུབ་བསྟན་དབང་ཆེན།

༄༅། །ཐུབ་བསྟན་དབང་ཆེན་ནི་ ༡༩༥༤ ལོར་སྐྱིད་གྲོང་དུ་སྐྱེས།   ༡༩༥༩ ལོར་རྒྱ་གར་ཕྱོགས་སུ་བྲོས་བྱོལ་དུ་སླེབས།    དེ་ནས་ྋགོང་ས་ྋསྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་དང་རྒྱ་གར་གཞུང་བཅས་ཀྱི་བཀའ་དྲིན་ལ་བརྟེན་ནས་བོད་གཞུང་གཏན་སློབ་ཌལ་ཧོསེར་སློབ་སྦྱོང་བྱས།   དེ་རྗེས་རྡ་ས་རྣམ་རྒྱལ་གྲྭ་ཚང་ལ་འཛུལ་ཞུགས་ཀྱིས་ནང་ཆོས་ལ་བསླབ་པ་སློབ་གཉེར་ཞུས།   ༡༩༨༢ ལོར་སེ་པན་ནང་པའི་ཆོས་ཚོགས་ཞིག་གི་རེ་འདུན་ལྟར་ཆོས་ཚོགས་ཀྱི་དབྱིན་ཇིའི་སྐད་བསྒྱུར་ཆེད་འབྱོར།  སེ་པན་ནང་གཏན་སྡོད་བྱེད་མཁན་བོད་མི་དང་པོ་དེ་ཆགས་འདུག།   དེ་ནས་ྋགོང་ས་མཆོག་གི་བཀའ་སློབ་ལམ་སྟོན་བཞིན་ ༡༩༩༤ ལོར་ ༼སེ་པན་བོད་ཀྱི་ཁང་པ་༽ ཞེས་རིག་གཞུང་བསྟི་གནས་ཁང་གསར་འཛུགས་དང་། ྋགོང་ས་མཆོག་ནས་དབུ་འབྱེད་མཛད་སྒོ་བཀའ་དྲིན་བསྐྱངས་གནང་མཛད། སྤྱི་ལོ་ ༢༠༡༡ དང་ ༢༠༡༦ ལོར་སྲིད་སྤྱིའི་འོས་བསྡུ་ཆེན་མོར་ཡུ་རོབ་དང་ཨ་ཕི་རི་ཀའི་སྤྱི་འཐུས་སུ་འོས་འདེམས་བྱུང་བ་དང་འདི་ལོ་ ༢༠༢༡ སྲིད་སྤྱིའི་འོས་བསྡུ་ཆེན་མོར་ཡུ་རོབ་མི་མང་རྣམས་ནས་རེ་བ་དང་ཡིད་ཆེས་ཤུགས་ཆེ་གནང་བར་བརྟེན་བསྐྱར་དུ་སྐབས་ ༡༧ པའི་སྤྱི་འཐུས་སུ་འདེམས་ཐོན་བྱུང་བ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང༌། ཐུབ་བསྟན་རྒྱ་མཚོ།

༄༅། །སྤྱི་ལོ ༡༩༨༥ ནས ༡༩༩༠ བར་དམུ་དགེ་དགོན་དུ་ཕར་ཕྱིན་བར་དུ་སློབ་སྦྱོང་བྱས། སྤྱི་ལོ ༡༩༩༡ ལོར་རྒྱ་གར་ནང་བཙན་བྱོལ་དུ་འབྱོར་རྗེས་སྦིར་སུ་ཇའི་བོད་ཕྲུག་ཁྱིམ་སྡེའི་སློབ་གྲྭར་འགྲིམས་ཏེ་ཨིན་སྐད་ལ་སློབ་སྦྱོང་བྱས། རྗེས་སུ་ཝ་ར་ཎ་སི་མཐོ་རིམ་སློབ་གྲྭར་ལོ་གསུམ་རིང་ལ་བོད་ཀྱི་རིག་གནས་ལ་སློབ་སྦྱོང་བྱས། སྤྱི་ལོ་ ༡༩༩༨ ལོར་ཧྥ་རན་སིར་འབྱོར་ཏེ་སྤྱི་ལོ་ ༢༠༠༢ བར་དུ་ཧྥ་ཡིག་སློབ་སྦྱོང་བྱས་ཏེ་གཞི་རིམ་འཛིན་གྲྭ་བཅུ་གཉིས་པའི་ལག་ཁྱེར་བླངས།  དེ་ནས་ལོ་གསུམ་རིང་ (Sorbonne Universit Paris I)  གཙུག་ལག་སློབ་ཆེན་ཏུ་ཁྲིམས་ལུགས་ཐོག་སློབ་སྦྱོང་བྱས།  སྤྱི་ལོ་ ༢༠༡༡ ནས་ ༢༠༡༥ བར་དུ་ཧྥ་རན་སིའི་རྒྱ་ནག་སྲོལ་རྒྱུན་གསོ་རིག་སློབ་གླིང་དུ་ཀྲུང་དབྱིའི་སྨན་གཞུང་དང་ལག་ཐབས་སྣ་ཚོགས་ལ་སློབ་སྦྱོང་བྱས་ཏེ་སྤྱི་ལོ་ ༢༠༡༥ ནང་སློབ་སྦྱོང་མཐར་ཕྱིན།  སྤྱི་ལོ་ ༢༠༠༣ ནས་ ༢༠༡༥ བར་དུ་ཧྥ་རན་སིའི་བོད་རིགས་ཚོགས་པའི་ཚོགས་གཙོའི་འགན་འཁུར་བྱས།  སྤྱི་ལོ་ ༢༠༡༧ ནས་ ༢༠༡༩ བར་ཧྥ་རན་སིའི་མདོ་སྨད་ས་གནས་རྒྱུན་ལས་ཚོགས་གཙོ་བྱས།  བྱམས་བརྩེའི་སློབ་གྲྭའི་འགན་འཛིན་གྱི་ལས་འཁུར་བྱས་མྱོང། ད་ལྟ་སྐབས་ ༡༧ པའི་སྤྱི་འཐུས་ཀྱི་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

 

མིང་། རྡོ་རིང་བསྟན་འཛིན་ཕུན་ཚོགས།

༄༅། །རྡོ་རིང་བསྟན་འཛིན་ཕུན་ཚོགས་ནི་ ༡༩༩༤ ལོར་བོད་ནས་འབྱོར་རྗེས་མ་སུ་རི་བོད་ཁྱིམ་དུ་སློབ་འཇུག་ཞུས།  ༢༠༠༥ ལོར་སློབ་གྲྭའི་སྤྱི་ཁྱབ་རྒན་བདག་གི་འགན་ཁུར་ཞུས།  ༢༠༠༧ ལོར་མ་རྡ་ར་སི་བོད་ཕྲུག་ཚོགས་པའི་རྒྱུན་ལས་དང་། ༢༠༠༨ ལོར་ཚོགས་གཙོ་དང་རྒྱ་གར་རྒྱལ་ཡོངས་བོད་རིགས་མཐོ་སློབ་སྒེར་ལངས་ཀྱི་གོ་སྒྲིག་ཚོགས་ཆུང་གི་རྒྱུན་ལས་བྱས།  ༢༠༠༩ ལོར་བོད་རིགས་མཐོ་རིམ་སློབ་མའི་ཚོགས་ཆེན་སྐབས་ ༣ པའི་སྤྱི་ཁྱབ་འབྲེལ་མཐུད་པ།  ༢༠༡༢ ལོར་མ་རྡ་ར་སི་བོད་ཕྲུག་ཚོགས་པའི་ཚོགས་གཙོ་དང་རྒྱལ་ཡོངས་མང་གཙོ་ཚོགས་པའི་དབུས་རྒྱུན་བྱས།  ༢༠༡༣ ལོར་མ་རྡ་ར་སི་ཡི་ཤུའི་མཐོ་སློབ་ནང་བོད་དོན་ཉམས་ཞིབ་པ་ཀོ་ལོ་ཌི་ཨར་ཕི་གདན་ཞུས་ཀྱིས་བོད་དོན་གླེང་བ་ཐེངས་དང་པོ་ཆགས་ཡོད།  ༢༠༡༤ ལོར་རྒྱ་རིགས་དང་ཕྱི་རྒྱལ་སློབ་ཕྲུག་ཡོད་པའི་རྒྱ་གར་མཐོ་སློབ་ཏུ་བོད་རིགས་དང་བོད་དོན་ངོ་སྤྲོད།  ༢༠༡༤ ལོར་རྒྱལ་ཡོངས་མང་གཙོ་ཚོགས་པའི་དབུས་རྒྱུན་དང་དྲུང་ཆེའི་འགན་འཁུར་ཞུས།  གཞན་ཡང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་ནང་ཉམས་ཞིབ་ལས་རོགས་དང་། བོད་ཀྱི་ལྟ་ཞིབ་ཅེས་པའི་ནང་ཨིན་ཡིག་ཉམས་ཞིབ་པ་བྱས།  ༢༠༡༨ ནས་ ༢༠༢༠ བར་ཁོན་སི་ལན་ཌི་ནང་བོད་དོན་དང་འབྲེལ་བའི་ལས་འགུལ་དང་།  ཡུ་གུར་དང་བོད་རིགས་དང་ཧོང་ཀོང་དང་ཝི་རྡི་ནམ་མཉམ་དུ་བོད་དོན་ལས་འགུལ་གང་མང་སྤེལ་ཐུབ་པ་བྱུང་།  ༢༠༡༩ ལོར་ཁོན་སི་ལན་ཌི་བོད་རིགས་མཐུན་ཚོགས་ཀྱི་རྒྱུན་ལས་དང་ཚོགས་གཙོར་འེས་འདེམས་བྱུང་།  ༢༠༢༠ ལོར་ཨོ་གླིང་ནང་གི་རྒྱ་གཞུང་ལ་རྒོལ་བའི་ཚོགས་པ་མང་གཙོ་སྲུང་སྐྱོབ་གསར་འཛུགས་དང་སྟངས་འཛིན་ཚོགས་ཆུང་གི་ཚོགས་མི། ཕྱི་ལོ་ ༢༠༢༡ ལོར་སྐབས་ ༡༧ པའི་སྤྱི་འཐུས་སུ་འོས་འདེམས་ཀྱིས་ལས་ཁུར་ཞུ་བཞིན་པ་བཅས་ཀྱི་ལོ་རྒྱུས་སྙིང་བསྡུས་སུ། །

Menu