༄༅། ། སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་མཆོག་གིས་སྣེ་ཁྲིད་འོག སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག་དང་། སྤྱི་འཐུས་མཁན་པོ་འཇམ་དཔལ་བསྟན་འཛིན་མཆོག སྤྱི་འཐུས་གེ་བ་ཚང་ངག་དབང་ཐར་པ་མཆོག་བཅས་ལས་གྲུབ་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཕྱི་ཚེས་ ༡༤ ནས་ ༡༦ བར་ཉིན་གསུམ་རིང་ཨོ་གླིང་གྲོང་ཁྱེར་སི་ཌི་ནི་ནང་གི་མཛད་རིམ་ཁག་མཇུག་བསྒྲིལ་རྗེས། ཨོ་སི་ཀྲོ་ལི་ཡའི་གྲོང་ཁྱེར་བྷི་རི་སི་བྷེན་དང་། མེལ་བྷོན། རྒྱལ་ས་ཀེན་བྷེ་ར། སི་ཌི་ནི་གྲོང་ཁྱེར་བཅས་བཞིའི་གཞུང་འབྲེལ་ཕྱོགས་བསྐྱོད་ལེགས་གྲུབ་གནང་སྟེ་ཕྱིར་རྒྱ་གར་དུ་ཕྱིར་ཕེབས་གནང་ཡོད་འདུག
དེ་ཡང་ཕྱི་ཚེས་ ༡༤ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཨོ་གླིང་གྲོང་ཁྱེར་སི་ཌི་ནི་ལ་ཕེབས་འབྱོར་སྐབས། ས་གནས་མི་མང་གིས་སྣེ་ལེན་ཕེབས་བསུ་ཞུས་གནང་ཡོད་འདུག་པ་དང་། ཕྱི་དྲོ་ཆུ་ཚོད་ ༦།༣༠ ཐོག་སྐུ་ཚབ་དོན་གཅོད་ཁང་གིས་གོ་སྒྲིག་གནང་བའི་ས་གནས་བོད་རིགས་མི་མང་འདུ་འཛོམས་སར། སྤྱི་འཐུས་རྣམ་པ་བཞིས་བརྗོད་གཞི་ཆ་བགོས་ལྟར། སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་བྱུང་རིམ་སྐོར་ངོ་སྤྲོད་དང་། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག་གིས་གཉིས་སྨན་དབུ་མའི་ལམ་གྱི་སྲིད་བྱུས་སྐོར། སྤྱི་འཐུས་མཁན་པོ་འཇམ་དཔལ་བསྟན་འཛིན་མཆོག་གིས་༧གོང་ས་མཆོག་གི་མཛད་འཕྲིན་སྐོར། སྤྱི་འཐུས་གེ་བ་ཚང་ངག་དབང་ཐར་པ་མཆོག་གིས་ད་ལྟའི་བོད་ནང་གི་ཛ་དྲག་གནས་སྟངས་བཅས་ཀྱི་ཐོག་གསུང་བཤད་དང་། མི་མང་གིས་དྲི་བ་ཕུལ་བ་ཁག་ལ་ལན་འདེབས་གསལ་བཤད་གནང་། དེ་བཞིན་སི་ཌི་ནི་ཁུལ་གྱི་དཀའ་ངལ་སྐོར་ལ་ཚོགས་གཙོ་སྦྲེལ་པོའི་ལམ་སྟོན་ཡོད་པ་ལྟར། སྤྱི་འཐུས་རྣམ་པས་གསན་བཞེས་གནང་བ་དེ་དག་སྤྱི་འཐུས་རྒྱུན་ལས་སུ་འབུལ་རྒྱུ་རེད་འདུག སྐབས་དེར་ཕྱོགས་བཞུགས་སྤྱི་འཐུས་གདོང་འདུས་སྐྱིད་འཛོམས་མཆོག་དང་། སྐུ་ཚབ་དོན་གཅོད་ལྷག་པ་མཚོ་སྒོ་ལགས། རྒྱ་རིགས་འབྲེལ་མཐུད་པ་སྤྱི་ཟུར་འབའ་བ་སྐལ་བཟང་རྒྱལ་མཚན་ལགས་བཅས་མཉམ་ཞུགས་གནང་ཡོད་འདུག དེ་རྗེས་སྤྱི་འཐུས་སྐུ་ཚབ་ཚོགས་ཆུང་ནས་ཨེ་ཤི་ཡ་རང་དབང་རླུང་འཕྲིན་ཁང་གི་རྒྱ་ཡིག་སྡེ་ཚན་གསར་འགོད་པའི་བཅར་འདྲིར་དང་ལེན་གནང་ཡོད་འདུག
ཕྱི་ཚེས་ ༡༥ ཉིན་ས་གནས་དང་བླངས་མི་མང་རྣམས་ཀྱིས་བོད་མི་མང་སྤྱི་འཐུས་སྐུ་ཚབ་ཚོགས་ཆུང་གི་ཚོགས་མི་རྣམས་སི་ཌི་ནི་ཁུལ་ལ་མཚོ་གཟིགས་སུ་གདན་ཞུས་དང་། དགོང་མོ་ཨོ་གླིང་བོད་ཀྱི་མཛའ་འབྲེལ་ཚོགས་པ་བཙུགས་ནས་ལོ་ངོ་ ༥༠ འཁོར་བའི་མཛད་སྒོའི་ཐོག་སྤྱི་འཐུས་རྣམ་པ་བཞི་གདན་ཞུས་གནང་བ་ལྟར་ཆེད་བཅར་ཀྱིས་དུས་དྲན་དང་འབྲེལ་བའི་གསུང་བཤད་གནང་ཡོད་འདུག
ཕྱི་ཚེས་ ༡༦ ཉིན་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པའི་གོ་སྒྲིག་འོག སྤྱི་འཐུས་སྐུ་ཚབ་ཚོགས་ཆུང་ནས་རྒྱ་རིགས་ཤེས་ཡོན་ཅན་དང་མང་གཙོ་དོན་གཉེར་བ། ཧྥ་ལོན་ཀོང་། སློབ་ཕྲུག ཧོང་ཀོང་བ་སོགས་རྒྱ་རིགས་མི་གྲངས་སུམ་ཅུ་ལྷག་ལྷན་དུ། ཧོང་ཀོང་གི་ད་ལྟའི་གནས་བབ་དང་། བོད་ཀྱི་དབུ་མའི་ལམ་གྱི་སྲིད་བྱུས་ཀྱི་མ་འོངས་མདུན་ལམ་ཞེས་པའི་བརྗོད་གཞིའི་ཐོག་ཆུ་ཚོད་གསུམ་ཙམ་བགྲོ་གླེང་གནང་ཡོད་པ་མ་ཟད། རྒྱ་ནག་ལ་བལྟ་ཞེས་པའི་རྒྱ་ཡིག་གསར་ཁང་གི་དམིགས་བསལ་བཅར་འདྲི་ལེ་ཚན་ལ་སྤྱི་འཐུས་རྣམ་པ་མཉམ་ཞུགས་གནང་སྟེ་དྲི་བ་ཁག་ལ་ལན་འདེབས་ཞུས་གནང་ཡོད་འདུག
བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ནས་ཕྱི་ལོ་ ༢༠༡༩ ཟླ་ ༡༡ ཚེས་ ༧ ནས་ ༡༦ བར་ཨོ་སི་ཀྲོ་ལི་ཡ་ཁུལ་གྱི་གཞུང་འབྲེལ་ཕྱོགས་བསྐྱོད་ཀྱི་མཛད་རིམ་ཡོངས་སུ་ལེགས་པར་གྲུབ་སྟེ། ཕྱི་ཚེས་ ༡༧ ཉིན་ཕྱིར་རྒྱ་གར་དུ་ཕྱིར་ཕེབས་གནང་ཡོད་པ་བཅས། །