༄༅། །ཕྱི་ལོ་ ༢༠༢༤ ཟླ་ ༥ ཚེས་ ༡༣ ཉིན་རྒྱ་གར་རྒྱལ་ས་ལྡི་ལིའི་ཨེམ་སི་སྨན་ཁང་དུ་རྒྱ་གར་ཤར་ཕྱོགས་སུ་རྟེན་གཞི་བྱས་པའི་བྷི་ཧར་མངའ་སྡེའི་སྤྱི་ཁྱབ་བློན་ཆེན་གཞོན་པ་ཟུར་པ་སྐུ་ཞབས་ Shri Sushil Kumar Modi མཆོག་རང་ལོ་ ༧༢ ལ་སྐུ་ཚེའི་འཕེན་པ་རྫོགས་པར་དཔལ་ལྡན་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས་དམ་པ་ཚེ་འདས་ཀྱི་སྐུ་ཟླ་ Jessie George ལགས་སུ་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ཐུགས་གསོའི་འཕྲིན་ཡིག་ཅིག་ཕུལ་གནང་ཡོད་འདུག
ཐུགས་གསོའི་འཕྲིན་ཡིག་ནང་འཁོད་དོན། སྐུ་ཉིད་ཀྱི་བཟའ་ཟླ་སྐུ་ཚེ་མ་ཟིན་པའི་ཡིད་སྐྱོ་བའི་གནས་ཚུལ་གོ་བར་ཧ་ཅང་གིས་བློ་ཕམ་ཆེན་པོ་བྱུང་། དམ་པ་ཚེ་འདས་ཁོང་ནི་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་ཞིག་དང་བོད་པའི་གྲོགས་པོ་ཡག་པོ་ཞིག་ཀྱང་ཡིན་པས། ད་ཆ་ཁོང་སྐུ་ཚེའི་འཕེན་པ་རྫོགས་པ་འདི་བོད་དང་བོད་མི་ཚོར་གྱོང་གུན་ཆེན་པོ་ཞིག་ཡིན།
དེ་སྔ་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་བྷི་ཧར་མངའ་སྡེ་རུ་བོད་དོན་ཞུ་གཏུགས་ལས་འགུལ་སྐབས་ཧིན་བོད་མཛའ་འབྲེལ་ཚོགས་པས་མཐུན་འགྱུར་འོག་ཁོང་དང་མཇལ་འཕྲད་ཀྱང་བྱུང་ཡོད།
སྐབས་བཅུ་བདུན་པའི་བོད་མི་མང་སྤྱི་འཐུས་ཡོངས་དང་། སོ་སོ་སྒེར་གྱི་ངོས་ནས་ཐུགས་གསོ་ཞུ་རྒྱུ་དང་། དམ་པ་དེ་ཉིད་ཀྱི་ཆེད་དུ་སྨོན་ལམ་གསོལ་འདེབས་ཞུ་རྒྱུ་ཡིན་ཞེས་འཁོད་གནང་ཡོད་འདུག